Epaper 
Uppalapati Satish Case: ‘ఆ రెండు కోట్లు ఏమయ్యాయి?’.. ప్రస్తుతం పోలీసు శాఖలో ఈ ప్రశ్న తీవ్ర చర్చనీయాంశంగా మారింది. ఆర్థిక మోసగాడు ఉప్పలపాటి సతీష్ కేసులో వెలుగులోకి వస్తున్న సంచలన విషయాలు పోలీసు ఉన్నతాధికారుల దృష్టిని ఆకర్షిస్తున్నాయి. సతీష్ వేర్వేరు పేర్లతో షెల్ కంపెనీలు ఏర్పాటు చేసి, పెట్టుబడులు పెడితే భారీ లాభాలు ఇస్తానని నమ్మించి కోట్లాది రూపాయలు వసూలు చేశాడు. మాజీ కేంద్ర మంత్రి పి. శివశంకర్ కుమారుడు డాక్టర్ పి. వినయ్ కుమార్ సహా పలువురు ప్రముఖులు ఇతని చేతిలో మోసపోయారు. బాధితుల ఫిర్యాదులతో హైదరాబాద్ సీసీఎస్‌లో సతీష్‌పై కేసులు నమోదయ్యాయి. అయితే, రెండేళ్లుగా ఈ కేసు ఫైల్ పెండింగ్‌లోనే ఉండిపోయింది.
అదుపులోకి తీసుకున్నా..
హైదరాబాద్ కమిషనర్‌గా వి.సి. సజ్జనార్ బాధ్యతలు చేపట్టిన తర్వాత పెండింగ్‌లో ఉన్న కేసులపై దృష్టి సారించారు. రెండేళ్లుగా పరారీలో ఉన్న సతీష్‌ను పట్టుకోవాలని ఆదేశాలు జారీ చేశారు. ఈ క్రమంలో టాస్క్ ఫోర్స్ ఎస్ఐ శ్రీకాంత్ గౌడ్ నేతృత్వంలో ప్రత్యేక బృందం ముంబై వెళ్లి, సతీష్‌తో పాటు అతని భార్య, కూతురిని అదుపులోకి తీసుకుంది. నిందితులను హైదరాబాద్‌కు తరలిస్తుండగా, ఎస్ఐ శ్రీకాంత్ గౌడ్ సంచలనంగా వ్యవహరించారు. నిందితులను పోలీస్ వాహనంలో పంపకుండా, తాను మాత్రం సతీష్‌కు చెందిన కారులో ప్రయాణమయ్యారు. అంతేకాకుండా, సీజ్ చేసిన మొబైల్ ఫోన్లను నిందితులైన సతీష్, అతని భార్య, కూతురికి తిరిగి ఇచ్చారు. దారిలో షోలాపూర్ వద్ద ఓ దాబాలో వారితో కలిసి భోజనం చేశాడు. అదే అవకాశంగా సతీష్ తన మనుషులకు ఫోన్ చేసి, సదాశివపేటలోని ఓ దాబా వద్ద సిద్ధంగా ఉండాలని చెప్పి, భార్య, కూతురితో కలిసి మరో కారులో ఉడాయించాడు.
పెద్ద అధికారుల పాత్ర?
నిందితుడు పారిపోవడానికి ఎస్ఐ శ్రీకాంత్ గౌడ్ సహకరించారని, ఇందుకోసం సతీష్‌తో రూ.2 కోట్ల డీల్ కుదుర్చుకున్నారనే బలమైన ఆరోపణలు వచ్చాయి. ఈ వ్యవహారం పోలీసు వర్గాల్లో తీవ్ర కలకలం సృష్టించడంతో, విచారణ జరిపిన పోలీసులు ఎస్ఐను సస్పెండ్ చేశారు. భార్య, కూతురితో పరారైన సతీష్‌ను ఇటీవల మరోసారి కర్ణాటకలో ప్రత్యేక బృందం అరెస్ట్ చేసింది. హైదరాబాద్ తీసుకొచ్చి కోర్టులో హాజరు పరిచి రిమాండ్ చేశారు. అయితే, కోర్టుకు సమర్పించిన రిమాండ్ రిపోర్టులో ఇంతకుముందు నిందితుడు పోలీసులకు టోకరా ఇచ్చి పారిపోయిన విషయాన్ని, అలాగే రూ.2 కోట్ల డీల్ ఆరోపణలను అధికారులు ప్రస్తావించకపోవడం ఇప్పుడు మరింత చర్చకు దారితీసింది.
Also Read: Mandhana Wedding: స్మృతి మంధాన పెళ్లి వాయిదా సమయంలో ఇన్‌స్టాగ్రామ్‌లో ఆసక్తికర పోస్ట్.. అసలు విషయం ఇదే..
పోలీసు వర్గాల్లో సందేహాలు
‘సతీష్‌తో ఎస్ఐ శ్రీకాంత్ 2 కోట్ల డీల్ చేసుకున్నాడా?.. చేసుకుంటే ఆ డబ్బు ఎక్కడుంది?’ అన్న ప్రశ్నలు ప్రస్తుతం పోలీసు వర్గాల్లో వినిపిస్తున్నాయి. ఎస్ఐ స్థాయిలో ఉన్న శ్రీకాంత్ అంత పెద్ద మొత్తానికి డీల్ కుదుర్చుకుని ఉండరని, దీని వెనుక పెద్ద అధికారుల పాత్ర ఉండవచ్చని పలువురు అభిప్రాయపడుతున్నారు. రెండోసారి అరెస్ట్ చేసిన తర్వాత సతీష్‌ను ఈ విషయమై ఎందుకు ప్రశ్నించలేదో అర్థం కావటం లేదని వ్యాఖ్యానిస్తున్నారు. సమగ్రంగా దర్యాప్తు జరిపితే ఈ బాగోతంలో మరిన్ని సంచలన వివరాలు వెలుగు చూస్తాయని అంటున్నారు. ఉన్నతాధికారులు ఈ దిశగా స్పందిస్తారో?, లేదో? వేచి చూడాల్సిందే.
