GHMC: జీహెచ్ఎంసీలో స్పెషల్ ఆఫీసర్ ఎంట్రీ.. మారనున్న హైదరాబాద్ రూపురేఖలు!

GHMC: గ్రేటర్ హైదరాబాద్ అవసరాలకు అనుగుణంగా అభివృద్ధి పనులు చేపట్టేందుకు, జీహెచ్‌ఎంసీ(GHMC)లో వచ్చే ఫిబ్రవరి 10 తర్వాత అభివృద్ధి పనులు పరుగులు తీయనున్నాయి. ఫిబ్రవరి 10తో ప్రస్తుతమున్న పాలక మండలి అధికార గడువు ముగియనుండటంతో, ఆ తర్వాత స్పెషలాఫీసర్ పాలనలో పౌర సేవలు, నగరంలోని అభివృద్ధి పనులపై పూర్తి స్థాయిలో ఫోకస్ పెట్టేందుకు ప్రభుత్వం సిద్ధమైనట్లు విశ్వసనీయ సమాచారం. పాలక మండలి గడువు ముగియనుండటంతో, అధికారుల నిర్ణయాలకు రాజకీయపరమైన అడ్డంకులు తొలగిపోనున్నందున అభివృద్ధి పనులు ఊపందుకోనున్నాయి. ఈ నెల 25న జరిగిన కౌన్సిల్ సర్వసభ్య సమావేశంలో సుమారు రూ.3,764.28 కోట్ల అభివృద్ధి పనుల ప్రతిపాదనలకు కౌన్సిల్ ఆమోదం తెలిపింది. ఇంత భారీ మొత్తంలో పనులకు ఒకే కౌన్సిల్ సమావేశంలో ఆమోదం దక్కడం చాలా అరుదు. ఈ నిధులతో పనులను వీలైనంత త్వరగా ప్రారంభించేందుకు అధికారులు ఏర్పాట్లు చేస్తున్నారు.

స్ట్రీట్ లైట్లు, ట్రాఫిక్ సిగ్నల్స్ నిర్వహణ

ముఖ్యంగా, రోడ్ల నిర్వహణను మెరుగుపరిచేందుకు గత సర్కారు తెరపైకి తెచ్చిన కాంప్రహెన్సీవ్ రోడ్ మెయింటనెన్స్ ప్రొగ్రామ్‌కు అధికారులు దాదాపు రూ.2,828 కోట్లను కేటాయించారు. ఇది ప్రస్తుతం ప్రభుత్వం వద్ద పెండింగ్‌లో ఉంది. ఢిల్లీ తరహాలో స్ట్రీట్ లైట్ల మెరుగైన నిర్వహణ కోసం రూ.693 కోట్లను కేటాయించారు. త్వరలోనే జీహెచ్‌ఎంసీలో విలీనం కానున్న 27 అర్బన్ లోకల్ బాడీల్లోని స్ట్రీట్ లైట్లతో కలిపి ఔటర్ వరకు ఉన్న స్ట్రీట్ లైట్లకు మెరుగైన నిర్వహణ వ్యవస్థ అందుబాటులోకి రానుంది. గ్రేటర్ పరిధిలోని మూడు పోలీసు కమిషనరేట్ల పరిధిలో ఉన్న 340 ట్రాఫిక్ సిగ్నల్స్‌ను కూడా అత్యాధునిక విధానంలో మెయింటనెన్స్ చేసేందుకు జీహెచ్‌ఎంసీ రూపొందించిన రూ.77 కోట్ల ప్రతిపాదన అమలు కానుంది. వీటితో పాటు, మౌలాలీ చిల్లా వద్ద ర్యాంప్ నిర్మాణానికి అడ్డంకులు తొలగటంతో, దీని నిర్మాణానికి కేటాయించిన రూ.27 కోట్ల పనులను త్వరలోనే మొదలు పెట్టేందుకు ఇంజనీర్లు ప్రయత్నం చేస్తున్నారు.

Also Read: New Accreditation: జర్నలిస్టులకు కొత్త అక్రెడిటేషన్ కార్డులు మంజూరు చేయాలి : హెచ్​యూజే కార్యవర్గం డిమాండ్!

ఫుట్‌ఓవర్ బ్రిడ్జిలు, జలమండలి పనులు

నగరంలో పెరుగుతున్న ట్రాఫిక్ కారణంగా పాదచారుల భద్రత కోసం, రద్దీ ప్రాంతాలను గుర్తించి ఫుట్‌ఓవర్ బ్రిడ్జిలను ఏర్పాటు చేసేందుకు కౌన్సిల్ సమావేశం రూ.13.59 కోట్లకు ఆమోదం తెలిపింది. ఈ బ్రిడ్జిలు ఇంకా ఎక్కడెక్కడ అవసరమనే దానిపై జీహెచ్‌ఎంసీ అధికారులు ఫీజుబిలిటీ స్టడీ నిర్వహిస్తున్నారు. సిటీలోని వివిధ ప్రాంతాల్లో జలమండలి ఆధ్వర్యంలో చేపట్టనున్న తాగునీరు, మురుగు నీటి పనులకు కూడా కౌన్సిల్ రూ.13 కోట్లను కేటాయించగా, పనులు చేపట్టేందుకు అధికారులు సిద్ధమవుతున్నారు. ఇప్పటికే రూ.5కే భోజనం అందిస్తున్న ఇందిరమ్మ క్యాంటీన్ల కోసం కూడా కౌన్సిల్ రూ.11.43 కోట్లను మంజూరు చేసింది. దీనితోపాటు మరో 35 రూ.5 బ్రేక్ ఫాస్ట్ క్యాంటీన్లను ఏర్పాటు చేసేందుకు సన్నాహాలు జరుగుతున్నాయి.

ఏడాది తర్వాతేనా ఎన్నికలు?

వచ్చే ఫిబ్రవరి 10న పాలక మండలి అధికార గడువు ముగియనుండగా, వెంటనే జీహెచ్‌ఎంసీ ఎన్నికలు నిర్వహించేందుకు రాష్ట్ర ప్రభుత్వం సిద్ధంగా లేనట్టు తెలిసింది. 27 అర్బన్ లోకల్ బాడీల విలీనం, వార్డుల డీలిమిటేషన్ ప్రక్రియలు కొనసాగిస్తూనే, స్పెషలాఫీసర్ పాలనలో హెచ్‌ సిటీ, ఎస్ఎన్‌డీపీ వంటి పనులను వేగవంతం చేసి, అభివృద్ధిని ప్రజలకు చూపించిన తర్వాతే ఎన్నికలు నిర్వహించాలని సర్కారు భావిస్తున్నట్లు సమాచారం. సిటీలో అధికార పార్టీకి పెద్దగా అసెంబ్లీ సీట్లు లేనప్పటికీ, జీహెచ్‌ఎంసీ ఎన్నికల్లో విజయం సాధించే లక్ష్యంతోనే, పాలక మండలి గడువు ముగియగానే అభివృద్ధిని పరుగులు పెట్టించేందుకు వ్యూహం సిద్ధం చేస్తున్నట్లు తెలిసింది.

Also Read: Shaheen Sayeed: ఢిల్లీ పేలుడు కేసు దర్యాప్తు.. మహిళా డాక్టర్ గదిలో రూ.18 లక్షల క్యాష్.. కీలక విషయాలు వెలుగులోకి