Epaper 
Metro Smart Lockers: హైదరాబాద్ మెట్రోలో నిత్యం వేలాది మంది ప్రయాణిస్తున్న సంగతి తెలిసిందే. కోటి మందికి పైగా జనాభా కలిగిన నగరంలో ట్రాఫిక్ సమస్యను తప్పించుకునేందుకు ఉద్యోగులు, విద్యార్థులు, మహిళలు.. మెట్రో సేవలపైనే ఆధారపడుతున్నారు. ఈ నేపథ్యంలో ప్రయాణికులకు మెరుగైన సేవలను అందించేందుకు మెట్రో నిర్వాహకులు సైతం ఎప్పటికప్పుడు కొత్త సేవలను అందుబాటులోకి తీసుకొస్తున్నారు. ఈ క్రమంలోనే తాజాగా మెట్రో యాజమాన్యం సరికొత్త ఫీచర్ ను స్టేషన్లలో ఆవిష్కరించింది. ఆ విశేషాలేంటో ఇప్పుడు చూద్దాం.
స్మార్ట్ లాకర్లు ప్రారంభం..
హైదరాబాద్ మెట్రోలో స్మార్ట్ లాకర్ల సౌకర్యాన్ని ఎల్ అండ్ టీ సంస్థ అందుబాటులోకి తీసుకొచ్చింది. ప్రయాణికులు లెస్ లగేజీతో ఎంతో సౌకర్యవంతంగా మెట్రోలో ప్రయాణించేందుకు ఈ సేవలు ఉపయోగపడనున్నాయి. టక్కీట్ సంస్థతో భాగస్వామ్యం ద్వారా స్మార్ట్ లాకర్ల ఫీచర్ ను అందుబాటులోకి తీసుకొచ్చినట్లు ఎల్ అండ్ టీ అండ్ ఎంఆర్హెచ్ఎల్ ఎండీ కేవీబీ రెడ్డి ప్రకటించారు.
‘లాకర్లలో వాటిని దాచుకోవచ్చు’
టక్కీట్ కంపెనీ రూపొందించిన ఈ స్మార్ట్ లాకర్లలో తేలికపాటి వస్తువులను భద్రపరుచుకునేందుకు వీలు ఉంది. మెట్రోలో ప్రయాణించాలనుకునే ప్రయాణికులు.. తమ హెల్మెట్లు, సామాన్లు, షాపింగ్ బ్యాగులు, బ్యాక్ప్యాక్లు, ఇతర వ్యక్తిగత వస్తువులను సురక్షితంగా అందులో దాచుకోవచ్చు.
7 మెట్రో స్టేషన్లలో..
హైదరాబాద్ లోని ఏడు మెట్రో స్టేషన్లలో ప్రస్తుతం ఈ టక్కీట్ స్మార్ట్ లాకర్లు (TUCKIT Smart Lockers) అందుబాటులోకి వచ్చాయి. మియాపూర్, అమీర్‌పేట, పంజాగుట్ట, ఎల్బీ నగర్, ఉప్పల్, పరేడ్ గ్రౌండ్, హైటెక్ సిటీ ప్రాంతాల్లో ఈ లాకర్ సౌకర్యాలను ఉపయోగించుకోవచ్చు.
స్కాన్ అండ్ స్టోర్..
ప్రయాణికులు తమ వస్తువులను 30 సెకన్ల వ్యవధిలోనే లాకర్ లో భద్రపరుచుకోవచ్చు. ఇందుకోసం మూడు దశలను ఫాలో అవ్వాల్సి ఉంటుంది. ముందుగా లాకర్ పైన ఉన్న క్యూఆర్ కోడ్ ను ప్రయాణికుడు స్కాన్ చేయాలి. వస్తువుల పరిమాణం ఆధారంగా లాకర్ సైజ్ ను ఎంచుకోవాలి. ఎంత సమయం లాకర్ లో వస్తువులను ఉంచుతారో తెలియజేయడం ద్వారా ప్రక్రియను ముగించవచ్చు.
Also Read: Uppalapati Satish Case: ఉప్పలపాటి సతీష్ కేసులో బిగ్ ట్విస్ట్.. తెర వెనుక అండగా ఎస్ఐ.. పోలీసు వర్గాల్లో తీవ్ర చర్చ
ప్రయాణం.. సులభతరం
ఉప్పల్ లో స్మార్ట్ లాకర్లను అధికారికంగా ప్రారంభించిన అనంతరం ఎల్ అండ్ టీ ఎండీ కేవేబీ రెడ్డి మాట్లాడారు. టక్కీట్ తో కుదుర్చుకున్న ఈ భాగస్వామ్యం సురక్షితమైన, సులభతరమైన స్టోరేజ్ సౌకర్యాన్ని ప్రయాణికులకు అందిస్తుందని అన్నారు. ప్రయాణికులు తమ అవసరానికి అనుగుణంగా ఈ స్మార్ట్ లాకర్ సౌకర్యాన్ని వినియోగించుకోవాలని విజ్ఞప్తి చేశారు.
