GHMC: జీహెచ్ఎంసీలో విలీనం పై క్లారిటీ ఇచ్చిన ప్రభుత్వం.. జీవో జారీ అప్పుడే..?

GHMC: జీహెచ్ఎంసీ పరిధిని మరింత పెంచేందుకు గ్రేటర్ బయట, ఔటర్ రింగ్ రోడ్(ORR)డుకు లోపల ఉన్న 27 పట్టణ స్థానిక సంస్థల( అర్బన్ లోకల్ బాడీ) విలీన ప్రతిపాదనకు అనుకూలంగా ఫోకస్ పెట్టినట్లు సమాచారం. ఒక్కో లోకల్ బాడీకి చెందిన ఆస్తులు, ఆదాయ వివరాలతో పాటు అప్పుల వివరాలను అధికారులు జీహెచ్ఎంసీకి సమర్పించాల్సి ఉన్న నేపథ్యంలో లెక్కలు వేస్తున్నారు. ముఖ్యంగా పెండింగ్‌లో ఏమైనా బిల్లులుంటే వాటిని క్లియర్ చేసి, అప్పగించాలన్న నిబంధన ఉన్నట్లు అధికార వర్గాలు చెబుతున్నాయి. ఒక్కో లోకల్ బాడీలోని ఓపెన్ ప్లేసెస్, ప్రభుత్వ భూముల వివరాలను ప్రత్యేకంగా చార్టవుట్ చేసి పూర్తి వివరాలను అప్పగించేలా చాలా అంశాలతో కూడిన మార్గదర్శకాలను విలీన ప్రక్రియలో అధికారులు అమలు చేయనున్నట్లు సమాచారం.

ఉద్యోగుల సర్వీసు రికార్డులతో..

ప్రభుత్వ భూములు, లోకల్ బాడీకి చెందిన ఆస్తులను పంచనామా చేసి అధికారులు జీహెచ్ఎంసీకి అప్పగిస్తారు. ఆ తర్వాత ఆప్పగించినట్లు జీహెచ్ఎంసీ వారికి రసీదును అధికారికంగా జారీ చేయనున్నట్లు తెలిసింది. ఒక్కో లోకల్ బాడీ అధికారులు ఇప్పటి వరకు జరిగిన లావాదేవీలతో పాటు జారీ చేసిన నిర్మాణ అనుమతులు, ఉద్యోగుల సర్వీసు రికార్డులతో పాటు ఇతర అన్ని రకాల ఫైళ్లను కూడా అప్పగించి, అందుకు సంబంధించిన రసీదును స్వీకరించి, దాన్ని మున్సిపల్ అడ్మినిస్ట్రేషన్, పట్టణాభివృద్ధి శాఖకు సమర్పించాల్సి ఉంటుందని అధికారులు వెల్లడించారు. అంతేగాక, లోకల్ బాడీలో ఇప్పటి వరకు చేపట్టిన వివిధ రకాల అభివృద్ధి పనులకు సంబంధించిన పూర్తి సమాచారం, మున్ముందు చేపట్టాల్సిన పనులు, ప్రతిపాదనల స్థాయిలో ఉన్న వాటికి సంబంధించిన వివరాలను కూడా ఇవ్వాల్సి ఉంటుందని వెల్లడించారు. దీనికి తోడు లోకల్ బాడీలకు ఉన్న మొత్తం ఆదాయ వనరులు, ప్రాపర్టీ ట్యాక్స్ వసూళ్ల వివరాలతో పాటు అప్పులుంటే వాటి వివరాలను కూడా స్పష్టంగా జీహెచ్ఎంసీకి సమర్పించాలన్న నిబంధన ఉన్నట్లు సమాచారం. ముఖ్యంగా లోకల్ బాడీ రెవెన్యూ పరిధికి సంబంధించిన పూర్తి వివరాలతో పాటు ఆ పరిధిలో స్థానిక సంస్థకు ఉన్న ఆఫీసుల వివరాలు, అందుకు సంబంధించిన డాక్యుమెంట్లను సైతం సమర్పించాల్సి ఉంటుందని అధికారవర్గాల సమాచారం.

Also Read: Saree Colour Politics: అప్పుడు షర్మిల.. ఇప్పుడు కవిత.. చీర చుట్టూ ఈ రాజకీయమేంటో!

ఫిబ్రవరి 10 తర్వాతే జీవో జారీకి అవకాశం

27 పట్టణ స్థానిక సంస్థలను జీహెచ్ఎంసీలో విలీనం చేసే విషయంపై సర్కారు ఎంతో వ్యూహాత్మకంగా ముందుకెళ్తున్నది. ఈ నెల 25వ తేదీన ఈ విలీన ప్రతిపాదనను ఆమోదించిన మంత్రివర్గం అదే రోజు జీహెచ్ఎంసీ ప్రధాన కార్యాలయంలో జరిగిన కౌన్సిల్ జనరల్ బాడీ సమావేశానికి ప్రీయాంబుల్ ప్రతిపాదనను పంపింది. వచ్చే ఆర్థిక సంవత్సరానికి సంబంధించి జీహెచ్ఎంసీ రూపకల్పన చేయనున్న బడ్జెట్‌లో ఈ 27 పట్టణ స్థానిక సంస్థలకు నిధులు కేటాయించాలి నిర్ణయించింది. కౌన్సిల్ మీటింగ్‌లో పాలక మండలి దీనిపై అధికారికంగా ప్రకటించింది. జీహెచ్ఎంసీ పాలక మండలి అధికార గడువు త్వరలో ముగియనున్నది. ఈ నేపథ్యంలో వచ్చే ఫిబ్రవరి 10వ తేదీ తర్వాతే విలీనానికి సంబంధించి జారీ చేసే అవకాశాలున్నట్లు సమాచారం. ప్రస్తుతం జీహెచ్ఎంసీలో పాలక మండలి ఇంకా పవర్‌లోనే ఉన్నందున, ఇపుడు జీవో జారీ చేస్తే న్యాయపరమైన చిక్కులు ఎదురయ్యే అవకాశాలున్నట్లు తెలిసింది.

Also Read: Senior Citizens: భలే.. భలే వన్ విమాన హోటల్.. ఎంజాయ్ చేసిన సీనియర్ సిటిజన్లు