Epaper 
Steroids Gang Arrested: జిమ్ లకు వెళ్లే యువతీ, యువకులకు స్టెరాయిడ్లను విక్రయిస్తున్న ముగ్గురిని సౌత్ వెస్ట్ జోన్ టాస్క్ ఫోర్స్ అధికారులు హుమాయున్ నగర్ పోలీసులతో కలిసి అరెస్ట్ చేశారు. నిందితుల నుంచి లక్షా 80వేల రూపాయల విలువ చేసే స్టెరాయిడ్ ఇంజక్షన్లు, క్యాప్సూల్స్ ను స్వాధీనం చేసుకున్నారు.
టాస్క్ ఫోర్స్ అదనపు డీసీపీ అందె శ్రీనివాస రావు తెలిపిన ప్రకారం వివరాలు ఇలా ఉన్నాయి. హకీంపేట నివాసి ఇమ్రాన్ ఖాన్ (40) గతంలో జిమ్ ట్రైనర్ గా పని చేశాడు. అయితే, ఈ ఉద్యోగం నుంచి ఆశించినంత ఆదాయం రాకపోతుండటంతో తేలికగా డబ్బు సంపాదించటానికి స్టెరాయిడ్ల దందా మొదలు పెట్టాడు.
3, 4 నెలల్లోనే కండలు పెంచుకోవచ్చంటూ జిమ్ లకు వచ్చే యువతీ, యువకులకు వాటిని అధిక ధరలకు అమ్మటం ప్రారంభించాడు. ఈ మేరకు పక్కగా సమాచారాన్ని సేకరించిన సౌత్ వెస్ట్ జోన్ టాస్క్ ఫోర్స్ అధికారులు హుమాయున్ నగర్ పోలీసులతో కలిసి ఇమ్రాన్ ఖాన్ ను ఎన్ఎండీసీ రోడ్డులోని సోమ టైలర్స్ వద్ద అదుపులోకి తీసుకున్నారు.
అతని వద్ద నుంచి స్టెరాయిడ్ ఇంజక్షన్లు, మాత్రలను స్వాధీనం చేసుకున్నారు. ఇమ్రాన్ ఖాన్ ను విచారణ జరుపగా గౌలిపురా నివాసి, సప్లిమెంటరీ స్టోర్ నడుపుతున్న ఆర్.సంజీవ్ నుంచి తక్కువ ధరలకు ఈ స్టెరాయిడ్ ఇంజక్షన్లు, మాత్రలను కొని ఎక్కువ రేట్లకు అమ్ముతున్నట్టు వెల్లడించాడు.
ఈ క్రమంలో పోలీసులు సంజీవ్ ను కూడా అదుపులోకి తీసుకున్నారు. అతన్ని ప్రశ్నించగా సప్లిమెంటరీ స్టోర్ నడిపిస్తున్న యాకుత్ పురా వాస్తవ్యుడు, మెయిన్ సప్లయర్ అయిన మహ్మద్ నజీర్ పేరు వెలుగులోకి వచ్చింది. దాంతో పోలీసులు మహ్మద్ నజీర్ ను కూడా అరెస్ట్ చేశారు.
Also Read: Pawan Kalyan: పవన్ ఫోటోస్ తెగ వైరల్.. దటీజ్ పవన్ అంటున్న జనసైనిక్స్..
వీరి నుంచి లక్షా 80వేల రూపాయల విలువ చేసే స్టెరాయిడ్ ఇంజక్షన్లు, హార్మోన్ రిలీజ్ చేసే క్యాప్సూల్స్, మాత్రలను స్వాధీనం చేసుకున్నారు. నిందితులపై కేసులు నమోదు చేసి తదుపరి దర్యాప్తు నిమిత్తం హుమాయున్ నగర్ పోలీసులకు అప్పగించారు. నిందితులను అరెస్ట్ చేసిన సీఐ ఎస్.బాలస్వామి, ఎస్సై శరత్ చంద్రలను అదనపు డీసీపీ అందె శ్రీనివాస రావు అభినందించారు.
