Epaper 
Delhi Red Fort Blast: ఢిల్లీ రెడ్‌ఫోర్ట్‌ పేలుడు కేసులో కీలక మలుపు తిరిగింది. భయంకర ఘటన వెనుక ఉన్న ప్రధాన నిందితుడిగా డాక్టర్ ఉమర్ మొహమ్మద్‌ని పోలీసులు గుర్తించారు. ఆయనే పేలుడు పదార్థాలతో నిండిన కారు నడిపిన ఆత్మాహుతి దాడిదారుగా దర్యాప్తు సంస్థలు నిర్ధారించాయి.
సోమవారం సాయంత్రం రెడ్‌ఫోర్ట్‌ సమీపంలోని సుబాష్ మార్గ్ ట్రాఫిక్ సిగ్నల్ వద్ద జరిగిన ఈ పేలుడు దేశాన్ని దిగ్భ్రాంతికి గురి చేసింది. తెలుపు రంగు హ్యుందాయ్ i20 కారులో భారీ స్థాయిలో పేలుడు పదార్థాలు నింపినట్లు అధికారులు తెలిపారు. ఈ కారు ఒక్కసారిగా శక్తివంతమైన పేలుడుతో ధ్వంసమై, మొత్తం తొమ్మిది మంది ప్రాణాలు కోల్పోయారు, మరికొందరు తీవ్రంగా గాయపడ్డారు.
దర్యాప్తు సంస్థలు తాజాగా నిందితుడి తొలి ఫోటోను స్వాధీనం చేసుకున్నాయి. ఆ ఫోటోలో డాక్టర్ ఉమర్ మొహమ్మద్ అని గుర్తించబడిన వ్యక్తి కనిపిస్తున్నట్లు సమాచారం. ఆయనే పేలుడు జరిగిన హ్యుందాయ్ i20 యజమాని అని అధికారులు నిర్ధారించారు. సూక్ష్మంగా పరిశీలిస్తున్న ఫోరెన్సిక్‌ బృందాలు కారు అవశేషాలు, సీసీటీవీ ఫుటేజ్‌, కాల్‌ రికార్డుల ఆధారంగా కీలక ఆధారాలు సేకరిస్తున్నాయి. భద్రతా సంస్థలు ఈ ఘటన వెనుక ఉన్న నెట్‌వర్క్‌ అంతా గుర్తించేందుకు విస్తృత ఆపరేషన్‌ ప్రారంభించాయి. పోలీసులు ఇప్పటివరకు ఇది ప్రణాళికాబద్ధమైన ఆత్మాహుతి దాడి అని భావిస్తున్నారు. ఎర్ర కోట వద్ద జరిగిన పేలుడు కేసు దేశవ్యాప్తంగా కలకలం రేపింది.
