Epaper 
Maoists Letter: ఆపరేషన్ కగార్ చేపట్టి మావోయిస్టులపై కేంద్రం ఉక్కుపాదం మోపుతున్న సంగతి తెలిసిందే. అడవుల్లో జల్లెడ పట్టి మరి మావోయిస్టులను భద్రతా బలగాలు ఏరివేస్తున్నాయి. ఈ క్రమంలోనే మావో అగ్రనేత హిడ్మా సైతం ఎన్ కౌంటర్ లో ప్రాణాలు కోల్పోవడం, పలువురు కేంద్ర కమిటీ సభ్యులు లొంగిపోవడం.. మావోయిస్టు పార్టీని మరింత బలహీనం చేసింది. దీంతో పెద్ద ఎత్తున నక్సలైట్లు లొంగిపోయేందుకు ముందుకు వస్తున్నారు. ఇటీవల తెలంగాణ డీజీపీ ఆధ్వర్యంలో ఏకంగా 37 మంది నక్సలైట్లు జనజీవన స్రవంతిలో కలిశారు. మరోవైపు అడవుల్లో కేంద్ర బలగాలు కూంబింగ్ ఇంకా కొనసాగుతున్న నేపథ్యంలో మావోయిస్టు పార్టీ సంచలన ప్రకటన చేసింది.
‘మేమంతా లొంగిపోతాం’
మహారాష్ట్ర – మధ్యప్రదేశ్ – ఛత్తీస్ గఢ్ (MMC) జోన్ ప్రతినిధి అనంత్ పేరుతో మావోయిస్టు పార్టీ నుంచి తాజాగా ఒక ప్రకటన విడుదలైంది. జనవరి 1న అందరం కలిసి లొంగిపోతామని అందులో పేర్కొన్నారు. ఒక్కొక్కరిగా కాకుండా అందరం ఒకేసారి జన జీవన స్రవంతిలో కలిసిపోతామని లేఖలో మావోయిస్టులు తెలిపారు. మావోయిస్టు అగ్రనేతలు మల్లోజుల, ఆశన్న లొంగుబాటుతో పాటు హిడ్మా ఎన్ కౌంటర్ తో పార్టీ బలహీనమైనట్లు స్పష్టం చేశారు. మావోయిస్టులు అంతా లొంగిపోవాలని ఇటీవల కేంద్రం పిలుపునిచ్చిన నేపథ్యంలో తాము ఈ నిర్ణయానికి వచ్చినట్లు పార్టీ స్పష్టం చేసింది.
సహకరించే రాష్ట్రంలోనే..
అయితే తమకు సహకరించే రాష్ట్రంలో లొంగిపోవడానికి తాము సిద్ధంగా ఉన్నామని మావోయిస్టు పార్టీ తాజా ప్రకటనలో స్పష్టం చేసింది. అందరం లొంగిపోయేందుకు కొంత సమయం ఇవ్వాలని సూచించింది. ఈ నేపథ్యంలో మహారాష్ట్ర, మధ్యప్రదేశ్, ఛత్తీస్ గఢ్ ప్రభుత్వాలు కాస్త సంయమనం పాటించాలని విజ్ఞప్తి చేసింది. 2026 జనవరి 1న సాయుధ పోరాటాన్ని విరమించి.. ఆయుధాలు అప్పగించేస్తామని పునురుద్ఘటించింది. ప్రభుత్వం కల్పించే పునరాసాన్ని అంగీకరించేందుకు తామంతా సిద్ధంగా ఉన్నట్లు మావోయిస్టు పార్టీ లేఖలో వివరించింది. దీనిపై కేంద్ర, రాష్ట్ర ప్రభుత్వాలు ఏవిధంగా స్పందిస్తాయో తెలియాల్సి ఉంది.
Also Read: Nallamala Sagar Link Project: ఆగని ఏపీ కుట్రలు.. తెలంగాణకు అన్యాయం చేసేలా అడుగులు..?
11 నెలల్లో 465 మంది లొంగుబాటు
బుధవారం (నవంబర్ 26) రోజున కూడా ఛత్తీస్ గఢ్ లో పెద్ద ఎత్తున మావోయిస్టులు లొంగిపోయారు. బీజాపూర్ జిల్లా ఎస్పీ జితేందర్ యాదవ్ సమక్షంలో 41 మంది జనజీవన స్రవంతిలో కలిసిపోయారు. వీరిందరిపై రూ.1.19 కోట్ల రివార్డు ఉన్నట్లు ఎస్పీ ప్రకటించారు. ఇటీవల తెలంగాణ డీజీపీ సమక్షంలోనూ 37 మంది లొంగిపోయారు. వారిలో తెలంగాణ రాష్ట్ర కమిటీ సభ్యుడిగా ఉన్న ఆజాద్ కూడా ఉన్నారు. కాగా గత 11 నెలల్లో 465 మంది మావోయిస్టులు లొంగిపోయారని.. వారిలో 59 మంది తెలంగాణకు చెందినవారని డీజీపీ ఆ సందర్భంగా వెల్లడించారు.
