Kolipaka Srinivas: చెక్ డ్యామ్ ధ్వంసంపై కాంగ్రెస్ వైఖరి దారుణం : కొలిపాక శ్రీనివాస్ ఫైర్!

Kolipaka Srinivas: హుజురాబాద్ నియోజకవర్గంలో ఇటీవల జరిగిన చెక్ డ్యామ్ ధ్వంసం ఘటనపై రాజకీయాలు మరింత వేడెక్కాయి. ప్రజల ప్రయోజనాల కోసం నిర్మించిన ఈ కట్టడాన్ని కూల్చివేయడాన్ని ఖండించిన బీఆర్‌ఎస్ నాయకులు, ఈ విధ్వంసానికి కాంగ్రెస్ బహిరంగ మద్దతు పలకడం అత్యంత దారుణమని ఆరోపించారు. ఈ అంశంపై బీఆర్‌ఎస్ పట్టణ అధ్యక్షుడు కొలిపాక శ్రీనివాస్ ఎమ్మెల్యే క్యాంపు కార్యాలయంలో విలేకరుల సమావేశం నిర్వహించారు.

రైతులకు ఎంతగానో మేలు చేస్తాం

ఈ సందర్భంగా శ్రీనివాస్ మాట్లాడుతూ.. చెక్ డ్యామ్‌లు భూగర్భ జలాలు పెంచడానికి రైతులకు ఎంతగానో మేలు చేస్తాయని గుర్తు చేశారు. కేవలం ఇసుక తవ్వకాల మాఫియా ప్రయోజనాల కోసం ప్రజల సొమ్ముతో నిర్మించిన కట్టడాన్ని కూల్చివేయడం అత్యంత దారుణమన్నారు. ఇంతటి ప్రజా వ్యతిరేక చర్యకు అధికారంలో ఉన్న కాంగ్రెస్ మద్దతు పలకడం ఇసుక మాఫియాతో వారికి ఉన్న అక్రమ సంబంధాలను స్పష్టం చేస్తోందని ఆయన విమర్శించారు.

Also Read: Srinivas Goud: ప్రజల్లో కాంగ్రెస్ ప్రభుత్వ తీరును ఎండగడతాం : మాజీ మంత్రి శ్రీనివాస్ గౌడ్

చట్టపరమైన కఠిన చర్యలు తీసుకోవాలి

ధ్వంసానికి పాల్పడిన వారిని సమర్థించడం బాధాకరం అన్నారు. ఈ విధ్వంసం వెనుక ఉన్న శక్తులను, వారికి మద్దతిస్తున్న నాయకులను ప్రజలు గమనిస్తున్నారని, వారికి తగిన బుద్ధి చెబుతారని శ్రీనివాస్ హెచ్చరించారు. తక్షణమే రాష్ట్ర ప్రభుత్వం ఈ విధ్వంసానికి పాల్పడిన వారిపై చట్టపరమైన కఠిన చర్యలు తీసుకోవాలని, దోషులను అరెస్ట్ చేసి, చెక్ డ్యామ్ పునర్నిర్మాణానికి చర్యలు తీసుకోవాలని ఆయన డిమాండ్ చేశారు. ఈ సమావేశంలో బీఆర్‌ఎస్ నాయకులు తాళ్లపల్లి శ్రీనివాస్ గౌడ్, ముక్క రమేష్, పంజాల కుమారస్వామి, ఎండి ఇమ్రాన్, మొలుగు శ్రీనివాస్ తదితరులు పాల్గొన్నారు.

Also Read: Aghori Srinivas: అఘోరి కొత్త లుక్ చూసి నెటిజన్లు షాక్ .. “ ఏం ట్రాన్స్‌ఫార్మేషన్ రా బాబోయ్!”