December Bank Holidays: బ్యాంకు పనులుంటే ముందు చక్కబెట్టుకోండి.. డిసెంబర్‌లో బ్యాంక్ హాలిడేస్ లిస్ట్ ఇదే

December Bank Holidays: ఆర్థిక వ్యవహారాల నిర్వహణలో బ్యాంకుల పాత్ర ఎంత ముఖ్యమైనదో ప్రత్యేకంగా చెప్పాల్సిన పనిలేదు. ఈ మధ్యకాలంలో డిజిటల్ లావాదేవీల వినియోగం పెరిగిపోయినప్పటికీ, బ్యాంకుల్లోనే జరగాల్సిన ముఖ్యమైన కార్యకలాపాలు చాలానే ఉన్నాయి. అయితే, బ్యాంక్ సెలవు దినాల్లో అలాంటి కార్యకలాపాలకు అంతరాయాలు ఏర్పడుతుంటాయి. ఎలాంటి ఇబ్బందులు ఎదురవ్వకూడదనుకుంటే, ముందుగానే బ్యాంక్ హాలీడేస్‌ను తెలుసుకొని, షెడ్యూల్‌కు అనుగుణంగా పనులు చక్కదిద్దుకోవడం ఉత్తమం. అలాంటి బ్యాంక్ వినియోగదారుల కోసం భారతీయ రిజర్వ్ బ్యాంక్ (RBI) డిసెంబర్ నెలకు సంబంధించిన బ్యాంక్ హాలిడేస్ లిస్ట్‌ను హాలిడేస్ క్యాలెండర్‌లో (December Bank Holidays) ప్రస్తావించింది. వాటిని చూసి జాగ్రత్తపడితే ఉపయోగకరంగా ఉంటుంది.

ఆర్బీఐ అధికారిక సెలవుల క్యాలెండర్ ప్రకారం, డిసెంబర్ 2025 నెలలో బ్యాంకులకు మొత్తం 13 సెలవులు ఉన్నాయి. అయితే, ఇవన్నీ ఒకే రాష్ట్రంలో కాదు. వేర్వేరు రాష్ట్రాలలో అక్కడి పండుగలు, ప్రత్యేక దినోత్సవాల సందర్భంగా ఈ సెలవులు వచ్చాయి. దేశవ్యాప్తంగా చూసుకుంటే, క్రిస్మస్ సందర్భంగా ఒక్క డిసెంబర్ 25న మాత్రమే దేశవ్యాప్తంగా బ్యాంకులకు సెలవు దినంగా ఉంది. మిగతా సెలవులు రాష్ట్రాల వారీగా ఉన్నాయి. ఈ రాష్ట్రాల వారీ సెలవులతో పాటు, నెలలోని అన్ని ఆదివారాలు, రెండవ, నాలుగవ శనివారాలలో కూడా బ్యాంకులు మూసివుంటాయి. ప్రాంతీయ పండుగలు, సాంస్కృతిక ఆచారాలు, చారిత్రక ఘటన ఆధారంగా ఆయా రాష్ట్రాల్లో ఈ బ్యాంకు హాలిడేస్ వచ్చాయి.

Read Also- Jupally Krishna Rao: వేలంపాటతో పదవులు పొందేవారు నా దగ్గరకు రావొద్దు : మంత్రి జూపల్లి కృష్ణారావు

రాష్ట్రాల వారీగా హాలిడేస్ ఇవే

ఆర్బీఐ హాలిడేస్ క్యాలెండర్ షెడ్యూల్ ప్రకారం, అరుణాచల్ ప్రదేశ్, నాగాలాండ్‌లలో డిసెంబర్ 1న రాష్ట్ర ఆవిర్భావ దినోత్సవం, స్వదేశీ విశ్వాస దినోత్సవం సందర్భంగా బ్యాంకులకు సెలవు. ఇక, గోవాలో డిసెంబర్ 3న సెయింట్ ఫ్రాన్సిస్ జేవియర్ విందు, డిసెంబర్ 19న గోవా విముక్తి దినోత్సవం సందర్భంగా ఆ రాష్ట్రంలోని బ్యాంకులకు సెలవు దినంగా ప్రకటించారు. మేఘాలయలో పా టోగన్ నెంగ్మిన్జా సంగమా వర్ధంతి డిసెంబర్ 12న, యు సోసో థామ్ వర్ధంతి సందర్భంగా డిసెంబర్ 18న, యు కియాంగ్ నంగ్బా వర్ధంతి సందర్భంగా డిసెంబర్ 30న హాలిడేస్‌గా ఆర్బీఐ డిక్లేర్ చేసింది.

మరికొన్ని రాష్ట్రాల విషయానికి వస్తే, సిక్కింలో డిసెంబర్ 20, 22 తేదీల్లో స్థానిక పండుగ సందర్భంగా బ్యాంకులు మూసి ఉంటాయి. ఈ రెండు తేదీల మధ్య ఆదివారం రావడంతో ఆ రాష్ట్రంలో వరుసగా మూడు రోజులపాటు బ్యాంకులు మూసి ఉంటాయి. మిజోరం, నాగాలాండ్, మేఘాలయ రాష్ట్రాలలో డిసెంబర్ 24 నుంచి 27 వరకు క్రిస్మస్ సెలవులు ఉంటాయి. కాబట్టి, ఆయా రాష్ట్రాల్లో వరుసగా నాలుగు రోజులు బ్యాంకులు మూసివేసి ఉంటాయి. డిసెంబర్ 31న మిజోరం, మణిపూర్‌లలో నూతన సంవత్సరం సెలవు ఉంటుంది. కాబట్టి, ఆదివారాలు, నిర్దిష్ట శనివారాలను దృష్టిలో ఉంచుకొని బ్యాంకు పనులను ముందుగానే చక్కదిద్దుకోవడం మంచిది. తెలుగు రాష్ట్రాల విషయానికి వస్తే, ఒక్క డిసెంబర్ 25న మినహా స్థానికంగా ఎలాంటి పండుగలు లేవు. కాబట్టి, మిగతా రోజుల్లో బ్యాంకులు సాధారణ రోజుల మాదిరిగానే సేవలు అందిస్తాయి.

Read Also- Hospital Negligence: తుని ఆసుపత్రిలో వైద్యుల నిర్లక్ష్యం.. కాలి లోపలే బ్లేడు మర్చిపోయిన ఘటన!