GHMC: జీహెచ్ఎంసీ నుంచి బదిలీ కోసం అధికారుల ప్రయత్నాలు.. కారణం అదేనా..!

GHMC: రాష్ట్రంలోనే అతిపెద్ద స్థానిక సంస్థగా పేరుగాంచిన జీహెచ్ఎంసీ(GHMC)లో ప్రస్తుతం విచిత్రమైన పరిస్థితులు నెలకొన్నాయి. గతంలో బల్దియాలో అదనపు కమిషనర్, జోనల్ కమిషనర్‌గా విధులు నిర్వహించేందుకు ఆసక్తి చూపిన ఉన్నతాధికారులు ఇప్పుడు మాత్రం ఎప్పుడెప్పుడు బయటకు వెళ్లాలా? అనే ఆలోచనలో పడినట్లు సమాచారం. ఇటీవల ఐపీఎస్ బదిలీలు చేసిన విధంగానే త్వరలోనే ఐఏఎస్‌ల బదిలీలు చేస్తే తమకు కూడా స్థానచలనం కలుగుతుందని అధికారులు భావించారు. ఇంతలోనే స్థానిక సంస్థల ఎన్నికల కోడ్ అమల్లోకి వచ్చింది. మరోవైపు, కొత్త సంస్కరణలు లేదా అభివృద్ధి ప్రతిపాదనలు తీసుకురావడానికి అనుకూలమైన పరిస్థితులు లేకపోవడం వంటి కారణాల వల్ల ఉన్నతాధికారులు బదిలీపై బయటకు వెళ్లాలని యోచిస్తున్నట్లు విశ్వసనీయ సమాచారం. అంతేకాదు, జీహెచ్ఎంసీలో నెలకొన్న ఆర్థిక సంక్షోభం, అలాగే వచ్చే ఫిబ్రవరి 10తో పాలక మండలి గడువు ముగిసి, అదే రోజు నుంచి స్పెషల్ ఆఫీసర్ పాలన రానుండటం కూడా అధికారుల అనాసక్తికి ప్రధాన కారణాలని తెలుస్తోంది.

ఎన్నికల కోడ్ అడ్డు

జీహెచ్ఎంసీ బయట ఇతర జిల్లాలకు కలెక్టర్‌గా వెళ్లాలని ప్రయత్నాలు చేసుకున్న అధికారులకు స్థానిక ఎన్నికల కోడ్ అడ్డంకిగా మారింది. అయినప్పటికీ, కనీసం డిసెంబర్ 17 వరకు అమల్లో ఉండే కోడ్ ముగిసిన తర్వాతనైనా తమకు నచ్చిన పోస్టింగ్ దక్కకపోదా? అనే కొండంత ఆశతో క్యాడర్ అధికారులు ప్రయత్నాలు చేసుకుంటున్నట్లు సమాచారం. దీనికి తోడు, గ్రేటర్ బయటనున్న 27 పట్టణ స్థానిక సంస్థలను జీహెచ్ఎంసీలో విలీనం చేసే ప్రతిపాదనపై అధికారగణం స్టడీ చేసి రిమార్క్స్ పంపాలని కౌన్సిల్ సమావేశానికి ప్రీయాంబుల్ ప్రతిపాదన పంపడం కూడా మరో కారణంగా చెప్పవచ్చు. జీహెచ్ఎంసీలో కొనసాగితే స్థానిక పట్టణ సంస్థల విలీనం తర్వాత పనిభారం పెరుగుతుందన్న ఆందోళన క్యాడర్, నాన్-క్యాడర్ ఉన్నతాధికారులను వేధిస్తున్నట్లు సమాచారం. మరీ ముఖ్యంగా, అదనపు కమిషనర్ లేదా జోనల్ కమిషనర్‌గా విధులు నిర్వహిస్తే కమిషనర్, మేయర్‌తో పాటు మంత్రుల నుంచి రాజకీయ ఒత్తిళ్లు ఎక్కువగా ఉంటాయని భావిస్తున్న కొందరు ఉన్నతాధికారులు త్వరలో చేపట్టనున్న బదిలీల్లో తమను బదిలీ చేయాలని కోరుకుంటున్నట్లు తెలిసింది.

Also Read: Gadwal Crime: మాజీ సర్పంచ్ హత్య కేసులో.. వీడుతున్న చిక్కుముడి.. భూతగాదాలే హత్యకు కారణమా?

ఫైళ్ల క్లియరెన్స్‌లో జాప్యం

కొందరు జోనల్ కమిషనర్లు కోడ్ ముగిసిన తర్వాత బదిలీ అవుతామన్న ఆశతో ఫైళ్లు క్లియర్ చేయకుండా పక్కన పెడుతున్నారన్న ఆరోపణలు సైతం ఉన్నాయి. ఇదిలా ఉండగా, జీహెచ్ఎంసీ కమిషనర్ ఆర్. వి. కర్ణన్ బాధ్యతలు స్వీకరించిన తర్వాత 14 మంది వరకు ఉన్న అదనపు కమిషనర్ల సంఖ్యను బాగా తగ్గించారు. ప్రసాదరావు కమిటీ చేసిన సిఫార్సులను అధ్యయనం చేసిన కమిషనర్ త్వరలోనే జీహెచ్ఎంసీలో అంతర్గతంగా భారీగా మార్పులు చేసేందుకు సిద్ధమైనట్లు సమాచారం. ఇటీవలే సెలవులపై వెళ్లి తిరిగి విధుల్లో చేరిన కొందరు ఉన్నతాధికారులకు వారి పాత బాధ్యతలను అప్పగించకపోవటమే ఇందుకు నిదర్శనంగా పేర్కొనవచ్చు. ముఖ్యంగా జీహెచ్ఎంసీలోని కీలక విభాగాలైన ఫైనాన్స్, యూసీడీ, ఎలక్షన్ విభాగాలకు సంబంధించి ఉన్నతాధికారుల సీట్లు మారే అవకాశమున్నట్లు, ఈ దిశగా ఇప్పటికే కమిషనర్ కర్ణన్ ఓ నిర్ణయానికొచ్చినట్లు సమాచారం.

Also Read: AI Shopping Tool: ఏఐ సాయంతో షాపింగ్.. పర్‌ప్లెక్సిటీ సరికొత్త టూల్.. ఇకపై మరింత సులభం!