Swetcha Effect: స్వేచ్ఛ ఎఫెక్ట్.. అంగన్‌వాడీ గుడ్ల అక్రమాలపై అధికారులు చర్యలు

Swetcha Effect:  అంగన్‌వాడీ కేంద్రాల నుంచి పేద పిల్లలకు అందించే పోషకాహారం అక్రమంగా బయటి మార్కెట్‌లో అమ్ముడుపోతున్న ఘటన మరోసారి హుజూరాబాద్‌ (Huzurabad) లో వెలుగులోకి వచ్చింది. ఒక వైన్ షాపు పర్మిట్ రూమ్‌లో పెద్ద మొత్తంలో అంగన్‌వాడీ గుడ్లు (Anganwadi Eggs) బయటపడటం కలకలం రేపింది. ఈ అంశంపై స్వేచ్ఛ వెబ్ సైట్ లో వచ్చిన కథనానికి అధికారులు స్పందించి, బాధ్యులపై కఠిన చర్యలు తీసుకునేందుకు సిద్ధమయ్యారు.

ఘటన వివరాలు:

స్థానికుల ఇచ్చిన సమాచారం మేరకు, హుజూరాబాద్‌ (Huzurabad) లోని రేణుక ఎల్లమ్మ వైన్స్ షాపు పర్మిట్ రూమ్‌లో అంగన్‌వాడీ గుడ్లు ఉన్నాయని జిల్లా సంక్షేమ అధికారిణి సరస్వతికి తెలిసింది. ఆమె వెంటనే అక్కడకు చేరుకున్నారు. అయితే, వైన్ షాపు పర్మిట్ రూమ్ తాళం వేసి ఉండటంతో, ఆమె యజమాని వెంకటేశ్వర్లును పిలిపించి వెంటనే తాళం తీయించాలని ఆదేశించారు. అధికారులు వచ్చేలోపే గదిలోని గుడ్లను మాయం చేసినట్లు గుర్తించారు.

 Also Read: Huzurabad: అంగన్‌వాడీ గుడ్లతో.. మందుబాబులకు స్నాక్స్.. వామ్మో ఇలా ఉన్నారేంట్రా!

​నిందితుల వాంగ్మూలం:

​అధికారులు వెంటనే రంగాపూర్ అంగన్‌వాడీ ( (Anganwadi) కేంద్రానికి వెళ్లి విచారణ చేపట్టారు. ఈ విచారణలో, అంగన్‌వాడీ టీచర్ రాజమ్మ భర్త చంద్రయ్య ఆ గుడ్లను వైన్ షాపు యజమానికి అమ్మినట్లు అంగీకరించారు. టీచర్ రాజమ్మ కూడా తన భర్త తనకు తెలియకుండా రెండు ట్రేల గుడ్లను అమ్మినట్లు తెలిపారు. దీనిపై వైన్ షాపు యజమాని వెంకటేశ్వర్లు స్పందిస్తూ, ఆ గుడ్లను రంగాపూర్ టీచర్ తన పిల్లలకు పోషకాహారంగా ఇచ్చారని, అయితే శ్రావణమాసం సందర్భంగా పిల్లలు వాటిని తినలేదని, అందుకే వాటిని తమ వైన్ షాపు పర్మిట్ రూమ్‌లో దాచిపెట్టామని, తమ కుటుంబం తినడానికే వాటిని తెచ్చుకున్నామని వివరించారు.

అధికారుల కఠిన చర్యలు:

ఈ ఘటనపై జిల్లా సంక్షేమ అధికారిణి సరస్వతి తీవ్రంగా స్పందించారు. అంగన్‌వాడీ కేంద్రాల ద్వారా పంపిణీ చేసే పోషకాహారాన్ని ఇలా అక్రమంగా విక్రయించడం దారుణమని ఆమె పేర్కొన్నారు. సూపర్వైజర్ల పర్యవేక్షణ లోపం వల్లే ఇలాంటి ఘటనలు జరుగుతున్నాయని ఆగ్రహం వ్యక్తం చేశారు. బాధ్యులైన వారిపై కఠిన చర్యలు తీసుకుంటామని హెచ్చరించారు.

​సస్పెన్షన్, కేసుల నమోదు:

​ఈ అక్రమానికి బాధ్యులైన వారిపై వెంటనే చర్యలు తీసుకోవాలని సరస్వతి సీడీపీఓ సుగుణను ఆదేశించారు. సూపర్వైజర్ శిరీష, అంగన్‌వాడీ టీచర్ రాజమ్మలను సస్పెండ్ చేయాలని, టీచర్ భర్త చంద్రయ్యపై కేసు నమోదు చేయాలని కలెక్టర్‌కు సిఫార్సు చేస్తామని సీడీపీఓ సుగుణ పేర్కొన్నారు. భవిష్యత్తులో ఇలాంటి నేరాలకు పాల్పడేవారిపై కఠిన చర్యలు తీసుకుంటామని, ఇది ఇతరులకు హెచ్చరికగా ఉంటుందని ఆమె స్పష్టం చేశారు.
​ఈ విచారణకు సంబంధించిన పూర్తి నివేదికను ఉన్నతాధికారులకు, జిల్లా కలెక్టర్‌కు సమర్పించి తదుపరి చర్యలు తీసుకుంటామని తెలిపారు. ఈ విచారణలో ఎక్సైజ్ ఎస్ఐ వినోద్ కుమార్, అంగన్‌వాడీ మండల అధ్యక్షురాలు కూడా పాల్గొన్నారు.

 Also Read: Anganwadi Salary Hike: అంగన్వాడీలకు కనీస వేతనం రూ. 18000 ఇవ్వాలి.. మంత్రి సీతక్కకు విజ్ఞప్తి