Epaper 
VC Sajjanar: ఐ బొమ్మ నిర్వాహకుడు రవిని అరెస్ట్ చేసిన నేపథ్యంలో హైదరాబాద్ కమిషనర్ వీసీ సజ్జనార్ టాలీవుడ్ అగ్ర నటులు, దర్శకులు, నిర్మాతలను పక్కన కూర్చోబెట్టుకుని మీడియా సమావేశంలో మాట్లాడడంపై సోషల్ మీడియాలో జోరుగా చర్చ జరుగుతున్నది. ఇలా చేయడం ద్వారా కమిషనర్ ఏం చెప్పాలనుకున్నారన్నది అర్థం కావడం లేదని పలువురు వ్యాఖ్యానిస్తున్నారు. తన ఇమేజ్‌ను పెంచుకునే యత్నంలో వారిని కాన్ఫరెన్స్‌లో కూర్చోబెట్టి హైదరాబాద్ సిటీ పోలీస్ ఇమేజ్‌ను డ్యామేజ్ చేశారంటున్నారు. వీఐపీల కోసమేనా హైదరాబాద్ పోలీస్ అని అడుగుతున్నారు. సామాన్య బాధితులను ఎప్పుడైనా ఇలా కూర్చోబెట్టుకుని మీడియా కాన్ఫరెన్స్ జరిపారా అని ట్రోల్ చేస్తున్నారు. ఈ ఒక్క కేసులోనే వాళ్లను ఎందుకు కూర్చోబెట్టుకోవాల్సి వచ్చింది? అదికూడా రవిని పట్టుకోవటంలో కీలకపాత్ర వహించిన అధికారులను వెనుక ఉంచి అని ప్రశ్నిస్తున్నారు.
ప్రెస్ మీట్‌లో వాళ్లు ఎందుకు?
ఇలా సినిమా రిలీజ్ కాగానే అలా పైరసీ చేసి ఐ బొమ్మ, బప్పం తదితర వెబ్ సైట్లలో అప్ లోడ్ చేస్తూ వచ్చిన రవి టాలీవుడ్ పరిశ్రమకు 3వేల కోట్ల రూపాయల మేర నష్టం కలిగించాడు. దీనిపై తెలుగు ఫిలిం ఛాంబర్ యాంటీ పైరసీ సెల్ కొంతకాలం క్రితం పోలీసులకు ఫిర్యాదు చేసింది. దీనిపై కేసులు నమోదు చేసిన సైబర్ క్రైం పోలీసులు మొదట ఇద్దరు నిందితులను అరెస్ట్ చేశారు. అప్పుడే రవి దమ్ముంటే తనను పట్టుకోవాలని సవాల్ విసిరాడు. దీనిని ఛాలెంజ్‌గా తీసుకున్న పోలీసులు ఇటీవల రవిని కూకట్‌పల్లిలోని అతని ఫ్లాట్‌లో పట్టుకున్నారు. ఇంతవరకు బాగానే ఉంది. అయితే, రవిని అరెస్ట్ చేసిన నేపథ్యంలో ఏర్పాటు చేసిన మీడియా సమావేశంలో హీరోలు, దర్శకులు, నిర్మాతలను పక్కన కూర్చోబెట్టుకుని కమిషనర్ సజ్జనార్ వివరాలు వెల్లడించడం, వారితో కూడా మాట్లాడించడంపై భిన్నాభిప్రాయాలు వ్యక్తమవుతున్నాయి.
సజ్జనార్‌కు ఇవేం తెలియవా?
మీడియా సమావేశంలో పాల్గొన్న నిర్మాత సురేశ్ బాబుపై దక్కన్ కిచెన్ హోటల్ కూల్చివేతకు సంబంధించి నాంపల్లి కోర్టులో కేసు నడుస్తున్నది. ఇదే కేసులో వెంకటేశ్, రానా, అభిరామ్‌లు కూడా నిందితులుగా ఉన్నారు. ఇక, నాగార్జునకు చెందిన ఎన్ కన్వెన్షన్ సెంటర్‌ను తమ్మిడికుంట చెరువును ఆక్రమించి కట్టారని హైడ్రా కూల్చివేసింది. అయితే, తాను కొన్నది చెరువుకు సంబంధించిన స్థలమన్న విషయం తెలియదని గతంలో నాగార్జున చెప్పారు. దానిని తిరిగి ఇచ్చి వేస్తున్నట్టు ప్రకటించారు. విధుల నిర్వహణలో ముక్కుసూటి అధికారిగా పేరు తెచ్చుకున్న కమిషనర్ సజ్జనార్‌కు ఈ విషయాలు తెలియవా అని పలువురు ప్రశ్నిస్తున్నారు. నిజానికి పైరసీ వల్ల నష్టపోయిన సినిమాల నిర్మాతలను పిలిపించి వారి అభిప్రాయాలు చెప్పించినా సమంజసంగా ఉండేదంటున్నారు. అలా కాకుండా సినీ పరిశ్రమలో ఆధిపత్యం నడిపిస్తున్న వారిని పిలిపించి ఎందుకు వారితో మాట్లాడించాల్సి వచ్చిందని వ్యాఖ్యానిస్తున్నారు. సొంత ఇమేజ్ పెంచుకునే ఉద్దేశంతోనే సజ్జనార్ ఇలా వ్యవహరించారా అని సోషల్ మీడియాలో తెగ మాట్లాడుకుంటున్నారు.
Also Read: VC Sajjanar: పండగకు ఊరెళ్తున్నారా.. తస్మాత్‌ జాగ్రత్త..హైదరాబాద్ సీపీ సజ్జనార్ కీలక సూచనలు
