Epaper 
Gadwal District: స్థానిక సమరంలో భాగంగా మొదటి విడతలో జరగనున్న పంచాయతీ ఎన్నికలకు నామినేషన్ల దాఖలు ప్రక్రియ ముగియడంతో, బరిలో నిలిచిన ఆశావహుల్లో ఎన్నికల ఖర్చుపై తీవ్ర ఆందోళన నెలకొన్నది. గెలుపే లక్ష్యంగా కుల సంఘాలు, యువత, మహిళా సంఘాలను ఆకట్టుకునేందుకు అభ్యర్థులు విశ్వ ప్రయత్నాలు చేస్తున్నారు. ప్రతిదానికీ డబ్బు ఖర్చు చేయాల్సిన పరిస్థితి నెలకొనడంతో అభ్యర్థులు గట్టెక్కేందుకు సర్దుబాటు కోసం తిప్పలు పడుతున్నారు.
నిబంధనలకు మించి వ్యయం..
ఎన్నికల నిబంధనల ప్రకారం… 5 వేల కంటే ఎక్కువ జనాభా ఉండే గ్రామాలలో సర్పంచ్ అభ్యర్థులకు ₹2.50 లక్షలు, తక్కువ ఉంటే ₹1.50 లక్షలు మాత్రమే ఖర్చు చేయాల్సి ఉంటుంది. అయితే, వాస్తవంలో పరిస్థితి దీనికి పూర్తి భిన్నంగా ఉంది. సర్పంచ్ అభ్యర్థులు చిన్న గ్రామాలలో కనీసం ₹5 లక్షల నుంచి ₹10 లక్షలు, పెద్ద గ్రామాలలో ₹12 లక్షల నుంచి ₹20 లక్షల పైనే ఖర్చు చేయాల్సిన పరిస్థితులు దాపరిస్తున్నాయి. పట్టణాలకు దరిదాపుల్లో ఉన్న గ్రామాలలో పోటీ మరింత తీవ్రంగా ఉంది. మొదటి విడత అభ్యర్థులకు కొంత ఉపశమనం ఉన్నప్పటికీ, రెండు, మూడవ విడతలలో పోటీ చేసే అభ్యర్థులకు సమయం ఉండటంతో ఇప్పటి నుంచే ఓటర్లను ప్రసన్నం చేసుకునేందుకు భారీగా డబ్బు ఖర్చు చేయాల్సి వస్తుంది. దీంతో ఇప్పటినుంచే ఖర్చు చేస్తే అప్పుల పాలయ్యే అవకాశం ఉందని పలువురు అభ్యర్థులు ఆందోళన వ్యక్తం చేస్తున్నారు.
పదవిపై వ్యామోహంతో..
పదవిపై ఉన్న వ్యామోహంతో సర్పంచ్‌గా నిలబడాలని చాలామంది ఉవ్విళ్లూరుతున్నారు. ఎలాగైనా పదవి దక్కించుకోవాలని సర్వశక్తులు ఒడ్డుతున్నారు. ఈ విషయంలో వెనుక ముందు ఆలోచించకుండా ఖర్చు చేసి అప్పుల పాలైన సంఘటనలు గతంలో అనేకం ఉన్నాయి. బరిలో దిగిన తర్వాత ఎంత మేరకు అయినా ఖర్చు చేయాల్సిన పరిస్థితి రావడంతో, కొందరు భూములు అమ్ముకోవడం, మరికొందరు తమ భార్య బంగారు నగలను సైతం అమ్ముకోవడంతో పాటు అప్పులు చేసి ఇబ్బందులు పడుతున్న సంఘటనలు చోటు చేసుకుంటున్నాయి. కొందరు ఓటర్లు ఒకవైపునే ఉంటూ మరోవైపుకు ప్రచారం చేస్తూ ఇరువైపులా అందిన కాడికి దోచుకుంటున్నారనే అభిప్రాయాలు కూడా వినిపిస్తున్నాయి.
Also Read: Hari Chandana Dasari: తెలంగాణ అభివృద్ధిలో యువత ముందుండాలి : కలెక్టర్ హరిచందన దాసరి!
పల్లెల్లో సందడి..
సర్పంచ్ ఎన్నికలు రావడంతో పల్లెల్లో సందడి నెలకొన్నది. రచ్చబండలు, టీ స్టాళ్ల వద్ద అభ్యర్థుల వ్యక్తిత్వం, పనితీరుపై చర్చ సాగుతుంది. అభివృద్ధికి పాటుపడే వ్యక్తులను ఎన్నుకోవాలని కొంతమంది అభిప్రాయాలు వ్యక్తం చేస్తున్నప్పటికీ, చాలా సందర్భాలలో డబ్బు పలుకుబడి ఉన్న వారిదే పైచేయి అవుతుంది. దీంతో చాలా గ్రామాలలో అభివృద్ధి లేకుండా పోతుందని ప్రజలు ఆవేదన వ్యక్తం చేస్తున్నారు.
పదవులకు వేలం..
మరోవైపు, జోగులాంబ గద్వాల జిల్లాలోని గద్వాల నియోజకవర్గంలో సర్పంచ్ గిరికి వేలంపాట నిర్వహిస్తున్నారు. ఎవరు ఎక్కువ చెబితే వారికే గ్రామ ప్రథమ పౌరుడి ఎంపిక గ్రామ పెద్దల సమక్షంలో జరుగుతుంది. మిట్టదొడ్డి అనే గ్రామంలో ఏకంగా ₹90 లక్షలకు వేలంలో సర్పంచ్ పదవిని దక్కించుకోవడం విశేషం. ప్రజాస్వామ్య పద్ధతిలో ఎన్నికలు జరగాల్సింది పోయి, వేలం నిర్వహించి పదవిని అంటకట్టడం ఎంతవరకు సమంజసమని ప్రజాస్వామ్యవాదులు ఆవేదన వ్యక్తం చేస్తున్నారు. డబ్బులు పెట్టినవారు తిరిగి డబ్బులు సంపాదించుకోవడానికే ప్రయత్నిస్తారే తప్ప గ్రామాభివృద్ధికి పాటుపడరనే అభిప్రాయాన్ని సాధారణ ప్రజలు వెలిబుచ్చుతున్నారు. డబ్బులకు పదవులు కొన్న వారిపై కఠిన చర్యలు తీసుకొని, ఎన్నికల ప్రక్రియ పారదర్శకంగా జరిగేలా కృషి చేసి, ప్రజాస్వామ్యాన్ని పరిరక్షించాలని ప్రజలు అధికార యంత్రాంగాన్ని కోరుతున్నారు.
Also Read: Ramchander Rao: ఉన్న కార్పొరేషన్‌కే సౌకర్యాలు లేవు మళ్లీ విలీనమా? : రాంచందర్ రావు
