Australian PM Marriage: 62 ఏళ్ల వయసులో గర్ల్‌ఫ్రెండ్‌ని పెళ్లి చేసుకున్న ఆస్ట్రేలియా ప్రధాని.. 5 రోజుల హనీమూన్

Australian PM Marriage: ఆస్ట్రేలియా (Australia) ప్రధానమంత్రి ఆంథోనీ అల్బనీస్ (Anthony Albanese ), లేటు వయసులో రెండో వివాహ బంధంలో (Australian PM Marriage) అడుగు పెట్టారు. తన గర్ల్‌ఫ్రెండ్ జోడీ హేడన్‌ను (Jodie Haydon) శనివారం ఆయన పెళ్లి చేసుకున్నారు. ఫైనాన్షియల్ సర్వీసెస్ రంగం ఉద్యోగి అయిన హేడన్‌ను కాన్‌బెర్రాలోని తన నివాసంలో పెళ్లి చేసుకున్నట్టుగా ఆయన వెల్లడించారు. అల్బనీస్ ప్రస్తుత వయసు 62 సంవత్సరాలు కాగా, పదవిలో ఉండగా పెళ్లి చేసుకున్న ఆస్ట్రేలియా తొలి ప్రధానిగా ఆయన రికార్డు సృష్టించారు.

కాన్‌బెర్రాలోని తన అధికారిక నివాసం ‘ది లాడ్జ్’లో ఉన్న తోటలో ప్రైవేట్ వేడుకలో వివాహం చేసుకున్నారు. ‘పెళ్లైంది’’ (Married) అంటూ ఒకే ఒక్క పదాన్ని ఆయన సోషల్ మీడియాలో పోస్ట్ చేశారు. నూతన జంట విడిగా మరో ప్రకటన విడుదల చేశారు. ‘‘మా ప్రేమను, మిగిలివున్న జీవితాన్ని మా కుటుంబ సభ్యులు, సన్నిహితుల సమక్షంలో గడపబోతున్నామని తెలియజేయడానికి మాకు చాలా సంతోషంగా ఉంది’’ అని ఆ ప్రకటనలో పేర్కొన్నారు. ఈ సందర్భంగా ఫొటోలను కూడా షేర్ చేశారు. బో-టై ధరించిన అల్బనీస్, చిరు నవ్వులు చిందిస్తున్న వధువు హేడన్ చేతిని పట్టుకుని ముందుకు నడుస్తుండగా, వారిపై పూల వర్షం కురడం పెళ్లి వీడియోలు, ఫొటోల్లో కనిపించింది. వధువు పొడవాటి తెల్లటి దుస్తులు ధరించి ప్రత్యేక ఆకర్షణగా నిలిచింది. అల్బనీస్ పెంపుడు శునకం ‘టోటో’ పెళ్లి రింగ్‌ను తీసుకొచ్చింది. శునకాన్ని కూడా తెల్లటి దుస్తులతో అలంకరించడం విశేషం.

Read Also- KTR Vs Congress: నీకు లాగు లేనప్పుడే మహేష్ కుమార్ గౌడ్ రాజకీయాలు.. కేటీఆర్‌కు కాంగ్రెస్ కౌంటర్లు

కాగా, ఆంటోనీ అల్బనీస్ 2024 వాలెంటైన్స్ డే సందర్భంగా జోడీ హేడన్‌కు లవ్ ప్రపోజ్ చేయగా, ఆ వేడుకను కూడా ఘనంగా నిర్వహించారు. తన మిగతా జీవితాన్ని ఎవరితో గడపాలని అనుకుంటున్నానో, అలాంటి భాగస్వామి దొరికింది అంటూ అల్బనీస్ ప్రకటన చేశారు. మొత్తానికి వివాహం ద్వారా ఇద్దరూ ఒక్కటయ్యారు.

5 రోజుల హనీమూన్

కొత్త జంట సోమవారం నుంచి ఐదు రోజులపాటు హనీమూన్‌కు వెళ్లనుంది. అయితే, విదేశాలకు కాకుండా, ఆస్ట్రేలియాలోనే గడపనున్నారు. కాగా, ఆంటోనీ అల్బనీస్‌కు ఇది రెండవ పెళ్లి. తొలి భార్యకు 2019లో విడాకులు ఇచ్చారు. తొలి భార్యకు నాథన్ అనే కొడుకు కూడా ఉన్నాడు. తాజాగా పెళ్లి చేసుకున్న జోడీ హేడన్‌ను ఐదేళ్లక్రితం మెల్‌బోర్న్‌లో జరిగిన ఒక బిజినెస్ డిన్నర్‌లో తొలిసారి కలిశారు. ఆ పరిచయం పెరిగి, ఇద్దరూ దగ్గరయ్యారు. ఇక, పదవి విషయానికి వస్తే, ఆంటోనీ అల్బనీస్‌కు మరో రెండున్నరేళ్లు పదవిలో ఉంటారు. లేబర్ పార్టీ నాయకుడు అయిన ఆయన, ఈ ఏడాది మే నెలలో జరిగిన ఎన్నికల్లో ఘనవిజయం సాధించారు. ఆస్ట్రేలియాకు రెండోసారి ప్రధానమంత్రిగా బాధ్యతలు స్వీకరించారు. ఆయన పాఠశాల స్థాయిలోనే లేబర్ పార్టీలో చేరారు. ఆ తర్వాత ఉన్నత చదువు కోసం సిడ్నీ యూనివర్సిటీలో చేరగా, అప్పటి నుంచి రాజకీయాల్లో చురుకుగా వ్యవహరిస్తూ వచ్చారు. అంచెలంచెలుగా ప్రధానమంత్రి స్థాయికి ఎదిగారు.

Read Also- Ponnam Prabhakar: హైదరాబాద్‌లో మౌలిక సదుపాయాల అభివృద్ధి సంక్షేమమే ప్రభుత్వ లక్ష్యం: మంత్రి పొన్నం ప్రభాకర్!