Epaper 
Bath Machine: జపాన్‌లోని ప్రముఖ సైన్స్ , టెక్నాలజీ సంస్థ ఒక అద్భుతమైన ఆవిష్కరణతో ప్రపంచ దృష్టిని ఆకర్షించింది. “మిరాయ్ హ్యూమన్ వాషింగ్ మెషిన్” అని పిలిచే ఈ ప్రత్యేక యంత్రం, మనిషికి పూర్తిగా ఆటోమేటెడ్ విధానంలో స్నానం చేయించే ఆధునిక టెక్నాలజీతో రూపొందించబడింది. భవిష్యత్ అవసరాలను దృష్టిలో పెట్టుకుని తయారు చేసిన ఈ పరికరం కేవలం 15 నిమిషాల్లో బాడీ క్లీనింగ్, స్కిన్ స్క్రబ్బింగ్, డ్రైయింగ్ వంటి ప్రక్రియలను పూర్తిగా ఆటోమేటిక్‌గా నిర్వహిస్తుంది. ఒక్క బటన్ నొక్కితే సరిపోతుంది.. మిగతా పనంతా మెషినే చేసేస్తుంది.
ఈ భవిష్యత్ స్నాన యంత్రాన్ని టోక్యోలో జరిగిన ఒసాకా–కాన్సాయ్ ఎక్స్‌పోలో మొదటిసారి ప్రదర్శించగా, అక్కడికక్కడే విపరీతమైన స్పందన వెల్లువెత్తింది. విడుదలైన వెంటనే దాదాపు 40,000 మంది ఈ మెషిన్‌ను ట్రై చేయడానికి దరఖాస్తు చేయడంతో నిర్వాహకులు కూడా ఆశ్చర్యపోయారు. దీనివల్లే సంస్థ ఈ టెక్నాలజీని కేవలం ఎక్స్‌పోలో చూపించడానికే కాదు, కమర్షియల్ మార్కెట్‌లోకి తీసుకురావాలనే నిర్ణయానికి వచ్చింది.
కానీ ఈ హ్యూమన్ వాషింగ్ మెషిన్ ధర మాత్రం అందరినీ షాక్‌కు గురిచేస్తోంది. 60 మిలియన్ యెన్, అంటే భారతీయ కరెన్సీ ప్రకారం సుమారు రూ. 3 కోట్లు. అంత భారీ ఖరీదు కారణంగా ఈ ప్రోడక్ట్‌ను సాధారణ వినియోగదారులకు కాదు, కేవలం హోటళ్లు, స్పాలు, ప్రీమియం వెల్‌నెస్ సెంటర్లు వంటి ప్రొఫెషనల్ సెట్టింగ్స్‌కి మాత్రమే విక్రయిస్తామని కంపెనీ స్పష్టం చేసింది.
ఈ మెషిన్ పరిమాణం కూడా విశేషమే. 1 మీటర్ వెడల్పు, 2.5 మీటర్ లోతు, 2.6 మీటర్ ఎత్తు ఉన్న ఈ ప్రత్యేక పాడ్‌లోపలికి వెళ్లిన తర్వాత, ఎలాంటి మనిషి జోక్యం లేకుండానే యూజర్ శరీరాన్ని పూర్తిగా శుభ్రం చేస్తుంది. అంతేకాదు, స్నానం చేయిస్తున్నంత సేపు హాయిగా రిలాక్స్ అయ్యేలా మ్యూజిక్ థెరపీ కూడా అందిస్తుంది. స్పా-లెవెల్ కంఫర్ట్‌తో ఉండేలా ప్రత్యేక డిజైన్ చేశారు.
బ్రాండ్ ప్రీమియం ఇమేజ్‌ను నిలబెట్టుకోవాలనే ఉద్దేశంతో కంపెనీ ఈ మిరాయ్ హ్యూమన్ వాషింగ్ మెషిన్‌కి కేవలం 40–50 యూనిట్లను మాత్రమే తయారు చేయాలని ప్లాన్ చేస్తోంది.
