HMDA: ముగిసిన హెచ్ఎండీఏ ప్రీ బిడ్ మీటింగ్.. ప్లాట్ల వేలానికి భారీ స్పందన

HMDA: ఆదాయం సమకూర్చుకునేందుకు హైదరాబాద్ మెట్రోపాలిటన్ డెవలప్‌మెంట్ అథారిటీ (HMDA) కోకాపేట, మూసాపేట భూముల విక్రయానికి ఇటీవలే నోటిఫికేషన్ జారీ చేసిన సంగతి తెలిసిందే. ఈ నెల 24 నుంచి ఈ వేలం ప్రారంభించి, డిసెంబర్ 5 వరకు నిర్వహించనున్న హెచ్ఎండీఏ సోమవారం సిటీలో ప్రీ బిట్ సమావేశాన్ని నిర్వహించింది. ప్లాట్ల వారీగా వేలం పాట తేదీలను కూడా నోటిఫికేషన్‌లో పేర్కొంది. తొలిరోజు వేలంలో నియోపోలీస్ ప్లాట్ నెంబర్ 17తో వేలం ప్రక్రియను ప్రారంభించి చివరి తేదీ అయిన డిసెంబర్ 5న గోల్డ్ మెన్ లే అవుట్ లోని ప్లాట్ నెంబర్- 2 వేలంతో ప్రక్రియ ముగించనున్నట్లు వెల్లడించింది. కోకాపేట్‌లోని నియోపోలీస్ లేఅవుట్ లోని ఆరు ప్లాట్లు, గోల్డ్‌మైన్ లే అవుట్‌లోని ఒక ప్లాట్, మేడ్చల్ జిల్లాలోని మూసాపేట్‌లో రెండు ప్రాంతాల్లోని భూములకు ఈ-వేలం ద్వారా విక్రయించాలని నిర్ణయించారు. దీనికి సంబంధించిన నోటిఫికేషన్‌ను హెచ్ఎండీఏ సోమవారం జారీ చేసింది. ఈ-వేలం కార్యక్రమాన్ని ఎంఎస్ టీపీ సంస్థ ఆధ్వర్యంలో ఆన్‌లైన్ వేలాన్ని నిర్వహించనున్నట్లు హెచ్ఎండీఏ అధికారులు సమావేశంలో వెల్లడించారు. వేలం పాట నిర్వహించే తీరుతో పాటు వేలానికి సంబంధించిన నిబంధనలను అధికారులు వెల్లడించారు. ఈ సమావేశానికి వందకి పైగా డెవలపర్స్, పెట్టుబడిదారులు, సంస్థల ప్రతినిధులు, పలువురు అధికారులు హాజరయ్యారు.

ప్రారంభ ధర రూ.99 కోట్లు 

కోకాపేట్‌లోని నియోపోలీస్ లే అవుట్‌లో 6 ప్లాట్లకు ఈ -వేలం వేయనున్నారు. ఎకరాకు ప్రారంభ ధర రూ.99 కోట్లుగా నిర్ణయించారు. ఒక్కో ప్లాట్ 4 ఎకరాలకు పైగా ఉండడంతో ప్రారంభ ధరనే రూ.400 కోట్లకుపైగా నిర్ణయించారు. అయితే గతంలో ప్రారంభ ధర రూ. 36 కోట్లు నిర్ణయిస్తే డిమాండ్ భారీగా పెరిగి వేలంలో ఎకరాకు రూ.100.75 కోట్లు పలికింది. ఈసారి కూడా భారీగా పెరిగే అవకాశాలు ఉన్నాయని రియల్టర్లు, అధికారులు భావిస్తున్నారు. ఇదే కోకాపేట్‌లో గోల్డ్ మైన్ లే అవుట్‌లోని 1.98 ఎకరాల ప్లాట్ ప్రారంభ ధర ఎకరాకు రూ.70 కోట్లుగా నిర్ణయించారు. మేడ్చల్ -మల్కాజ్‌గిరి జిల్లాలోని మూసాపేట్ వై- జంక్షన్ సమీపంలో రెండు ప్రాంతాల్లో 16 ఎకరాల భూములను ఈ -వేలం ద్వారా విక్రయించాలని హెచ్ఎండీఏ నిర్ణయించింది. అయితే, ఎకరాకు ప్రారంభ ధరగా రూ.75 కోట్లుగా నిర్ణయించారు. మొత్తం 16 ఎకరాలకు గాను ప్రారంభ ధర ప్రకారం రూ.1200 కోట్లు అవుతుంది. వేలం ద్వారా రేటు మరింత పెరిగే, అధికారులు అంచనా వేసిన దాని కన్నా ఎక్కువ ఆదాయం సమకూరే అవకాశముందని అధికారులు వ్యాఖ్యానిస్తున్నారు.

Alao Read: NBK: బాలయ్య ఫ్యాన్స్ వర్సెస్ మాజీ సీపీ సీవీ ఆనంద్.. ముగిసిన వివాదం.. అసలేం జరిగిందంటే?

ప్లాట్ల వేలం షెడ్యూల్…
——————————————————————-
లేఅవుట్ ప్లాట్ల నెం. ఎకరాల్లో ఎకరాకు (రూ.కోట్లల్లో) ఈ-ఆక్షన్ తేదీ
——————————————————————-
నియోపోలీస్ 17 4.59 99 24నవంబర్
నియోపోలీస్ 18 5.31 99 24నవంబర్
నియోపోలీస్ 15 4.03 99 28నవంబర్
నియోపోలీస్ 16 5.03 99 28నవంబర్
నియోపోలీస్ 19 4 99 3డిసెంబర్
నియోపోలీస్ 20 4.04 99 3డిసెంబర్
గోల్డ్ మైన్ సైట్-2 1.98 70 5డిసెంబర్
———————————————————–

Also Read: Harish Rao: రైతుల ఆత్మహత్యలకు బాధ్యులెవరు..? ప్రభుత్వం పై హరీష్ రావు ఫైర్