VC Sajjanar: పండగకు ఊరెళ్తున్నారా.. తస్మాత్‌ జాగ్రత్త..హైదరాబాద్ సీపీ సజ్జనార్ కీలక సూచనలు

VC Sajjanar: పండుగ వేళ తస్మాత్ జాగ్రత్త అంటూ హైదరాబాద్ పోలీస్ కమిషనర్ వీ.సీ.సజ్జనార్​ హెచ్చరించారు. దీపావళిని పురస్కరించుకుని సైబర్ క్రిమినల్స్ వేర్వేరు రకాలుగా ఉచ్ఛు విసురుతూ డబ్బు కొల్లగొట్టే ప్రమాదముందని చెప్పారు. దీనిని దృష్టిలో పెట్టుకుని మరింత జాగ్రత్తలు తీసుకోవాలని సూచించారు. దివ్వెల పండుగ దీపావళిని ప్రజలు ఆనందంగా జరుపుకొనే విషయం తెలిసిందే. ఈ పండుగ సమయంలో వేర్వేరు వాణిజ్య సంస్థలు తమ ఉత్పత్తుల అమ్మకాలను పెంచుకోవటానికి రకరకాల డిస్కౌంట్లు ప్రకటిస్తాయి. ఆఫర్లు ఇస్తాయి. సరిగ్గా దీనినే సైబర్ నేరగాళ్లు ప్రస్తుతం అవకాశంగా మలుచుకుంటున్నారు. నకిలీ ఈ కామర్స్​ సైట్ లను సృష్టించి వాటి ద్వారా భారీ తగ్గింపుల పేర వల విసురుతూ జనాన్ని టార్గెట్ చేస్తున్నారు. మరికొందరు క్రిమినల్స్ ఏపీకే ఫైళ్లను పంపించి వాటిని డౌన్​ లోడ్​ ఇన్​ స్టాల్ చేయించటం ద్వారా అవతలి వారి ఫోన్లను హ్యాక్ చేస్తూ ఖాతాలు ఊడ్చేస్తున్నారు. ఇంకొందరు ఫిషింగ్​ లింకులు పంపిస్తూ జనం కష్టార్జితాన్ని కొల్లగొడుతున్నారు.

Also Read: VC Sajjanar: కొంతమంది అలా డ్రైవింగ్ చేస్తున్నారు.. ఊరుకోబోం.. హైదరాబాదీలకు సజ్జనార్ వార్నింగ్

లక్కీ డ్రాల పేర అందినకాడికి లూటీ

ముఖ్యంగా ఎలక్ట్రానిక్​ గ్యాడ్జెట్లు, గిఫ్ట్ హ్యాంపర్ల పేర మోసాలు చేస్తున్నారు. లక్కీ డ్రాల పేర అందినకాడికి లూటీ చేస్తున్నారు. ఈ మోసాల కోసం సోషల్ మీడియా ప్లాట్ ఫాంలను ఉపయోగించుకుంటున్నారు. ఇలాగే సికింద్రాబాద్ కు చెందిన ఓ యువతికి ఫోన్ చేసిన సైబర్​ క్రిమినల్స్ తమను తాము ఫ్యాషర్​ షాపింగ్ సైట్ ఎగ్జిక్యూటీవ్​ లుగా పరిచయం చేసుకున్నారు. పండుగ నేపథ్యంలో మీకు స్పెషల్ గిఫ్ట్​ ఆఫర్​ ఉందని చెప్పారు. దీని కోసం 5వేల రూపాయల షాపింగ్ చేయాలన్నారు. ఈ మాటలు నమ్మిన యువతి వాళ్లు చెప్పిన ఖాతాకు 5వేల రూపాయలు ట్రాన్స్​ ఫర్​ చేసింది. ఆ తరువాత మరోసారి ఫోన్ చేసి 9,849 రూపాయలు జీఎస్టీగా కడితే ఐ ఫోన్ 13 పంపిస్తామని చెప్పగా యువతి రెండోసారి కూడా డబ్బు ట్రాన్స్​ ఫర్ చేసింది.

మొత్తం 1.40లక్షల రూపాయలను కొల్లగొట్టారు

ఇలా పలుమార్లు ఫోన్లు చేసిన సైబర్ నేరగాళ్లు ఆమె నుంచి మొత్తం 1.40లక్షల రూపాయలను కొల్లగొట్టారు. ఆజంపురాలో నివాసముంటున్న ఓ వృద్ధునికి ఓ ఏపీకే ఫైల్​ పంపించి ఇన్​ స్టాల్ చేయించటం ద్వారా ఫోన్ ను హ్యాక్​ చేసి లక్షా 2వేల రూపాయలను కొల్లగొట్టారు. ఈ నేపథ్యంలోనే అందరూ అప్రమత్తంగా ఉండాలని కమిషనర్ సజ్జనార్​ సూచించారు. పరిచయం లేని వ్యక్తులు పంపించే ఏపీకే ఫైళ్లను డౌన్ లోడ్ చేసి ఇన్​ స్టాల్​ చేసుకోవద్దన్నారు. పండుగ సందర్భంగా గిఫ్ట్ వచ్చింది…స్పెషల్ డిస్కౌంట్ ఇస్తామన్న మాటలు నమ్మవద్దన్నారు. ఒకేవేళ మోసానికి గురైతే మొదటి గంటలోనే 1930 నెంబర్​ కు ఫోన్ చేసి సమాచారం ఇవ్వాలని చెప్పారు. దాంతోపాటు www.cybercrime.gov.in. సైట్ కు ఫిర్యాదు చేయవచ్చన్నారు. మొదటి గంటలో కంప్లయింట్ ఇస్తేనే సైబర్ క్రిమినల్స్ కొల్లగొట్టిన డబ్బును బ్యాంక్​ ఖాతాల్లో ఫ్రీజ్ చేసే అవకాశాలు ఉంటాయన్నారు.

Also Read: Mahesh Kumar Goud: స్థానిక సంస్థల ఎన్నికల్లో 90 శాతం సీట్లు మావే.. పీసీసీ చీఫ్​ కీలక వ్యాఖ్యలు