Epaper 
GHMC: గ్రేటర్ హైదరాబాద్ అవసరాలకు అనుకూలంగా అభివృద్ది పనులు చేపట్టడంతో పాటు అత్యవసర సేవలందించే జీహెచ్ఎంసీలో వచ్చే ఫిబ్రవరి 10వ తేదీ తర్వాత అభివృద్ది పనులు పరుగులు తీయనున్నాయి. ఫిబ్రవరి 10తో ప్రస్తుతమున్న పాలక మండలి అధికార గడువు ముగియనుండటం, ఆ తర్వాత స్పెషలాఫీసర్ పాలన పౌర సేవల నిర్వహణ, నగరంలోని అభివృద్ది పనులపై పూర్తి స్థాయిలో ఫోకస్ పెట్టేందుకు సర్కారు సిద్దమైనట్లు విశ్వసనీయ సమాచారం. పాలక మండలి గడువు ముగియనుండటంతో అభివృద్ది కోసం అధికారులు తీసుకునే నిర్ణయాలకు రాజకీయపరంగా దాదాపు అడ్డంకులన్నీ తొలగిపోనున్నందున అభివృద్ది పనులు ఊపందుకోనున్నాయి.
ఈ నెల 25న జరిగిన కౌన్సిల్ సర్వసభ్య సమావేశంలో సుమారు రూ. 3764.28 కోట్ల అభివృద్ది పనుల ప్రతిపాదనలకు కౌన్సిల్ గ్రీన్ సిగ్నల్ ఇవ్వటంతో పనులను వీలైనంత త్వరగా ప్రారంభించేందుకు అధికారులు ఏర్పాట్లు చేస్తున్నట్లు సమాచారం.గతంలో ఈ తరహాలో ఏకంగా రూ. 3764 కోట్ల అభివృద్ది పనులకు ఒకే కౌన్సిల్ సమావేశం గ్రీన్ సిగ్నల్ ఇవ్వటం చాలా అరుదు. ముఖ్యంగా రోడ్లకు నిర్వహణను మరింత మెరుగ్గా చేపట్టేందుకు గత సర్కారు తెరపైకి తెచ్చిన కాంప్రహెన్సీవ్ రోడ్ మెయింటనెన్స్ ప్రొగ్రామ్ (సీఆర్ఎంపీ)కి అధికారులు దాదాపు రూ. 2828 కోట్లను కేటాయించగా, ఇటీవలే జరిగిన కౌన్సిల్ సమావేశం అందుకు ఆమోదం తెలిపింది. ప్రస్తుతం ఈ ప్రతిపాదన సర్కారు వద్ద పెండింగ్ లో ఉంది. దీంతో పాటు ఢిల్లీ తరహాలో స్ట్రీట్ లైట్ మెయింటనెన్స్ కు మరింత మెరుగైన నిర్వహణ కోసం రూ. 693 కోట్లను కేటాయించగా, ఇందుకు కౌన్సిల్ ఆమోద ముద్ర వేసింది.
Also Read: GHMC: జీహెచ్ఎంసీ నుంచి బదిలీ కోసం అధికారుల ప్రయత్నాలు.. కారణం అదేనా..!
మెయింటనెన్స్ చేసేందుకు జీహెచ్ఎంసీ రూ. 77 కోట్లు
త్వరలోనే జీహెచ్ఎంసీ (GHMC)లో విలీనం చేGHMC: నున్న 27 అర్బన్ లోకల్ బాడిల్లోని స్ట్రీట్ లైట్లతో కలిపి ఔటర్ వరకున్న స్ట్రీట్ లైట్లకు మరింత మెరుగైన మెయింటనెన్స్ సిస్టమ్ ను అందుబాటులోకి తేనున్నారు. దీనికి తోడు గ్రేటర్ పరిధిలోని మూడు పోలీసు కమిష్నరేట్ పరిధిలో ఉన్న 340 ట్రాఫిక్ సిగ్నల్స్ ను కూడా అత్యాధునిక విధానంలో మెయింటనెన్స్ చేసేందుకు జీహెచ్ఎంసీ (GHMC) రూ. 77 కోట్లతో రూపొందించిన ప్రతిపాదనను అమలు చేసేందుకు రంగం సిద్దమైనట్లు తెలిసింది. మౌలాలీ చిల్లా వద్ద ర్యాంప్ నిర్మాణానికి కూడా దాదాపు అన్ని రకాల అడ్డంకులు తొలగిపోవటంతో కౌన్సిల్ ఇటీవలే ఈ ర్యాంపు నిర్మాణానికి రూ. 27 కోట్లను కేటాయించగా, త్వరలోనే పనులు మొదలు పెట్టేందుకు జీహెచ్ఎంసీ ఇంజనీర్లు ప్రయత్నం చేస్తున్నారు.
రూ. 13.59 కోట్లకు ఆమోదం
వీటితో పాటు నగరంలో రోజురోజుకి పెరిగిపోతున్న ట్రాఫిక్, రద్దీ కారణంగా పాదచారుల భద్రత ప్రశ్నార్ధకంగా మారుతుండటంతో సిటీలోని మరిన్ని రద్దీ ప్రాంతాలను గుర్తించి, పాదచారులు సేఫ్టీగా రోడ్డు దాటేందుకు వీలుగా ఫుటోవర్ బ్రిడ్జులను ఏర్పాటు చేసేందుకు కౌన్సిల్ సమావేశం రూ. 13.59 కోట్లకు ఆమోదం తెలపటంతో ఈ ఫుటోవర్ బ్రిడ్జిలు సిటీలో ఇంకా ఎక్కడెక్కడ అవసరమన్న విషయంపై జీహెచ్ఎంసీ అధికారులు ఫీజుబిలిటీ స్టడీ నిర్వహిస్తున్నట్లు సమాచారం. ఈ పనులతో పాటు సిటీలోని వివిధ ప్రాంతాల్లో జలమండలి ఆధ్వర్యంలో చేపట్టనున్న తాగునీరు, మురుగు నీటి పనులకు కూడా కౌన్సిల్ రూ. 13 కోట్లను కేటాయించటంతో పనులు చేపట్టేందుకు అధికారులు సిద్దమవుతున్నారు. వీటితో పాటు ఇప్పటికే రూ.5 కే భోజనం అందిస్తున్న ఇందిరమ్మ క్యాంటీన్ లకు కూడా కౌన్సిల్ రూ. 11.43 కోట్లను మంజూరు చేసింది. ఈ నిధులతో ఇప్పటికే ప్రారంభించిన రూ.5 కే బ్రేక్ ఫాస్ట్ క్యాంటీన్లు 35 ఏర్పాటు కాగా, త్వరలోనే మరో 35 క్యాంటీన్లను ఏర్పాటు చేసేందుకు సన్నాహాలు జరుగుతున్నాయి.
మళ్లీ ఏడాది తర్వాతేనా?
వచ్చే ఫిబ్రవరి 10వ తేదీన పాలక మండలి అధికార గడువు ముగియనుండటంతో వెంటనే జీహెచ్ఎంసీ (GHMC) ఎన్నికల నిర్వహించేందుకు రాష్ట్ర ప్రభుత్వం సిద్దంగా లేనట్టు తెలిసింది. ఒక వైపు జీహెచ్ఎంసీలో 27 అర్బన్ లోకల్ బాడిల విలీనం ప్రక్రియను కొనసాగిస్తూనే, స్పెషలాఫీసర్ పాలనలో హెచ్ సిటీ, ఎస్ఎన్ డీపీ పనులను వేగవంతం చేసి, విజుబిలిటీ స్థాయికి పనులను తీసుకువచ్చిన తర్వాతే జీహెచ్ఎంసీ ఎన్నికలు నిర్వహించాలని సర్కారు భావిస్తుంది. అర్బన్ లోకల్ బాడిల విలీన ప్రక్రియ, వార్డుల డీలిమిటేషన్ వంటి ప్ర్రక్రియలన్నీ పూర్తి చేసుకునే లోపు సిటీలో రాష్ట్ర ప్రభుత్వ మార్కు అభివృద్దిని ఓ స్థాయికి తీసుకువచ్చిన తర్వాతే ఎన్నికలు నిర్వహించాలని సర్కారు భావిస్తున్నట్లు సమాచారం. సిటీలో అధికార పార్టీకి పెద్దగా అసెంబ్లీ సీట్లు లేకపోయినా, జీహెచ్ఎంసీ ఎన్నికల్లో విజయం సాధించేందుకు కొంత అభివృద్దిని ప్రజలకు చూపాలనే ఉద్దేశ్యంతో సర్కారు ఉన్నట్లు, ఇందులో భాగంగానే పాలక మండలి గడువు ముగియగానే స్పెషలాఫీసర్ పాలనలో అభివృద్దిని పరుగులు పెట్టించేందుకు వ్యూహాం సిద్దం చేస్తున్నట్లు తెలిసింది.
Also Read: GHMC: జీహెచ్ఎంసీలో విలీనం పై క్లారిటీ ఇచ్చిన ప్రభుత్వం.. జీవో జారీ అప్పుడే..?
