GHMC: ఆ మూడు కార్పొరేషన్ల పాలన షురూ? తర్వాతే కీలక నిర్ణయం తీసుకోనున్న ప్రభుత్వం!

GHMC:  జీహెచ్ఎంసీ పాలక మండలి అధికార గడువు వచ్చే నెల 10వ తేదీతో ముగియనుంది. ఆ తర్వాత మూడు కార్పొరేషన్లకు సంబంధించిన సర్కార్ కీలక నిర్ణయాలు తీసుకునే అవకాశం ఉన్నది. ఇప్పటికే విలీనం, పునర్విభజన ప్రక్రియలను చేపట్టిన అధికారులు ప్రస్తుతం జీహెచ్ఎంసీలో(GHMC) జరుగుతున్న బదిలీలు, నియామకాలన్నీ కూడా మూడు కార్పొరేషన్ల ప్రాతిపదికనే జరుగుతున్నట్లు తెలిసింది. ఇందుకు సంబంధించి మూడు కార్పొరేషన్ల ప్రాతిపదికన పాలన వ్యవహారాలు కూడా అంతర్గతంగా మొదలైనట్లు సమాచారం. మూడుగా విభజించాలనుకున్న జోన్లలో జీహెచ్ఎంసీ ప్రధాన కార్యాలయంలో మూడు కార్పొరేషన్ల ప్రాతిపదికన కీలక పరిణామాలు చోటుచేసుకుంటున్నాయి.

ఫిబ్రవరి 10 తర్వాత ఈ ముగ్గురు టౌన్ ప్లానింగ్ ఆఫీసర్లే

ప్రస్తుతం ఉన్న 12 జోన్లలో ఆరు జోన్లకు ఓ చీఫ్ సిటీ ప్లానర్‌ను, మిగిలిన ఆరు జోన్లకు ఇద్దరు టౌన్ ప్లానింగ్ డైరెక్టర్లను నియమించడం ఇందుకు నిదర్శనంగా చెప్పవచ్చు. వీరిలో ఇద్దరు టౌన్ ప్లానింగ్ ఆఫీసర్లు అదనపు చీఫ్ సిటీ ప్లానర్‌లుగా కొనసాగుతూ, చీఫ్ సిటీ ప్లానర్ పదోన్నతి కోసం అర్హులుగా ఉండడంతో ఫిబ్రవరి 10 తర్వాత ఈ ముగ్గురు టౌన్ ప్లానింగ్ ఆఫీసర్లే మూడు కార్పొరేషన్లకు చీఫ్ సిటీ ప్లానర్లుగా కొనసాగేలా నియామకాలు జరిగాయన్న వాదనలున్నాయి. ప్రభుత్వం, అధికార యంత్రాంగం సమన్వయంతో జీహెచ్ఎంసీని పూర్తిగా రీసెట్ చేసే దిశగా సైలెంట్ ఆపరేషన్ కొనసాగుతున్నదని సమాచారం. ఫీల్డ్ లెవల్‌లో పనులు కాగితాలకే పరిమితం అవుతున్నాయన్న నివేదికలు ప్రభుత్వానికి అందినట్లు తెలిసింది. దీనితో ఇకపై ఫైళ్ల మీద కాకుండా, ఫీల్డ్ లెవల్‌లోనే అభివృద్ది, పౌర సేవల నిర్వహణలో మార్పులు కనిపించాలని సర్కార్ ఆదేశించినట్లు సమాచారం. ఇందులో భాగంగా కొత్తగా ఏర్పడిన 12 జోన్లలో ఆరు జోన్లకు ఇద్దరు ఐఏఎస్ ఆఫీసర్లను అదనపు కమిషనర్ (మానిటరింగ్)గా నియమించినట్లు తెలిసింది.

Also Read: GHMC Commissioner: పరిశుభ్ర నగరంగా హైదరాబాద్‌ను తీర్చిదిద్దాలి : అధికారులకు కర్ణన్ కీలక సూచనలు!

సర్కారు స్టడీ.. విలీనం పాత నిర్ణయమే

జీహెచ్ఎంసీతో (GHMC) పాటు 27 పట్టణ స్థానిక సంస్థ పరిధిలోని నిర్ణయాలు, ప్రతిపాదనలు కేవలం కాగితాలకే పరిమితం కాకుండా పనులు స్పీడ్‌గా ఎఫెక్ట్‌గా ఉండాలన్న ఆలోచనతోనే సర్కార్ కొద్ది నెలల ముందే తెలంగాణ కోర్ అర్బన్ రీజియన్ పరిధిలోని ఈ పట్టణ స్థానిక సంస్థల సమ‌స్యలు, ఆదాయ మార్గాలు, అప్పులు, విస్తీర్ణం, అత్యవసర సేవల నిర్వహణ వంటి అంశలపై స్టడీ చేసిన ప్రభుత్వం వాటి విలీనానికి ఆదేశాలు జారీ చేసినట్లు సమాచారం. పట్టణ స్థానిక సంస్థల విలీనం తెర పైకి రాక ముందు కొద్ది నెలల క్రితమే జీహెచ్ఎంసీ(GHMC) పరిధిలోని సుమారు 5 లక్షల పై చిలుకు స్ట్రీట్ లైట్ల నిర్వహణకు టెండర్లు ఖరారు చేసింది. అనుమతి కోసం జీహెచ్ఎంసీ ప్రతిపాదనలు పంపగా, జీహెచ్ఎంసీలోని కేవలం 30 సర్కిళ్లకు మాత్రమే కాకుండా తెలంగాణ కోర్ అర్బన్ రీజియన్ పరిధిలోని 27 పట్టణ స్థానిక సంస్థ పరిధిలో ఉన్న స్ట్రీట్ లైట్లను కలిపి మెరుగైన నిర్వహణకు టెండర్ల ప్రక్రియ చేపట్టాలని ఆరు నెలల ముందే సర్కార్ ఆదేశించడంతో విలీన నిర్ణయం పాత నిర్ణయంగా భావించవచ్చు.

ఫిబ్రవరి 10 కోసం వెయిటింగ్

జీహెచ్ఎంసీలో(GHMC) ప్రస్తుతం పాలక మండలి పవర్‌లో ఉన్నందున, ఇప్పుడే మూడు కార్పొరేషన్ల ప్రకటన చేస్తే అనవసర రాజకీయంగా, న్యాయపరమైన చిక్కుల ఎదుర్కొవల్సి వస్తుందన్న అభిప్రాయంతో ప్రభుత్వం పాలక మండలి గడువు ముగింపు కోసం వెయిటింగ్ లో ఉన్నట్లు సమాచారం. పాలక మండలి గడువు ముగిసిన తర్వాత జీహెచ్ఎంసీ పరిధిని మూడు కార్పొరేషన్లుగా చేసేందుకు ప్రభుత్వం కూడా ఫిబ్రవరి 10వ తేదీ కోసం వెయిటింగ్‌లో ఉన్నట్లు సమాచారం. పాలక మండలి గడువు ముగిసిన తర్వాత జీహెచ్ఎంసీ పరిధిని మూడు కార్పొరేషన్లుగా విజిస్తూ తొలుత ఆర్డినెన్స్‌ను జారీ చేసి, విభజన ప్రక్రియను ప్రారంభించాలని సర్కారు యోచిస్తున్నట్లు తెలిసింది. మొత్తం 12 జోన్లలో ఆరు జోన్లతో శంషాబాద్ వరకు 150 మున్సిపల్ వార్డుతో జీహెచ్ఎంసీని ఏర్పాటు చేసి, మిగిలిన మరో ఆరు జోన్లలో మూడు జోన్‌లోని 74 వార్డులతో గ్రేటర్ సైబరాబాద్ మున్సిపల్ కార్పొరేషన్, మరో మిగిలిన మూడు జోన్లు, వాటిలోని 76 మున్సిపల్ వార్డులతో గ్రేటర్ మల్కాజ్‌గిరి మున్సిపల్ కార్పొరేషన్‌ను ఏర్పాటు చేసే దిశగా అధికారుల కసరత్తు చేసినట్లు తెలిసింది. ఇప్పటికే గ్రేటర్ మల్కాజ్‌గిరి మున్సిపల్ కార్పొరేషన్ ప్రధాన కార్యాలయాన్ని తార్నాకలోని పాత హెచ్ఎండీఏ ఆఫీసులో ఏర్పాటు చేయాలని నిర్ణయం తీసుకోవడంతో పాటు ఈ దశగా పనులు వేగంగా జరుగుతున్నట్లు సమాచారం.

Also Read: GHMC: పునర్ వ్యవస్థీకరణతో సిబ్బందికి పని భారం.. ఇప్పటికే ఒక్కో అధికారికి అదనపు బాధ్యతలు!