Eagle Team Raids: డ్రగ్స్ రేవ్ పార్టీపై ఈగల్ టీం రెయిడ్స్.. పార్టీలో డిప్యూటీ తహసీల్దార్!

Eagle Team Raids: పక్కగా సేకరించిన సమాచారం మేరకు ఈగల్ టీం(Eagle Team) అధికారులు గచ్చిబౌలి పోలీసులతో కలిసి డ్రగ్ రేవ్ పార్టీపై దాడి జరిపారు. ఈ క్రమంలో ఆరుగురిని అరెస్ట్ చేశారు. వీరి నుంచి 20గ్రాముల కొకైన్​, 8ఎక్టసీ పిల్స్, 3గ్రాముల ఎండీఎంఏ డ్రగ్​ ను స్వాధీనం చేసుకున్నారు. అరెస్టయిన వారిలో ఇద్దరు డ్రగ్ పెడ్లర్లు, ఒక ట్రాన్స్​ పోర్టర్​, ముగ్గురు వినియోగదారులు ఉన్నారు. నిందితుల్లో డిప్యూటీ తహసిల్దార్ తోపాటు మల్నాడు రెస్టారెంట్​ డ్రగ్ కేసు నిందితులు కూడా ఉండటం గమనార్హం. మాదాపూర్​ జోన్​ డీసీపీ వినీత్(DCP Vineeth) మీడియా సమావేశంలో వివరాలు వెల్లడించారు.

కొండాపూర్​ లోని రాజేశ్వరి నిలయం సర్వీస్ అపార్ట్ మెంట్ లో డ్రగ్స్ తో కొందరు పార్టీ చేసుకుంటున్నట్టుగా ఈగల్ టీం అధికారులకు సమాచారం అందింది. ఈ మేరకు గచ్చిబౌలి పోలీసులతో కలిసి దాడి జరుపగా తూర్పు గోదావరి జిల్లాకు చెంది ప్రస్తుతం ప్రగతినగర్​ లో ఉంటూ డ్రగ్ పెడ్లర్ గా మారిన వ్యాపారి తేజ (28), శేరిలింగంపల్లి నివాసి, పౌల్ట్రీ వ్యాపారి, పెడ్లర్ అయిన విక్రమ్​, నార్సింగి వాస్తవ్యుడు, డ్రగ్ వినియోగదారు అయిన మన్నె నీలిమ (41), డ్రగ్​ ట్రాన్స్​ పోర్టర్ అయిన బెంగళూరు నివాసి చందన్ (20), కొండాపూర్​ నివాసి, వైన్ షాప్​ వ్యాపారి పురుషోత్తం రెడ్డి, శేరిలింగంపల్లి సైబర్ మెడోస్​ నివాసి, సాఫ్ట్ వేర్​ ఇంజనీర్​ భార్గవ్​, డ్రగ్​ సప్లయర్​, బెంగళూరు వాసి అయిన రాహుల్​ ఎలియాస్​ సోనూ పట్టుబడ్డారు.

ముగ్గురు స్నేహితులు

తేజ, విక్రమ్​, నీలిమలు పాత స్నేహితులు. చాలా రోజులుగా ఈ ముగ్గురు కొకైన్​ పార్టీలకు అలవాటు పడ్డారు. బెంగళూరుకు వెళ్లినపుడు పరిచయం అయిన రాహుల్ నుంచి తేజ(Teja) తరచూ కొకైన్ తీసుకు వచ్చేవాడు. మొదట్లో రాజమండ్రిలో డ్రగ్ పార్టీలు చేసుకున్న ఈ ముగ్గురు ఆ తరువాత హైదరాబాద్(Hyderabad) వచ్చి అదే అలవాటును కొనసాగిస్తూ వచ్చారు. డ్రగ్ పార్టీలు చేసుకోవటానికి సర్వీస్ అపార్ట్​ మెంట్ లను అద్దెకు తీసుకునేవారు. కొకైన్​ కొనటానికి అవసరమయ్యే డబ్బును అందరూ కలిసి ఇచ్చేవారు. దానిని తేజ తనకు డ్రగ్ సప్లయ్ చేస్తూ వస్తున్న రాహుల్ చెప్పిన అకౌంట్లలోకి ట్రాన్స్ ఫర్ చేసేవాడు.

Also Read: BRS Party: ప్రజా సమస్యలపై స్పందన కరువు.. సమస్యలపై కమిటీ సైలెంట్?

‘మల్నాడు’ నిందితుని దోస్త్

ఇక, డ్రగ్​ రేవ్ పార్టీ చేసుకుంటూ దొరికిన విక్రమ్ మల్నాడు రెస్టారెంట్ డ్రగ్ కేసులో అరెస్టయిన కీలక నిందితుడు సూర్యతోపాటు డ్రగ్​ సప్లయర్ రాహుల్​ స్నేహితుడు. జనవరి 1వ తేదీన తన మరో మిత్రుడైన చిశ్తీతో కలిసి కారులో ఢిల్లీ వెళ్లిన విక్రమ్ నైజీరియాకు చెందిన పెడ్లర్ నుంచి 12గ్రాముల కొకైన్​ కొని తిరిగి వస్తూ నిజామాబాద్​ జిల్లా డిచ్​ పల్లి పోలీసులకు పట్టుబడ్డాడు. అయితే, రాహుల్(Rahul)​ ఓ పోలీస్ అధికారి కొడుకు కావటంతో డిచ్​ పల్లి పోలీసులు అతను పరారీలో ఉన్నట్టుగా రికార్డుల్లో రాసి వదిలేశారు. మల్నాడు రెస్టారెంట్ కేసులో అరెస్టయిన తరువాత విషయం వెలుగు చూడటంతో ప్రిజనర్​ ట్రాన్సిట్ వారెంట్ దాఖలు చేసి రాహుల్​ ను అదుపులోకి తీసుకున్నారు.

కింగ్​ పిన్​ తేజ

పట్టుబడ్డ ఆరుగురు నిందితుల్లో తేజ కింగ్ పిన్ గా ఉన్నాడు. రాహుల్​ నుంచి కొకైన్​ కొంటూ తరచూ డ్రగ్ పార్టీలు ఏర్పాటు చేస్తూ వస్తున్నాడు. డిసెంబర్​ 31న డిప్యూటీ తహసిల్దార్​ గా పని చేస్తున్న మణిదీప్ తో కలిసి గోవాలో డ్రగ్స్​ తో రేవ్ పార్టీ జరుపుకొన్నాడు. దీనికి తేజ, నీలిమలను కూడా పిలుచుకున్నాడు. ఇక, తేజ, నీలిమ, విక్రమ్​ లు రాజమండ్రిలో మణిదీప్​ కు చెందిన ఫార్మ్​ హౌస్​ లో కూడా పలుమార్లు డ్రగ్​ పార్టీలు చేసుకున్నారు.

చర్మ సౌందర్యం కోసం

ఇక, పోలీసులు జరిపిన విచారణలో తేజ తన చర్మ సౌందర్యాన్ని మెరుగు పరుచుకునేందుకు గ్లూటాక్స్ అనే ఇంజక్షన్లు తీసుకుంటుంటాడని వెల్లడైంది. ఒక్కో ఇంజక్షన్​ ఖరీదు 40వేల రూపాయలను తెలిసింది. అయితే, బెంగళూరులో ఇది 11వేలకే దొరుకుతుండటంతో రాహుల్​ ద్వారా వాటిని తెప్పించుకునే వాడని వెల్లడైంది. ఇంజక్షన్లు పంపించిన ప్రతీసారి రాహుల్​ అదే డబ్బాలో కొకైన్​ కూడా పంపించే వాడని నిర్ధారణ అయ్యింది. కొన్నిసార్లు డీటీడీసీ కొరియర్ ద్వారా కూడా డ్రగ్స్ ను పంపించినట్టుగా తేలింది. పట్టుబడ్డ అందరికీ టెస్టులు జరిపించగా ఒక్క చందన్​ మినహా మిగిలినవారు డ్రగ్స్ వాడుతున్నట్టు నిర్ధారణ అయ్యిందని డీసీపీ వినీత్ తెలిపారు. డ్రగ్స్ దందా చేస్తున్నవారు…వాటిని వినియోగిస్తున్న వారి గురించి తెలిస్తే 1908 నెంబర్ కు సమాచారం ఇవ్వాలని ఆయన కోరారు. 8712671111 నెంబర్​ కు వాట్సాప్​ కూడా చేయవచ్చన్నారు. tsnabho-hyd@tspolice.gov.in కు మెయిల్ కూడా చేయవచ్చన్నారు. సమాచారం ఇచ్చిన వారి వివరాలను గోప్యంగా పెడతామని తెలిపారు.

Also Read: Telangana Politics: ఫిరాయింపు ఎమ్మెల్యేల్లో గుబులు.. స్పీకర్ 5 గురికి నోటీసులు?