Epaper 
Bangladeshis Arrested: అక్రమంగా నివాసముంటున్న ఇద్దరు బంగ్లా దేశీయులను సెంట్రల్ జోన్ టాస్క్ ఫోర్స్ అధికారులు మలక్ పేట పోలీసులతో కలిసి అరెస్ట్ చేశారు. వీరికి ఆధార్, ఓటర్ కార్డులతోపాటు బర్త్ సర్టిఫికెట్లను సమకూర్చిన మరో నలుగురిని కూడా కటకటాల వెనక్కి పంపించారు. వీరిలో నార్సింగి మున్సిపాలిటీలో ఔట్ సోర్సింగ్ ఉద్యోగి ఉండటం గమనార్హం. డీసీపీ సుధీంద్ర తెలిపిన ప్రకారం వివరాలు ఇలా ఉన్నాయి. మలక్ పేట సలీంనగర్ కాలనీలో బంగ్లాదేశీయులు ఉంటున్నట్టుగా టాస్క్ ఫోర్స్ సిబ్బందికి సమాచారం అందింది.
ఈ క్రమంలో టాస్క్ ఫోర్స్ అధికారులు మలక్ పేట పోలీసులతో కలిసి దాడులు జరిపారు. బంగ్లాదేశ్ రాజధాని ఢాకాకు చెంది ఇక్కడ అక్రమంగా ఉంటున్న మహ్మద్ హసీబుల్ ఎలియాస్ జోవాన్ చౌదరి (25), రోహన్ సాహా (21)లను అరెస్ట్ చేశారు. వీరిని జరిపిన విచారణలో వెల్లడైన వివరాల ఆధారంగా అక్భర్ బాగ్ నివాసి, పాన్ షాప్ నడుపుతున్న మహ్మద్ ముఖీద్ (39), చాదర్ ఘాట్ వాస్తవ్యుడు డీటీపీ ఆపరేటర్ టీ.సాయి కిరణ్ (50), చెంచల్ గూడ నివాసి, ఏజెంట్ అయిన జీ.రజనీకాంత్ (46), నార్సింగి మున్సిపాలిటీ శానిటేషన్ విభాగంలో ఔట్ సోర్సింగ్ ఉద్యోగిగా పని చేస్తున్న నార్సింగి నివాసి డీ.సుధీర్ కుమార్ (27)లను అరెస్ట్ చేశారు.
25 వేలు ఇచ్చి…
బంగ్లాదేశ్ రాజధాని ఢాకాకు చెందిన మహ్మద్ హసీబుల్ నాలుగేళ్ల క్రితం ట్రాఫికర్లకు 25వేల రూపాయలు చెల్లించి పశ్చిమ బెంగాల్–బంగ్లాదేశ్ సరిహద్దుల్లో ఉన్న బోన్ గావ్ నుంచి మన దేశంలోకి అక్రమంగా ప్రవేశించాడు. ఆ తరువాత కొంతకాలంపాటు కోల్ కతాలోని సౌత్ హౌరాలో ఉన్న హసీబుల్ కరాటే ట్రైనర్ గా నెలకు 20వేల రూపాయల జీతానికి పని చేశాడు. ఆ సమయంలోనే జోవాన్ చౌదరీ పేర డూప్లీకేట్ ఆధార్ కార్డు తయారు చేయించుకున్నాడు.
ఫేస్ బుక్ పరిచయంతో…
ఇదెలా ఉండగా హసీబుల్ కు 2023లో మలక్ పేటకు చెందిన జయా చౌదరితో పరిచయం ఏర్పడింది. తన గురించిన నిజాలు చెప్పకుండా ఆమెను ప్రేమలోకి దింపి పెళ్లి చేసుకున్న హసీబుల్ ఆ తరువాత మకాంను సలీంనగర్ కాలనీకి మార్చాడు. ఇక్కడకు వచ్చిన తరువాత ఆన్ లైన్ ద్వారా దుస్తుల వ్యాపారం చేస్తుండటంతో స్విగ్గీలో డెలివరీ బాయ్ గా ఉద్యోగంలో చేరాడు.
ఆ తరువాత మహ్మద్ ముఖీద్, సాయికిరణ్, రజనీకాంత్ ల సహాయంతో నార్సింగి మున్సిపాలిటీలో ఔట్ సోర్సింగ్ ఉద్యోగిగా పని చేస్తున్న సుధీర్ కుమార్ ను కలిశాడు. అనంతరం నార్సింగి మున్సిపాలిటీ నుంచి బర్త్ సర్టిఫికెట్ సంపాదించుకున్నాడు. దీని ఆధారంగా ఎనిమిది నెలల క్రితం డూప్లీకేట్ ఆధార్ కార్డు, ఓటర్ గుర్తింపు కార్డులను సమకూర్చుకున్నాడు.
2025లో…
ఇక, మరో బంగ్లాదేశీ రోహన్ సాహాతో కొన్ని రోజుల క్రితం హసీబుల్ కు పరిచయం ఏర్పడింది. అప్పటికే అక్రమంగా బంగ్లాదేశ్ సరిహద్దులు దాటి మన దేశంలోకి వచ్చి కోల్ కతాలో ఉంటున్న రోహన్ సాహా గర్భంతో ఉన్న అతని భార్యను హైదరాబాద్ పిలిపించు8కున్న హసీబుల్ వారికి కూడా డూప్లీకేట్ గుర్తింపు కార్డులు తయారు చేయించి ఇచ్చి ఇక్కడే ఆశ్రయం కల్పించాడు. ఈ మేరకు పక్కాగా సమాచారం అందుకున్న టాస్క్ ఫోర్స్ అధికారులు మలక్ పేట పోలీసులతో కలిసి హసీబుల్, రోహన్ లతోపాటు వారికి సహకరించిన మరో నలుగురిని అరెస్ట్ చేశారు.
స్వేచ్ఛ ఈ పేపర్ కోసం ఈ https://epaper.swetchadaily.com/లింక్ క్లిక్ చేయగలరు
