Epaper 
Chief Minister Issue: ముఖ్యమంత్రి హోదాలో ఉన్నవ్యక్తి ఒకరు… ముఖ్యమంత్రి పీఠం కావాలంటూ పట్టుబడుతున్నవారు ఇంకొకరు. ఇరువురి మధ్య ఆధిపత్య రాజకీయం ముదిరిన తరుణంలో.. ఇద్దరూ కలిసి కూర్చొని ప్రశాంతంగా టిఫిన్ చేశారు. ఆ ఇద్దరు వ్యక్తులెవరో ఇప్పటికే గుర్తొచ్చి ఉంటుంది. కర్ణాటక ముఖ్యమంత్రి సిద్ధరామయ్య (Siddaramaiah), ఆ రాష్ట్ర ఉప ముఖ్యమంత్రి డీకే శివకుమార్ (DK Shivakumar). ముఖ్యమంత్రి మార్పు విషయమై ఆ రాష్ట్ర కాంగ్రెస్ పార్టీలో అంతర్గత రాజకీయాలు (Chief Minister Issue) పతాక స్థాయికి చేరిన వేళ, శనివారం ఉదయం సిద్ధరామయ్య, డీకే శివకుమార్ ఇద్దరూ కలిసి అల్పాహారం తిన్నారు. ఉప్మా, ఇడ్లీ, సాంబార్‌ కాంబినేషన్‌తో టిఫిన్ చేశారు. ఈ భేటీ రాజకీయ వర్గాల్లో ఆసక్తికరంగా మారింది.
ఐక్యతా సందేశం
కలిసి కూర్చొని టిఫిన్ చేయడం ద్వారా తమ మధ్య ఎలాంటి విభేదాలు లేవని, ఇద్దరం కలిసే ఉన్నామనే సంకేతాలను ఇచ్చినట్టు అయింది. హైకమాండ్ ఆదేశాల మేరకు ఇద్దరూ భేటీ అయినప్పటికీ, అల్పాహారం పూర్తయిన తర్వాత సీఎం సిద్ధరామయ్య ఆసక్తికరమైన వ్యాఖ్యలు చేశారు. ‘ఎలాంటి విభేదాలు లేవు’ అని అన్నారు. భవిష్యత్‌లో కూడా ఉండబోవని అన్నారు. తద్వారా రాజకీయ వర్గాల్లో వ్యక్తమవుతున్న అనుమానాలు, విమర్శలే లక్ష్యంగా సిద్దరామయ్య ఈ వ్యాఖ్యలు చేశారు. 2028 ఎన్నికలే తమ అజెండా అని, స్థానిక సంస్థల ఎన్నికలు కూడా చాలా ముఖ్యమని చెప్పారు. 2028లో కాంగ్రెస్ పార్టీని తిరిగి అధికారంలోకి తీసుకురావడంపై చర్చించామని సిద్ధరామయ్య పేర్కొన్నారు. కలిసికట్టుగా ముందుకుసాగే విషయంపై చర్చించామని, తమ మధ్య ఎలాంటి విభేదాలు లేవని, భవిష్యత్‌లో కూడా ఉండబోదని ఆయన పేర్కొన్నారు.
హైకమాండ్ చెప్పిందే ఫైనల్
ముదురుతున్న సమస్యపై (ముఖ్యమంత్రి మార్పు వ్యవహారం) కాంగ్రెస్ పార్టీ హైకమాండ్ ఏది చెబితే అదే ఫైనల్ అని ముఖ్యమంత్రి సిద్ధరామయ్య స్పష్టం చేశారు. పార్టీ అధిష్ఠానం చెప్పిన దానిని తూ.చ. తప్పకుండా పాటించాలని ఇరువురం నిర్ణయించుకున్నామని వివరించారు. రేపటి నుంచి ఎలాంటి గందరగోళం ఉండదని, ఇప్పుడు కూడా ఎలాంటి కన్ఫ్యూజన్ లేదని, కొన్ని మీడియా కథనాలు అనవసరమైన గందరగోళాన్ని సృష్టించాయని ఆయన అసంతృప్తి వ్యక్తం చేశారు.
రాజీ కుదురుతుందా?, కొత్త ఫార్ములా?
ముఖ్యమంత్రి మార్పు వ్యవహారం దుమారం రేపుతున్నా.. ఆ పదవిని ఆశిస్తున్న డిప్యూటీ సీఎం డికే శివ కుమార్ మాత్రం తగ్గి ప్రవర్తిస్తున్నట్టు కనిపిస్తున్నారని రాజకీయ వర్గాలు విశ్లేషిస్తున్నాయి. ఇవాళ జరిగిన అల్పాహార భేటీ ‘సయోధ్య ఫార్ములా’కు సంకేతమని అంటున్నారు. ఒక కొత్త ఫార్ములా తెరపైకి వచ్చిన తర్వాత డీకే శివకుమార్ పూర్తిగా మారిపోయారని, ఆ ఫార్ములాకు సంబంధించిన విషయాలు ఒక్కొక్కటిగా బయటకు వస్తున్నాయని అంటున్నారు. శివకుమార్ అంతగా హడావిడి చేయకపోవడానికి కారణం ఇదేనని అంటున్నారు. ఇంకో ముఖ్యమైన విషయం ఏంటంటే, డీకే తిరుగుబాటు మొదలుపెట్టినా తన వైపు సంఖ్యా బలం లేదని విశ్లేషిస్తున్నారు.
మాస్ ఇమేజ్, అనుభవజ్ఞుడు, సీనియర్ నాయకుడైన సిద్ధరామయ్యను ముఖ్యమంత్రి పదవి నుంచి తొలగిస్తే పార్టీకి నష్టం జరుగుతుందని కాంగ్రెస్‌కు కూడా తెలుసు. కాబట్టి, ఈ విషయాలను దృష్టిలో ఉంచుకొని డీకే జాగ్రత్తగా వ్యవహరిస్తున్నారని రాజకీయ పరిశీలకులు అంటున్నారు. మరోవైపు, ముఖ్యమంత్రి మార్పు సజావుగా, ప్రశాంతంగా జరగాలని డీకే కోరుకుంటున్నట్టు కూడా విశ్లేషణలు వినపడుతున్నాయి. ఏదేమైనా, ఢిల్లీలో కాంగ్రెస్ అగ్రనాయకత్వం తుది నిర్ణయం తీసుకున్న తర్వాతే దీనిపై పూర్తి క్లారిటీ రానుంది. ఒకవేళ 2026 మార్చి-ఏప్రిల్ నాటికి శివకుమార్ ముఖ్యమంత్రి పదవి ఇవ్వాల్సి వస్తే, అప్పటిలోగా ఇద్దరి మధ్య ఎలాంటి విభేదాలు లేకుండా చూసుకోవాలనేది పార్టీ హైకమాండ్ ఆలోచనగా ఉంది. అందుకే, ఇద్దరి మధ్య ఇవాళ అల్పాహార భేటీని ఏర్పాటు చేసిందని సంబంధిత వర్గాలు చెబుతున్నాయి.
Read Also- Sabarimala Issues: విమానంలో వెళ్లే అయ్యప్ప స్వాములకు గుడ్ న్యూస్..!
2028లో ముఖ్యమంత్రి అవకాశం?
ముఖ్యమంత్రి పదవి ఆశిస్తున్న డిప్యూటీ సీఎం డీకే శివకుమార్ రాజీకి సిద్ధపడితే, 2028లో ఎలాంటి అడ్డంకులు లేకుండా అతడికి నాయకత్వం అప్పగిస్తామని హామీ ఇచ్చే అవకాశాలు ఉన్నాయని రాజకీయ పరిశీలకు అంటున్నారు. ఈ విషయంలో అంగీకరిస్తే, శివకుమార్ విధేయులకు మరిన్నిమంత్రివర్గ శాఖలు దక్కుతాయని, కర్ణాటక కాంగ్రెస్ అధ్యక్షుడిగా కొనసాగుతారని అంటున్నారు. చివరికి 2028లో ఎన్నికలు జరిగేటప్పుడు శివకుమార్ నాయకత్వానికి సిద్ధరామయ్య మద్దతిస్తారని రాజకీయ పరిశీలకులు అంటున్నారు. అయితే, సిద్ధరామయ్య వాగ్దానాలను డీకే నమ్ముతారా?, అసలు 2028లో ఫలితం ఎలా ఉంటుందో? అని డీకే ఆలోచనలో పడే అవకాశం లేకపోలేదనే విశ్లేషణలు కూడా జోరుగా వినిపిస్తున్నాయి. మరి, ఈ ఎపిసోడ్‌కు ఎండ్ కార్డ్ ఎప్పుడు పడుతోంది చూడాలి.
