Gadwal District: ఏకగ్రీవాలతో గ్రామాభివృద్ధి సాధ్యమా? వేలం నిర్వహించకుండా అవగాహన కల్పిస్తున్న అధికారులు

Gadwal District: ప్రజాస్వామ్యబద్ధంగా జరగాల్సిన ఎన్నికలల్లో ఓటు ద్వారా ప్రజాప్రతినిధులను ఎన్నుకోవాల్సి ఉంటుంది. కానీ సర్పంచు పదవుల అమ్మకాలు జోరుగా సాగుతున్నాయి. రూ.లక్షలు పెట్టు సర్పంచు పదవి పట్టు అన్నట్లు వ్యవహారాలు నడుస్తున్నాయి. గ్రామాల్లో పెద్దల సమక్షంలో చర్చలు జరిపి సర్పంచు పదవులకు బహిరంగ వేలం నిర్వహించుకుని ఏకగ్రీవం చేసుకుంటున్నారు.

జోగులాంబ గద్వాల(Gadwal District) జిల్లాలో గ్రామపంచాయతీ ఎన్నికల నోటిఫికేషన్ వెలువడగా మొదటి విడత నామినేషన్ల ప్రక్రియ పూర్తయింది. జిల్లాలో రెండు రోజుల పాటు వేలంపాట నిర్వహించి ఏకగ్రీవం ప్రక్రియను వివిధ గ్రామాలలో పెద్దల సమక్షంలో చేపట్టారు.. ఎవరూ ఎక్కువ ఇస్తే వారికే గ్రామాలలో మద్దతు ప్రకటించారు. గ్రామాభివృద్ధికి, అలయాల అభివృద్ధి కోసం సర్కారు వారి పాట దాదాపు రూ.10 లక్షలకు పాట ప్రారంభించి రూ.90లక్షల వరకు వేలం పాట పాడి గ్రామ ప్రధమ పౌరుడు పదవిని పొందారు.

పోటాపోటీగా వేలం పాట పాడి పదవులు 

ఈ వేలం పాటలో ఎవరూ ఎక్కువగా పడితే వారే గ్రామానికి సర్పంచు. సర్పంచుల పదవులకు గ్రామాల్లో అభ్యర్థులు పోటాపోటీగా వేలం పాట పాడి పదవులను దక్కించుకున్నారు. సుమారు 200మందితో చర్చలు నిర్వహించి వేలం పాట నిర్వహిస్తున్నారు. పైసలున్నవారు మాత్రం గ్రామ సర్పంచుగా ఎన్నికైయ్యేలా ప్రస్తుత పరిస్థితి నెలకొంది. దీనితో ప్రజాస్వామ్యాన్ని ఆపహాస్యం చేసేలా ఉందని పలు సంఘాల నాయకులు విమర్శిస్తున్నారు.

గ్రామ పెద్దల సమక్షంలో గ్రామ అభివృద్ధి కోసం వేలంపాట

గట్టు మండలం మిట్టదొడ్డి గ్రామంలో గ్రామ పెద్దల సమక్షంలో గ్రామ అభివృద్ధి కోసం వేలంపాట నిర్వహించిన గ్రామస్తులు. అందులో భాగంగా వేలంపాటలో 90 లక్షల రూపాయలకు పాట పాడి శేఖర్ అనే వ్యక్తి సర్పంచ్ పదవిని సొంతం చేసుకున్నారు. గద్వాల మండలంలోని కొండపల్లి గ్రామంలో రూ.60 లక్షలకు ఓ సీడ్ ఆర్గనైజర్ కృష్ణారెడ్డి సర్పంచు పదవికి ఏకగ్రీవమైయ్యారు. గ్రామ అభివృద్ధి కోసం ముందుగా రూ.15 లక్షల గ్రామ పెద్దల సమక్షంలో ఇచ్చారు.గద్వాల మండలం వీరాపురం గ్రామాభివృద్ధికి నీలం రాముడు రూ.50 లక్షల సర్పంచు ఆభ్యర్థిగా వేలం పాడారు. ముందస్తుగా రూ.5లక్షలు అడ్వాన్సు ఇచ్చారు.

Also Read: Gadwal District: ఆ జిల్లాలో ఆగని అక్రమ వ్యాపారం.. అక్రమార్కులకు వరమైన తవ్వకాలు

గ్రామ అభివృద్ధి కోసం రోడ్డు మార్గం ఏర్పాటు

అదేవిధంగా కుర్వపల్లి(నల్లదేవునిపల్లి)లో ఆంజనేయ స్వామి ఆలయ అభివృద్ధికి రూ. 45లక్షలు ఇచ్చి తిరుపతి సర్పంచ్ గా ఏకగ్రీవమైనట్లు గ్రామ పెద్దలు ప్రకటించుకున్నారు. దీనికి అడ్వాన్స్ రూ.15 లక్షలు డబ్బులు ఇచ్చారని సమాచారం. అదే మండలంలోని పుటాన్ పల్లి గ్రామాభివృద్ధికి పావని అనే మహిళ రూ.15 లక్షలు ఇవ్వడం ద్వారా సర్పంచ్ అభ్యర్థిగా ఏకగ్రీవమైయ్యారు. దీనికి ముందస్తు అడ్వాన్సుగా రూ.4లక్షలు ఇచ్చారు. ఈడుగోనిపల్లి గ్రామ అభివృద్ధి కోసం రోడ్డు మార్గం ఏర్పాటు కోసం సరస్వతి రూ.9.80లక్షల సర్పంచ్ అభ్యర్ధిగా ఏకగ్రీవమయ్యారు. దీనికి అడ్వాన్స్ రూ. 2లక్షలు ఇచ్చినట్లు తెలిసింది. అదేవిధంగా మల్దకల్ మండలం పెద్దోడి గ్రామంలో రాములు అనే వ్యక్తి గ్రామానికి స్మశాన వాటిక కోసం ఒక ఎకరం పొలం ఇచ్చి పెద్దల సమక్షంలో ఏకగ్రీవం అయ్యారు.సర్పంచ్ ఎన్నికల సందర్భంగా గద్వాల నియోజకవర్గంలో దాదాపు 15 గ్రామాలు ఏకగ్రీవమైనట్లు తెలుస్తోంది.

నామినేషన్ వేయకుండా అడ్డగింత

కేటీ దొడ్డి మండలం చింతలకుంట గ్రామానికి క్లస్టర్ గా ఉన్న ఎర్సన్ దొడ్డి సెంటర్ కు నామినేషన్ వేయడానికి వచ్చిన వ్యక్తి యొక్క నామినేషన్ పత్రాలు తీసుకొని చించి వేశారని ప్రచారం నడుస్తోంది. అదే గ్రామానికి చెందిన ఓ వ్యక్తి గ్రామాభివృద్ధికి 38.50 లక్షలు ఇచ్చి ఏకగ్రీవం అయ్యారు. అందులో భాగంగానే ఏకగ్రీవంగా ఎన్నికైన వ్యక్తులు నామినేషన్ వేసే సెంటర్ల దగ్గర ఎవరిని రానీయకుండా అడ్డుకోవడానికి అక్కడ కూర్చుని బెదిరింపులకు గురి చేశారని గ్రామస్తులు తెలిపారు. పోలీసులు అక్కడికి చేరుకుని పరిస్థితిని అదుపులోకి తీసుకొచ్చారు.సర్పంచ్ అభ్యర్థిగా ప్రపోజల్ చేసిన వ్యక్తిపై దాడి జరిగిందనే ప్రచారం ఉంది.

వేలంపాట నిరోధించేందుకు ప్రజలకు అవగాహన

గ్రామపంచాయతీ సంస్థల ఎన్నికల్లో ఆయా పదవుల వేలంపాటతో ఏకగ్రీవాలను నిరోధించేందుకు జిల్లా ఎన్నికల అధికారులు గ్రామాల్లో పర్యటించి ప్రజలకు అవగాహన కల్పిస్తున్నట్లు జిల్లా కలెక్టర్ బి. ఎం. సంతోష్ తెలిపారు. . అభ్యర్థులను భయపెట్టడం, వేలంపాట ద్వారా పదవులను ఎంపిక చేయడం నేరమన్నారు. అప్రజాస్వామికంగా వ్యవహరించిన ఘటనలపై పూర్తిస్థాయిలో విచారణ జరిపించి బాధ్యులపై చట్ట ప్రకారం చర్యలు తీసుకోవడం జరుగుతుందన్నారు.

మరో రెండు విడతల్లో జిల్లాల్లోనీ పలు మండలాలకు సంబంధించి గ్రామపంచాయతీలలో ఎన్నికలు జరగాల్సి ఉన్నందున ఆయా గ్రామాల పెద్దలు, ఓటర్లు వేలం పాట పదవులను ప్రోత్సహించరాదన్నారు. ఎమ్మార్వోలు, ఎంపీడీవోలు, ఎస్ఐలతో కూడిన తమ ఎన్నికల యంత్రాంగం ఇటువంటి అనైతిక పదవుల ఎంపికపై నిఘా ఉంచుతుందని, బాధ్యులపై చట్ట ప్రకారం కఠిన చర్యలు తీసుకోవడం జరుగుతుందని కలెక్టర్ హెచ్చరించారు. సర్పంచ్ పదవుల వేలంపాట ఏకగ్రీవాలకు ప్రోత్సహించిన వారికి అపరాధంగా జరిమానా విధించడమే కాక ఒక సంవత్సరం వరకు జైలు శిక్ష లేదా రెండు విధించవచ్చు అన్నారు. అపరాధము చేసిన వ్యక్తి ఆరు సంవత్సరాలపాటు ఎన్నికలలో పోటీ చేయడానికి కూడా అనర్హులు అవుతారని తెలిపారు.

Also Read: Gadwal District: పంచాయతీ ఎన్నికల్లో ఖర్చు బారెడు.. ఆందోళనలో అభ్యర్థులు