Gadwal Crime: మాజీ సర్పంచ్ హత్య కేసులో.. వీడుతున్న చిక్కుముడి.. భూతగాదాలే హత్యకు కారణమా?

Gadwal Crime: జిల్లాలో సంచలనం సృష్టించిన కేటిదొడ్డి మండలం నందిన్నె మాజీ సర్పంచ్ చిన్న భీమరాయుడు హత్య కేసు చిక్కుముడి క్రమంగా వీడుతున్నట్లు పోలీసులు భావిస్తున్నారు. ధరూర్‌ మండలం జాంపల్లి వద్ద శుక్రవారం జరిగిన రోడ్డు ప్రమాదం రూపంలో జరిగిన ఈ హత్య కేసులో నిందితుల కోసం పోలీసులు ముమ్మరంగా గాలిస్తున్నారు. ఈ కేసులో సూత్రధారులు, పాత్రధారులెవరన్న విషయంపై పోలీసులకు ఇప్పటికే ఒక స్పష్టత వచ్చినట్లు తెలుస్తుంది. హత్యలో సంబంధమున్న కీలక నిందితులు ఇంకా పరారీలో ఉండగా, వారు పట్టుబడితే మొత్తం చిక్కుముడి వీడిపోనుంది. ఘటన జరిగి ఐదు రోజులవుతున్నా, నిందితులు దొరకకపోవడంతో జిల్లా వ్యాప్తంగా సంచలనం కావడంతో పోలీసు యంత్రాంగం దృష్టి అంతా దీనిపైనే కేంద్రీకృతమై ఉంది.

రాయలసీమ వ్యక్తి ప్రధాన పాత్రధారి

పోలీసుల విచారణలో భాగంగా, ఈ హత్య వెనుక రాయలసీమ ప్రాంతానికి చెందిన ఒక వ్యక్తి ప్రధాన పాత్రధారిగా ఉన్నట్లు గుర్తించారు. బైక్‌పై వెళ్తున్న చిన్న భీమరాయుడును బొలేరో వాహనంతో గుద్ది హత్య చేసిన రోజు రాత్రే ప్రధాన సూత్రధారి అజ్ఞాతంలోకి వెళ్ళినట్లు సమాచారం. ఈ కేసులో నిందితులకు షెల్టర్ సమకూర్చిన ఒక వ్యక్తిని పోలీసులు అదుపులోకి తీసుకుని విచారిస్తున్నారు. అలాగే, హత్యకు సూత్రధారులను కూడా పోలీసులు అదుపులోకి తీసుకుని విచారిస్తున్నట్లు తెలుస్తుంది. అయితే, ప్రధాన పాత్రధారి మాత్రం ఇంకా పరారీలోనే ఉన్నాడు. అతడు పట్టుబడితే అన్ని కీలక అంశాలు వెలుగులోకి వచ్చే అవకాశం ఉంది.

Also Read: Jogulamba Gadwal Crime: అక్రమ సంబంధానికి అడ్డొస్తాడని.. ప్రియుడితో హత్య చేయించిన భార్య!

తెలిసిన వారేనా?

హత్యకు సూత్రధారులు, పాత్రధారులు అంతా చిన్న భీమరాయుడుకు తెలిసిన వ్యక్తులేనని పోలీసులు అనుమానిస్తున్నారు. వీరితో చిన్న భీమరాయుడుకు భూ వివాదాలు, రాజకీయ విభేదాలు, వ్యాపారానికి సంబంధించిన గొడవలు ఉన్నాయని పోలీసులు అనుమానిస్తున్నారు. ఈ కారణాల వల్లే హత్య జరిగి ఉండవచ్చని భావించి, అనుమానితులను అదుపులోకి తీసుకుని విచారిస్తున్నారు. ఎవరి పాత్ర ఎంత అన్న అంశంపై వివరాలు సేకరిస్తున్నారు. మూడు నెలల ముందే సుఫారీ గ్యాంగ్‌తో ఒప్పందం చేసుకుని ఈ హత్య చేయించారంటూ మృతుడి కుటుంబ సభ్యులు, బంధువులు ఆరోపిస్తున్నారు. ఈ హత్య కేసు యొక్క పూర్తి వివరాలు నిందితుల అరెస్ట్, పోలీసుల దర్యాప్తు తర్వాత వెలువడనున్నాయి.

Also Read: Gadwal: గద్వాలలో దొంగల హల్చల్.. వరుస ఘటనలతో జనాల బెంబేలు