Karnataka CM Race: కర్ణాటకలో రసవత్తరంగా ‘సీఎం పదవి’ రేస్.. సిద్ధూ వర్గ నేతతో డీకే భేటీ.. వేగంగా మారిపోతున్న రాజకీయాలు!

Karnataka CM Race: కర్ణాటకలో కాంగ్రెస్ (Congresss) ప్రభుత్వం కొలువుదీరి నవంబర్ 20 నాటికి రెండున్నర సంవత్సరాలు పూర్తయ్యింది. దీంతో, ఆ రాష్ట్ర కాంగ్రెస్ పార్టీలో ముఖ్యమంత్రి మార్పు వ్యవహారం (Karnataka CM Race) కేంద్రంగా రాజకీయాలు రంజుగా మారాయి. సీఎం సిద్ధరామయ్య-డిప్యూటీ సీఎం డీకే శివకుమార్ మధ్య ఆధిపత్య పోరు పతాక స్థాయికి చేరుకున్నట్టుగా తాజా పరిస్థితులు కనిపిస్తున్నాయి. సిద్ధరామయ్యకు (Siddaramaiah) అత్యంత నమ్మకస్తుడు, ముఖ్య అనుచరుడిగా పేరున్న హస్తం పార్టీ సీనియర్ నేత, మంత్రి సతీష్ జార్కిహోళితో బుధవారం అర్ధరాత్రి డీకే శివకుమార్ (DK Shiva Kumar) భేటీ కావడం‌తో ఒక్కసారిగా అక్కడి రాజకీయాలు వేడెక్కాయి. భేటీ వివరాలు బయటకు వెల్లడించకపోయినా, తనకు మద్దతు ఇవ్వాలంటూ డీకే శివకుమార్ కోరినట్టుగా కథనాలు వెలువడుతున్నాయి.

మరోవైపు, డీకే శివకుమార్ వర్గ ఎమ్మెల్యేలు, మద్దతురాలు ఇప్పటికే ఢిల్లీ వెళ్లి, కాంగ్రెస్ అధిష్ఠానం వద్ద ‘సీఎం మార్పు’ ప్రయత్నాలు మొదలుపెట్టేశారు. 2023 అసెంబ్లీ ఎన్నికల తర్వాత, సీఎం పదవిపై రెండున్నర సంవత్సరాల ఫార్ములాపై ఒప్పందం కుదిరిందని డీకే వర్గం బలంగా నమ్ముతోంది. ఈ ఒప్పంద గడువు ముగిసిపోవడంతో, శివకుమార్‌కు పట్టం కట్టాలంటూ హైకమాండ్‌పై ఒత్తిడి తెస్తున్నారు. అయితే, అలాంటి ఒప్పందమేమీ లేదని సీఎం సిద్ధరామయ్యతో పాటు ఆయన అనుచరులు చెబుతున్నారు. తానే ఐదేళ్లూ ముఖ్యమంత్రిగా కొనసాగుతానంటూ సిద్ధూ ఇప్పటికే చాలాసార్లు అన్నారు. సీఎం పీఠం ఖాళీగా లేదని ఆయన పదేపదే చెబుతున్నారు. అయితే, అధిష్ఠానం ఏ నిర్ణయం తీసుకున్నా తాను కట్టుబడి ఉంటానంటూ ‘సీఎం మార్పు’ ఊహాగానాల తీవ్రతను చెప్పకనే చెబుతున్నారు. ఈ క్రమంలో సిద్ధూ వర్గ ఎమ్మెల్యేలు సైతం ఢిల్లీ వెళ్లి తమ వాదన వినిపించారు.

Read Also- Aadhaar Deactivation: 2 కోట్లకు పైగా మృతుల ఆధార్ నంబర్లు డీయాక్టివేట్.. ఇవి వేరేవారికి కేటాయిస్తారా?

మార్పు అనివార్యమైతే.. సిద్దూ వర్గం ప్లాన్స్ ఇవే

డిప్యూటీ సీఎం డీకే శివకుమార్‌ని ముఖ్యమంత్రి పీఠంపై కూర్చొబెడతారని, ఈ దిశగా ముఖ్యమంత్రి మార్పుపై చిన్న సంకేతం వెలువడినా, వ్యూహాత్మకంగా వ్యవహరించాలని సీఎం సిద్దరామయ్య వర్గం భావిస్తోంది. ఈ మేరకు ఇప్పటికే ఒక ప్రణాళికను సిద్ధం చేసుకుందని విశ్వసనీయ వర్గాలు చెబుతున్నాయి. ముఖ్యమంత్రిని మార్చాలని అధిష్ఠానం పట్టుబడితే, ప్రత్యామ్నాయ అభ్యర్థుల జాబితాను సమర్పిస్తుందని సిద్ధూ వర్గం నేతలు చెబుతున్నారు. ఈ వ్యూహాన్ని సిద్ధరామయ్యకు విధేయుడైన మంత్రి సతీష్‌ నేతృత్వంలో జరిగిన సమావేశంలో ఖరారు చేసినట్టుగా తెలుస్తోంది. డీకేకి ప్రత్యామ్నాయంగా ఇతర సీనియర్ నేతల పేర్లను సామాజిక వర్గాల వారీగా తెరపైకి తీసుకొచ్చి, వారికి మద్దతుగా నిలవాలని భావిస్తున్నట్టు తెలుస్తోంది.

Read Also- Andhra King Taluka: రామ్ పోతినేని ‘ఆంధ్ర కింగ్’ అయ్యాడో లేదో తెలియాలంటే.. ఈ రివ్యూలో తెలుసుకోండి మరి..

హైకమాండ్‌ ఎంట్రీ

‘ముఖ్యమంత్రి మార్పు’ వ్యవహారం పతాక స్థాయికి చేరడం, పార్టీ నేతలు బహిరంగంగా వ్యాఖ్యలు చేస్తున్న నేపథ్యంలో కాంగ్రెస్ జాతీయ అధ్యక్షుడు మల్లికార్జున ఖర్గే రంగప్రవేశం చేశారు. సీఎం పదవి విషయమై పార్టీలో గందరగోళం నెలకొందని అంగీకరించారు. ఈ సమస్యను పరిష్కరించేందుకు తాను, సోనియా గాంధీ, రాహుల్ గాంధీ కలిసి కూర్చుని నిర్ణయం తీసుకుంటామని క్లారిటీ ఇచ్చారు. అవసరమైనప్పుడు మెడిసిన్ ఇస్తామని వ్యాఖ్యానించారు. దీనిని త్వరలోనే ఒక స్పష్టత వచ్చే అవకాశం ఉందన్నట్టుగా ఖర్గే సంకేతాలిచ్చారు. ఖర్గే వ్యాఖ్యల బట్టి చూస్తే, అంతర్గత విభేదాలు పార్టీ ప్రతిష్టను దెబ్బతీస్తున్నాయని అధిష్ఠానం గుర్తించింది. ఈ సమస్యకు ముగింపు పలకడానికి హైకమాండ్ త్వరలోనే తుది నిర్ణయం తీసుకునే అవకాశం కనిపిస్తోంది. 2023 ఎన్నికల తర్వాత సీఎం ఎంపికలో కీలక పాత్ర పోషించిన రాహుల్ గాంధీ, ఇప్పుడు కూడా పరిణామాల్లో కూడా కీలకం అవుతారనే అంచనాలు నెలకొన్నాయి.

మొత్తానికి మల్లికార్జున ఖర్గే, రాహుల్ గాంధీ గురువారం, లేదా శుక్రవారం భేటీ అయ్యి ఈ సమస్యకు ముగింపు పలుకుతారని పార్టీ వర్గాలు భావిస్తున్నారు. ఖర్గే-రాహుల్ భేటీ తర్వాత సిద్ధరామయ్య, డీకే శివకుమార్‌లను ఢిల్లీకి పిలిపించుకొని మాట్లాడే అవకాశం ఉందని చెబుతున్నారు. ఏదేమైనా మరో రెండు మూడు రోజుల్లో కర్ణాటక సీఎం పీఠంపై క్లారిటీ వచ్చే అవకాశం ఉంది.