Panchayat Elections: ఆ గ్రామాల్లో పంచాయతీ ఎన్నికల సందడి.. ఏకగ్రీవాల కోసం వేలంపాటలు

Panchayat Elections: గ్రామాల్లో పంచాయతీ ఎన్నికల సందడి మొదలైంది. దీంతో ఏకగ్రీవానికి ఆఫర్స్ వెలువెత్తుతున్నాయి. ఇప్పటికే ఎలక్షన్ షెడ్యూల్ విడుదలై నామినేషన్ల పర్వం మొదలవడంతో సర్పంచ్ పదవులపై గంపెడు ఆశతో ఉన్న ఆశావహులు ఏకగ్రీవానికి సిద్ధమవుతున్నారు. గ్రామాభివృద్ధి కోసం పోటీ వద్దంటూ పెద్దల ద్వారా వివిధ కుల సంఘాల నాయకులతో బేరసారాలు మొదలు పెట్టారు. ఈ నేపథ్యంలో గ్రామంలో నెలకొన్న దీర్ఘకాలిక సమస్యల పరిష్కారానికి గ్రామ పెద్దల సమక్షంలో ఒప్పందానికి వస్తున్నారు. ఏకగ్రీవ పంచాయతీలకు ప్రభుత్వం ఇప్పటికే రూ.10 లక్షలు ప్రకటించింది.

Also Read: Panchayat Elections: పంచాయతీ ఎన్నికల్లో ఏకగ్రీవాలపై నీలినిడలు.. అనుమానాలు ఇవే!

పదవుల కోసం కొందరు ఆశావహులు పోటాపోటీ

గ్రామ పంచాయతీ ఎన్నికలకు సంబంధించి నోటిఫికేషన్‌ వెలువడిన నేపథ్యంలో జోగులాంబ గద్వాల జిల్లాలోని ఆయా గ్రామ పంచాయతీలో  నుంచి సర్పంచ్, వార్డు ‌సభ్యుల నామినేషన్లు ప్రారంభమయ్యాయి. ఈ నేపథ్యంలో గ్రామ పంచాయతీలను ఏకగ్రీవం చేసుకునేందుకు ప్రధాన పార్టీ నాయకులు, గ్రామస్తులు గ్రామాల్లో సమావేశాలు నిర్వహించి సర్పంచులను ఏకగ్రీవంగా చేసేందుకు ఏకంగా వేలం పాట నిర్వహించడం అందరి నోటా చర్చనీయాంశమైంది. గట్టు, గద్వాల, ధరూర్, కేటిదొడ్డి మండలాలో సర్పంచ్‌ పదవుల కోసం కొందరు ఆశావహులు పోటాపోటీగా ముందుకొచ్చారు. ఇలా రూ.25 లక్షల‌ నుండి సుమారు కోటి రూపాయల వరకు గ్రామం కోసం పెట్టుబడి పెట్టడానికి ముందుకు వచ్చినట్లు సమాచారం.

కేటిదొడ్డి మండలం చింతలకుంట రూ.38.50 లక్షలు

గొర్లఖాన్ దొడ్డి- రూ.57 లక్షలు, గద్వాల మండలం కొండపల్లిలో రూ.60 లక్షలు గ్రామాల అభివృద్ధి కోసం డబ్బులు ఇస్తామని ముందుకు రావడంతో గ్రామ ప్రజలు ఏకగ్రీవానికి మొగ్గు చూపెట్టినట్లు తెలుస్తోంది. కొండపల్లిలో నడి గడ్డ హక్కుల పోరాట సమితికి చెందిన యువకులు పోటీ చేసేందుకే ఆసక్తి చూపుతుండగా, గ్రామంలో డ్రైనేజ్ సమస్యతోపాటు పాఠశాల విద్యార్థులకు క్రీడా ప్రాంగణం ఏర్పాటు చేసేందుకు కృష్ణారెడ్డి అనే సీడ్ ఆర్గనైజర్ ముందుకు వచ్చినట్లు, గ్రామ శ్రేయస్సు, ఎన్నికల్లో మద్యం, నగదు వృథా కాకుండా ఆ ఆలోచనను విరమించుకోవాలని సూచిస్తున్నట్లు గ్రామస్తులు తెలిపారు.

Also Read: Panchayat Elections: స్థానికంపై సర్కార్ ‘వ్యూహాత్మకం’.. జిల్లా కలెక్టర్లకు కీలక సూచన