Nalgonda News: విచిత్ర పొత్తులతో జోరందుకున్న విలేజ్ పాలిటిక్స్.. పదవులకై వేట

Nalgonda News: గ్రామ పంచాయతీలు, వార్డుల ఎన్నికల వేళ దేశ, రాష్ట్ర రాజకీయాలకు భిన్నంగా విలేజ్ పాలిటిక్స్ జరుగుతున్నాయి. గ్రామాల్లో విచిత్ర పొత్తులు కుదుర్చుకోవడంతో రాజకీయాలు జోరుగా సాగుతున్నాయి. ఆశావహులు కలిసి వచ్చే పార్టీల మద్దతును తీసుకుంటూ పోటీలకు సిద్ధమయ్యారు.

వింత కూటములతో..

ఇప్పటికే మొదటి దశ ఎన్నికల్లో గ్రామాల్లో బలంగా ఉన్న పార్టీ మద్దతుదారులను ఓడించేందుకు మిగిలిన పార్టీల నుంచి అభ్యర్థులను నిర్ణయించి నామినేషన్లను దాఖలు చేయగా… ప్రస్తుతం రెండవ దశ ఎన్నికల్లోనూ అదే ట్రెండ్ కొనసాగనున్నట్లు తెలుస్తుంది. నల్గొండ జిల్లాలోని పలు గ్రామ పంచాయతీలు, వార్డులలో కాంగ్రెస్(Congress), బీఆర్‌ఎస్(BRS), బీజేపీ(BJP), సీపీఎం(CPM) పార్టీలు తమ బలబలాలను బట్టి పొత్తులను పెట్టుకోవడం రాజకీయ వర్గాల్లో ఆసక్తికర చర్చగా మారింది. ఉదాహరణకు, మిర్యాలగూడ(Miryalaguda) డివిజన్‌లోని ఓ గ్రామ పంచాయతీ అభ్యర్థిపై టీడీపీ(TDP), కాంగ్రెస్, బీజేపీ పార్టీల నుంచి ఉమ్మడిగా అభ్యర్థిని బరిలోకి దించేందుకు డిసైడ్ అయినట్లు తెలుస్తుంది. అదేవిధంగా, నకిరేకల్(Nakirekal) మండలం కడపర్తిలో మొదటి వార్డు నుంచి సీపీఎం అభ్యర్థికి కాంగ్రెస్ మద్దతు, సర్పంచ్ స్థానానికి కాంగ్రెస్ అభ్యర్థికి సీపీఎం మద్దతు ఇస్తున్న విషయంపై రాజకీయ రగడ చోటు చేసుకోగా, స్థానిక నేతలు సర్దుబాటు చేసే ప్రయత్నం చేస్తున్నారు. ఆయా గ్రామ పంచాయతీలకు, వార్డులకు స్థానిక రాజకీయ పరిస్థితులకు అనుగుణంగా ఈ పొత్తులు కుదుర్చుకుంటున్నారు.

Also Read: Bath Machine: స్నానం చేయించే మిషన్ కూడా వచ్చేసింది.. ధర ఎంతో తెలిస్తే మైండ్ బ్లాక్ అవ్వాల్సిందే!

తెర వెనుక రాజకీయాలు..

గ్రామ పంచాయతీలతో పాటు వార్డులకు ప్రస్తుత అధికార కాంగ్రెస్ పార్టీ నుంచి ఇద్దరి నుంచి ముగ్గురుకు పైగా ఆశావహులు స్థానిక ఎన్నికల్లో నిలిచేందుకు పోటీ పడుతుండగా… అధికార పార్టీలో బలహీన అభ్యర్థులే బరిలో ఉండే విధంగా బీఆర్‌ఎస్ అభ్యర్థులు చేస్తున్న తెర వెనుక రాజకీయాలు చర్చనీయాంశంగా మారాయి. మొత్తానికి ఆశావహులు పోటీకి సిద్ధమవుతున్న తీరు గ్రామ రాజకీయాల్లో హీట్‌ను పెంచుతున్నాయి.

నేటి నుంచి రెండవ దశ..

నల్గొండ జిల్లాలో మొదటి దశ ఎన్నికలకు నామినేషన్ దాఖలు ప్రక్రియ పూర్తయింది. అయితే, జిల్లాలోని రెండవ దశ ఎన్నికలలో భాగంగా మిర్యాలగూడ రెవెన్యూ డివిజన్‌లోని 10 మండలాలు, 282 జీపీలకు నామినేషన్ల ప్రక్రియ ఈ నెల 30న ప్రారంభం కానుంది. ఇదే డివిజన్ పరిధిలో ఇప్పటికే ఓ గ్రామ పంచాయతీ అభ్యర్థిని ఏకగ్రీవంగా ఎన్నుకోనున్నట్లు ఆ గ్రామ ప్రజలు చెబుతుండగా, ఏకగ్రీవ ఎన్నికల మార్గదర్శకాలను పాటించారా లేదా అనే అంశాన్ని పరిశీలించిన అనంతరమే ఏకగ్రీవ ఎన్నికను అధికారికంగా ప్రకటిస్తారు. ఏకగ్రీవాలకు ఆశావహుల ప్రయత్నాలు, విచిత్ర పొత్తులతో ఆయా పార్టీ మద్దతుదారులు బరిలో నిలిచి గెలిచేందుకు చేస్తున్న హడావిడితో గ్రామ పంచాయతీ ఎన్నికలు ఆసక్తికరంగా మారాయి.

Also Read: Kurnool Crime: క్షుద్ర పూజలతో భయపెట్టి.. ఏకంగా రూ.3 కోట్లు దోచేసిన బురిడి బాబా.. వీడు జగత్ కంత్రీ!