Cyber Crime: సైబర్ మోసగాళ్ల వలలో వృద్ధుడు.. రూ.5 లక్షలు వెనక్కి వచ్చేలా చేసిన కానిస్టేబుల్.. ఏం చేశాడంటే?

Cyber Crime: శభాష్​ శ్రీకాంత్ నాయక్​

రూ.5 లక్షలు వెనక్కి రప్పించిన కానిస్టేబుల్

తెలంగాణ బ్యూరో, స్వేచ్ఛ: బాధితుల నుంచి అందే ఫిర్యాదులపై పోలీసులు వెంటనే స్పందిస్తే ఫలితం ఎలా ఉంటుందో నిరూపించే ఉదంతమిది. ఓ రిటైర్డ్​ ఉద్యోగి సైబర్​ క్రిమినల్స్​ (Cyber Crime) ఉచ్ఛులో చిక్కి 10 లక్షల రూపాయలు పోగొట్టుకోగా కంప్లయింట్​ వచ్చిన వెంటనే హైదరాబాద్ సైబర్​ క్రైం స్టేషన్​ కానిస్టేబుల్​ శ్రీకాంత్ నాయక్​ స్పందించారు. రూ.5 లక్షల వెనక్కి వచ్చేలా చూశారు. దీంతో, కానిస్టేబుల్ శ్రీకాంత్ నాయక్‌ను సైబర్ క్రైం డీసీపీ దార కవిత అభినందించారు.

హైదరాబాద్‌కు చెందిన ఓ రిటైర్డ్ ఉద్యోగికి పంజాబ్​ నేషనల్ బ్యాంక్‌లో అకౌంట్​ ఉంది. పెన్షన్​ డబ్బు ఆ ఖాతాలోనే జమవుతుంది. కాగా, పెన్షన్​ డబ్బు క్రమం తప్పకుండా రావటానికి లైఫ్​ సర్టిఫికెట్‌ను సమర్పించాల్సి రావటంతో వృద్ధుడు ఆన్‌‌లైన్‌లో పంజాబ్​ నేషనల్ బ్యాంక్​ ఫోన్​ నెంబర్​ కోసం సెర్చ్​ చేశాడు. దాంట్లో సైబర్ క్రిమినల్స్ అప్‌లోడ్ చేసిన నంబర్ నిజమైందనుకుని దానికి ఫోన్​ చేశాడు. తనను తాను బ్యాంక్​ అధికారిగా చెప్పుకొన్న సైబర్​ మోసగాడు వృద్ధుడి మొబైల్‌కు ఓ ఏపీకే ఫైల్ పంపించాడు. దానిని ఇన్‌స్టాల్ చేసుకుని తాను చెప్పినట్టుగా చేస్తే పని పూర్తవుతుందన్నాడు.

Read Also- Mana Shankara Vara Prasad Garu: వైరల్‌ సెన్సేషన్‌.. మరో బెంచ్‌మార్క్‌కు చేరుకున్న ‘మీసాల పిల్ల’!

దాంతో వృద్ధుడు ఏపీకే ఫైల్‌ను ఇన్‌స్టాల్ చేసి సైబర్ క్రిమినల్​ చెప్పినట్టుగా తన వివరాలను అప్‌లోడ్ చేశాడు. ఆ వెంటనే వృద్ధుడి మొబైల్ ఫోన్‌ను తన ఆధీనంలోకి తీసుకున్న సైబర్​ మోసగాడు 1‌‌0 లక్షల రూపాయలను తన ఖాతాల్లోకి మళ్లించుకున్నాడు. ఈ మేరకు వచ్చిన మెసేజులను చూసి కంగారుపడ్డ వృద్ధుడు వెంటనే హైదరాబాద్ క్రైమ్ పోలీస్​ స్టేషన్‌కు వచ్చి ఫిర్యాదు చేశాడు. ఆ వెంటనే కానిస్టేబుల్ శ్రీకాంత్ నాయక్​ వృద్ధుడి ఫోన్ నుంచి ఏపీకే ఫైల్ ను డిలీట్ చేశారు. నేషనల్ సైబర్ క్రైం రిపోర్టింగ్ పోర్టల్ సహాయంతో రేజర్ పే ద్వారా డబ్బు స్మాల్ ఫైనాన్స్​ బ్యాంక్​ లిమిటెడ్‌లోని అకౌంట్‌కు వెళ్లినట్టుగా గుర్తించాడు. ఆ వెంటనే రేజర్​ పే నోడల్ ఆఫీసర్‌గా​ ఉన్న హర్షవర్దన్ రావుకు నోటీస్ పంపించాడు. దాంతో హర్షవర్ధన్ రావు రూ.5 లక్షలను వేరే ఖాతాలోకి వెళ్లకుండా బ్లాక్​ చేశాడు. అనంతరం ఆ మొత్తాన్ని వృద్ధుడి ఖాతాలోకి ట్రాన్స్‌ఫర్ చేశాడు. దీనిపై డీసీపీ దార కవిత మాట్లాడుతూ, ఆర్టీవో చలాన్​, ఆర్టీఏ చలాన్​ 140.ఏపీకే, కస్టమర్​ కేర్ ఏపీకే, బ్యాంక్​ ఏపీకే ఫైళ్లు మొబైల్ ఫోన్‌కు వస్తే వాటిని ఇన్ స్టాల్ చేయవద్దని సూచించారు.

Read Also- Robbery Gone Wrong: గోల్డ్ షాప్ ఓనర్ కళ్లలో కారంకొట్టి చోరీ చేద్దామనుకుంది.. కానీ చావుదెబ్బలు తిన్నది.. వీడియో ఇదిగో