Hyderabad News: గోమతిది ప్రమాదమే..పేలుడు వెనుక కుట్ర లేదు.. సౌత్​ జోన్ డీసీపీ కిరణ్​!

Hyderabad News: గోమతి ఎలక్ట్రానిక్స్​ షోరూంలో జరిగింది ప్రమాదమే అని సౌత్​ జోన్ డీసీపీ కిరణ్ (DCP Kiran)​ స్పష్టం చేశారు. పేలుడు పదార్థాల వల్ల ఈ దుర్ఘటన జరగలేదని చెప్పారు. షోరూంలోని రిఫ్రిజిరేటర్లు, ఏసీలు ఇతర వస్తువుల్లోని గ్యాస్​ సమ్మిళతం కావటంతోనే పేలుళ్లు జరిగి అగ్ని ప్రమాదం సంభవించినట్టు తెలిపారు. ఫోరెన్సిక్​ నిపుణులు ఈ విషయాన్ని ధృవీకరించారన్నారు. ఈనెల 24న రాత్రి సరిగ్గా 10.24గంటలకు శాలిబండలోని గోమతి ఎలక్ట్రానిక్స్​ షోరూంలో అగ్ని ప్రమాదం జరిగిన విషయం తెలిసిందే. మంటలు ఎగిసి పడటానికి ముందు షాపులో మూడు పేలుళ్లు సంభవించాయి. క్షణాల్లో నాలుకలు చాచి విస్తరించిన మంటల్లో తీవ్రంగా కాలిన గాయాలకు గురైన షోరూం యజమాని శివకుమార్​ బన్సల్​ కాంచన్ బాగ్ డీఆర్డీవో ఆస్పత్రిలో చికిత్స పొందుతూ అదే రోజు రాత్రి మరణించాడు. కాగా, పేలుడు కారణంగా షాపులో నుంచి విసురుగా బయటకు వచ్చిన శకలాలు తగిలి బైక్ పై వెళుతున్నసాజిద్ అలీ అనే వ్యక్తి మృత్యువాత పడ్డాడు.

సమగ్ర విచారణ జరపాలని డిమాండ్

కాగా, ఈ ప్రమాదంపై పలు అనుమానాలు వ్యక్తమయ్యాయి. ఇటీవలే ఢిల్లీలో కారు బాంబు పేలుడు సంఘటన జరిగిన నేపథ్యంలో ఇక్కడ కూడా అలాగే పేలుడు జరిపారన్న ప్రచారం జరిగింది. స్థానికులు సైతం చెవులు చిల్లులు పడే శబ్ధంతో పేలుళ్లు సంభవించినట్టు చెప్పారు. దీనిపై సమగ్ర విచారణ జరపాలని డిమాండ్​ చేశారు. ఈ క్రమంలో శనివారం రెండోసారి డీసీపీ కిరణ్ ఫోరెన్సిక్​ బృందంతో గోమతి ఎలక్ట్రానిక్స్​ తోపాటు పక్కనే ఉన్న బజాజ్​ ఎలక్ట్రానిక్స్​ షోరూం ను కూడా సందర్శించారు. ఆయనతోపాటు అగ్నిమాపక శాఖ అధికారులు కూడా ఉన్నారు. ఈ విచారణలో రిఫ్రిజిరేటర్లు, ఏసీ తదితర ఉపకరణాల్లోని గ్యాస్​ లీక్​ అయి సమ్మిళతం కావటం…విద్యుత్ వైరింగ్​ సరిగ్గా లేకపోవటం వల్ల ఎగిసిపడ్డ నిప్పురవ్వల కారణంగానే పేలుళ్లు జరిగినట్టుగా నిర్ధారణ అయ్యిందని డీసీపీ కిరణ్ చెప్పారు.

Also Read:Hyderabad News: జీడిమెట్లలో సామాజిక కార్యకర్త అరుదైన ఆలోచన.. ప్రాణానికి కవచం గా ‘గో స్లో’ నినాదం..?

ఈ సంఘటనలో కుట్ర కోణం ఏదీ లేదు 

మొదటి రెండు పేలుళ్లు చిన్న శబ్ధంతో జరుగగా మూడోది మాత్రం పెద్ద శబ్ధంతో సంభవించిందన్నారు. ఆ సమయంలో షాపు ముందు వైపు ఉన్న షట్టర్లు మూసి వేసి ఉన్నట్టు చెప్పారు. వెనక వైపు ఉన్న షట్టర కొద్దిగా తెరిచి ఉందన్నారు. ఇక, శివకుమార్​ బన్సల్​ కు అయిన కాలిన గాయాలను విశ్లేషించిన ఫోరెన్సిక్​ వైద్యులు కూడా వేర్వేరు గ్యాస్​ లు సమ్మిళతం కావటం వల్ల తలెత్తిన మంటల్లోనే అతనికి కాలిన గాయాలైనట్టుగా నిర్ధారించారన్నారు. ఈ సంఘటనలో కుట్ర కోణం ఏదీ లేదని స్పష్టం చేశారు. పేలుళ్లు జరిగినపుడు ఓ పక్కకు ఒరిగిపోయిన కారులోని సీఎన్జీ సిలిండర్ పేల లేదని చెప్పారు.

సౌత్​ జోన్ లోని అన్ని షాపుల్లో తనిఖీలు

అందువల్లే దాని డ్రైవర్ మణికంఠ సురక్షితంగా బయట పడ్డారన్నారు. ఒకవేళ కారులోని సిలిండర్ పేలి ఉంటే మణికంఠ తప్పించుకోవటం సాధ్యమయ్యేది కాదన్నారు. కాగా, శాలిబండలో ఉన్న ఎలక్ట్రానిక్​స్​ షో రూముల్లో ఎలాంటి రక్షణ ఏర్పాట్లు లేవని డీసీపీ కిరణ్ చెప్పారు. కనీసం కరెంట్​ కనెక్షన్లు కూడా సరిగ్గా లేవన్నారు. వారం రోజుల్లో సౌత్​ జోన్ లోని అన్ని షాపుల్లో తనిఖీలు నిర్వహిస్తామన్నారు. తీసుకోవాల్సిన ముందు జాగ్రత్తల గురించి తెలియ చేస్తామన్నారు. స్థానికులు అనుమానించినట్టుగా పేలుళ్ల కోసం ఆర్డీఎక్స్ తదితర పేలుడు పదార్థాలు ఉపయోగించినట్టుగా ఎలాంటి ఆధారాలు దొరక లేదన్నారు.

Also Read: Hyderabad Crime News: రేణు అగర్వాల్ హత్య కేసులో.. కీలక ఆధారాలు వేలుగులోకి?.. తెలిస్తే షాక్ అవ్వాల్సిందే!