Shaheen Sayeed: ఢిల్లీ పేలుడు కేసు దర్యాప్తు.. మహిళా డాక్టర్ గదిలో రూ.18 లక్షల క్యాష్.. కీలక విషయాలు వెలుగులోకి

Shaheen Sayeed: ఢిల్లీలో నవంబర్ 10న జరిగిన భారీ పేలుడు (Delhi Blast Case), దానికి రెండు రోజుల ముందు ఫరీదాబాద్‌లో ఉగ్రవాద నెట్‌వర్క్ గుర్తింపు దర్యాప్తులో భాగంగా ఉత్తరప్రదేశ్‌కు చెందిన మహిళా వైద్యురాలు షాహీన్ సయీద్‌ (Shaheen Sayeed) అరెస్టైన విషయం తెలిసిందే. ఆమెకు సంబంధించిన పూర్తి వివరాలను రాబట్టే క్రమంలో శనివారం కీలక విషయాలు వెలుగులోకి వచ్చాయి. అల్-ఫలామ్ యూనివర్సిటీలో (Al Falah University) షాహీన్ సయీద్‌కు కేటాయించిన 22వ రూమ్‌లో ఏకంగా రూ.18 లక్షల నగదును జాతీయ దర్యాప్తు సంస్థ ఎన్ఐఏ (NIA) గుర్తించింది. ఈ క్యాష్ మొత్తాన్ని స్వాధీనం చేసుకుంది. ఢిల్లీ పేలుడు కేసు దర్యాప్తు ముమ్మరం అయిన తరుణంలో ఈ పరిణామం చోటుచేసుకుంది.

అల్-ఫలా యూనివర్సిటీలో ఆమెకు కేటాయించిన ఈ సాధారణ గదిని ఎన్ఐఏ అధికారులు గురువారం నాడు పరిశీలించారు. షాహీన్ సయీద్‌ వెంటబెట్టుకొని వెళ్లి, ఆమె క్యాబిన్, పాఠాలు చెప్పిన తరగతి గదులతో పాటు క్యాంపస్‌లోని వివిధ ప్రదేశాలకు తీసుకెళ్లి మరీ దర్యాప్తు చేశారు. ప్లాస్టిక్ సంచిలో చుట్టి, బీరువా లోపల దాచి పెట్టిన ఈ రూ.18 లక్షల నగదును అధికారులు గుర్తించారు. అయితే, ఇంత పెద్ద మొత్తంలో సయీద్‌కు డబ్బు ఎక్కడి నుంచి వచ్చిందో తెలుసుకోవడానికి దర్యాప్తు అధికారులు ప్రయత్నిస్తున్నారు. మరోవైపు, షాహీన్‌తో పాటు, ఇతర నిందితులైన ముజమ్మిల్ షకీల్, అదిల్ అహ్మద్ రథర్‌లను కూడా ఎన్ఐఏ అధికారులు ఇవాళ (శనివారం) కోర్టులో హాజరుపరిచారు.

Read Also- Renigunta Airport: రేణిగుంట ఎయిర్‌పోర్టులో ఆగిపోయిన విమానం.. ఆందోళనకు గురైన ప్యాసింజర్లు

కొత్త కారు కొన్నారు

ఢిల్లీ పేలుడు కేసులో అరెస్ట్ అయిన నిందితులు షహీన్ సయీద్, ముజమ్మిల్ షకీల్ ఒక కొత్త మారుతి సుజుకి బ్రెజా కారును కొనుగోలు చేసినట్టు గుర్తించారు. పేలుడు పదార్థాలు తరలించడానికి సిద్ధం చేయాలనుకున్న 32 కార్లలో ఇది కూడా ఒకటని దర్యాప్తు అధికారులు గుర్తించినట్టు తెలుస్తోంది. సయీద్, షకీల్ ఇద్దరూ సెప్టెంబర్ 25న ఒక షోరూమ్‌లో ఈ కారు కొన్నారని, ఆ కారుతో పోజులు ఇచ్చిన ఫొటోలు కూడా బయటపడ్డాయి. మొత్తం నగదు చెల్లించి ఈ కారును కొన్నట్టు దర్యాప్తు వర్గాలు చెబుతున్నాయి. హెచ్‌ఆర్ 87యూ 9988 రిజిస్ట్రేషన్‌తో హర్యానాలో రిజిస్టర్ చేసిన ఈ కారును, అల్-ఫలా వర్సిటీ క్యాంపస్‌లో పార్క్ చేసి ఉన్నట్టుగా దర్యాప్తు బృందాలు గుర్తించాయి.

Read Also- Uday Kiran: ఉదయ్ కిరణ్ గురించి చెబుతూ ఎమోషనల్ అయిన ‘మనసంతా నువ్వే’ దర్శకుడు.. ఉంటే అలా చేసేవాడిని..

షాహీన్, ముజమ్మిల్ ప్రేమాయణం

అనుమానిత ఉగ్రవాదులు షాహీన్ సయీద్, ముజమ్మిల్ షకీల్ ఇద్దరూ ప్రేమించి, పెళ్లి చేసుకున్నట్టుగా కూడా బయటపడింది. షాహీన్ అప్పటికే రెండు పెళ్లిళ్లు చేసుకొని, విడిపోయింది. అల్ ఫలాహ్ యూనివర్సిటీలో పరిచయం అయిన వీరిద్దరి మధ్య ప్రేమ పుట్టింది. రోజువారీ సమావేశాలు, కాలేజీలో కలిసి పనిచేయడం, ఒకే వృత్తిలో కొనసాగడంతో దగ్గరయ్యారు. 2023 సెప్టెంబరు నెలలో అల్-ఫలా యూనివర్సిటీకి సమీపంలోని ఒక మసీదులో తాము పెళ్లి చేసుకున్నామని ఎన్ఐఏ విచారణలో షకీల్ తెలిపాడు. పెళ్లి సమయంలో సాంప్రదాయం ప్రకారం, షాహీన్‌కు రూ.6000 నగదును ఇచ్చినట్టు తెలిపాడు. కాగా, నవంబర్ 10న ఎర్రకోట వద్ద రోడ్డుపై జరిగిన బాంబు పేలుడులో 15 మంది అమాయకులు చనిపోయిన విషయం తెలిసిందే. 20 మందికిపైగా గాయపడిన విషయం తెలిసిందే.