Congress 2014 defeat: కాంగ్రెస్ ఓటమికి సీఐఏ, మొస్సాద్ కుట్ర.. కాంగ్రెస్ మాజీ ఎంపీ సంచలన వ్యాఖ్యలు

Congress 2014 defeat: కాంగ్రెస్ సీనియర్ నేత, రాజ్యసభ మాజీ ఎంపీ కుమార్ కేత్కర్ ( Kumar Ketkar) సంచలన వ్యాఖ్యలు చేశారు. 2014 లోక్‌సభ ఎన్నికల్లో కాంగ్రెస్ పార్టీ ఓటమి (Congress 2014 defeat) వెనుక అమెరికా ఇంటెలిజెన్సీ సంస్థ సీఐఏ (CIA), ఇజ్రాయెల్ ఇంటెలిజెన్స్ సంస్థ మొస్సాద్ (Mossad) ఉన్నాయని ఆరోపించారు. ఈ రెండు సంస్థలూ హస్తం పార్టీ ఓటమికి కుట్ర పన్నాయన్నారు. 2004 లోక్‌సభ ఎన్నికల్లో కాంగ్రెస్ పార్టీ 145 సీట్లు గెలిచిందని, 2009 ఎన్నికల్లో ఆ సంఖ్యను 206కు పెంచుకుందని ప్రస్తావించారు. ఈ పెరుగుదల ట్రెండ్ కొనసాగి ఉంటే, 2014లో  250 పైచిలుకు సీట్లు సాధించి కాంగ్రెస్ పార్టీ తిరిగి అధికారాన్ని నిలబెట్టుకునేదని కుమార్ కేత్కర్ వ్యాఖ్యానించారు. అనూహ్యంగా 2014లో కాంగ్రెస్ పార్టీ కేవలం 44 సీట్లకు పడిపోయిందని, ఇది ప్రజా తీర్పు కాదని ఆయన అనుమానం వ్యక్తం చేశారు. బుధవారం (నవంబర్ 26) నాడు కాంగ్రెస్ పార్టీ ఆధ్వర్వంలో మహారాష్ట్రలో జరిగిన రాజ్యాంగ దినోత్సవ కార్యక్రమంలో ఆయన ఈ వ్యాఖ్యలు చేశారు.

2014కు ముందు గేమ్ స్టార్ట్

2014లో నాటి ప్రధాని మన్మోహన్ సింగ్‌పై అసంతృప్తి ఉన్న విషయమే నిజమేనని అంగీకరించిన ఆయన, 206 సీట్ల నుంచి 44 స్థానాలకు పడిపోవడానికి ఆ అసంతృప్తి సరిపోదని, ఇది ప్రజా తీర్పు కాదని అనుమానం వ్యక్తం చేశారు. కాగా, 2014లో కాంగ్రెస్ పార్టీ కనీసం ప్రతిపక్ష హోదాను కూడా దక్కించుకోలేకపోయిన విషయం తెలిసిందే. సీఐఏ, మొస్సాద్ ఏజెన్సీలు కుట్రకు పాల్పడ్డాయని ఆరోపించిన కుమార్ కేత్కర్… 2014 ఎన్నికలకు ముందు ఈ గేమ్ మొదలైందని ఆరోపించారు. కాంగ్రెస్ సీట్ల సంఖ్య 2009 స్థాయి కంటే పెరగకుండా చూడాలని కొన్ని సంస్థలు కంకణం కట్టుకున్నాయని కేత్కర్ అన్నారు. స్థిరమైన కాంగ్రెస్ పార్టీ ప్రభుత్వం, లేదా కాంగ్రెస్ సారధ్యంలోని సంకీర్ణ ప్రభుత్వం తిరిగి అధికారాన్ని చేపడితే, తమ ఆసక్తులను కొనసాగించలేమని సదరు సంస్థలు భావించాయని ఆరోపించారు. అందుకే, భారత్‌లో పరిణామాలను ప్రభావితం చేయాలని సీఐఏ, మొస్సాద్ నిర్ణయించుకున్నాయని పేర్కొన్నారు.

Read Also- Karnataka CM Race: కర్ణాటకలో రసవత్తరంగా ‘సీఎం పదవి’ రేస్.. సిద్ధూ వర్గ నేతతో డీకే భేటీ.. వేగంగా మారిపోతున్న రాజకీయాలు!

నిర్ణయం ప్రకారం, ఈ రెండు ఏజెన్సీలు రాష్ట్రాలు, నియోజకవర్గాలకు సంబంధించిన విస్తృతమైన సమాచారాన్ని సేకరించాయని అన్నారు. కేంద్రంలో మెజారిటీ ప్రభుత్వం ఏర్పడాలని కోరుకున్నాయని, అయితే అది కాంగ్రెస్ నేతృత్వంలోని సర్కార్ కాకూడదని భావించాయని కుమార్ కేత్కర్ పేర్కొన్నారు. స్థిరమైన కాంగ్రెస్ ప్రభుత్వం తిరిగి అధికారంలోకి వచ్చి ఉంటే, వారు భారతదేశ వ్యవహారాల్లో జోక్యం చేసుకోలేకపోయేవారని, వారి విధానాలను అమలు చేయలేకపోయేవారని ఆరోపించారు.

Read Also- Aadhaar Deactivation: 2 కోట్లకు పైగా మృతుల ఆధార్ నంబర్లు డీయాక్టివేట్.. ఇవి వేరేవారికి కేటాయిస్తారా?