Epaper 
YS Jagan on AP Govt: ఆంధ్రప్రదేశ్ మాజీ ముఖ్యమంత్రి, వైసీపీ అధినేత వైఎస్ జగన్ మోహన్ రెడ్డి తన సొంత నియోజకవర్గమైన పులివెందుల (Pulivendula)లో పర్యటిస్తున్న సంగతి తెలిసిందే. రెండో రోజు పర్యటనలో భాగంగా బ్రాహ్మణపల్లె సమీపంలోని అరటి రైతుల వద్దకు జగన్ స్వయంగా వెళ్లారు. వారి సమస్యలను అడిగి తెలుసుకున్నారు. అనంతరం నిర్వహించిన మీడియా సమావేశంలో కూటమి ప్రభుత్వంపై విరుచుకుపడ్డారు. అరటి రైతుల బాధలు చూసైనా చంద్రబాబుకు బుద్ధి రావాలని దేవుడ్ని ప్రార్థిస్తున్నట్లు ఘాటుగా వ్యాఖ్యానించారు.
నిరూపయోగంగా కోల్డ్ స్టోరజీ
అరటి రైతుల బాధలు విన్న అనంతరం జగన్.. మీడియాతో మాట్లాడారు. 2024 మార్చిలో ఇక్కడ ఇంటిగ్రేటెడ్ అరటి కోల్డ్ స్టోరేజీని ప్రారంభించినట్లు జగన్ గుర్తు చేశారు. ప్రస్తుత ప్రభుత్వ దానిని వినియోగించిన పాపాన పోలేదని అన్నారు. 600 మెట్రిక్ టన్నులు అరటిని నిలువ చేసే సామర్థ్యం ఈ కోల్డ్ స్టోరేజికి ఉందని జగన్ అన్నారు. కరెంట్ ఛార్జీలు పెరుగుతాయన్న కారణంతోనే దానిని నిలిపివేశారని జగన్ ఆగ్రహం వ్యక్తం చేశారు. వైసీపీ హయాంలో వ్యవసాయాన్ని పండుగలా జరిపామన్న జగన్.. ప్రస్తుతం అంతా తిరోగమనంలో ఉందని విమర్శించారు.
పులివెందుల
మాజీ ముఖ్యమంత్రి, వైఎస్సార్సీపీ అధినేత శ్రీ వైయస్‌ జగన్ రెండో రోజు పులివెందుల పర్యటన
మాజీ ముఖ్యమంత్రి, వైఎస్సార్సీపీ అధినేత శ్రీ వైయస్‌ జగన్ పులివెందుల పర్యటనలో భాగంగా బ్రాహ్మణపల్లె గ్రామ సమీపంలోని అరటి తోటల వద్దకు చేరుకుని నష్టపోయిన అరటి… pic.twitter.com/28Q6DKTSsw
— YSR Congress Party (@YSRCParty) November 26, 2025
‘రైతులకు చిల్లిగవ్వ ఇవ్వలేదు’
18 నెలల్లో ప్రకృతి విపత్తు కారణంగా 16 సార్లు అరటి రైతులు నష్టపోయారని జగన్ పేర్కొన్నారు. రైతులకు ఇన్ పుట్ సబ్సిడి ఇవ్వాల్సి ఉన్నా.. కూటమి ప్రభుత్వం చిల్లిగవ్వ ఇవ్వలేదని మండిపడ్డారు. కరువు, వర్షాల కారణంగా పంటలు నష్టపోతుంటే సబ్సిడీ ఇవ్వకుండా ఎగ్గొడుతున్నారని ఆగ్రహం వ్యక్తం చేశారు. మరోవైపు సీఎం చంద్రబాబు పుణ్యాన ఎరువులను బ్లాక్ లో కొనే దుస్థితి రైతులకు వచ్చిందని విమర్శించారు. ఫలితంగా పంటపై పెట్టుబడి ఖర్చులు భారీగా పెరిగిపోయాయని అన్నారు.
‘ఏ పంటకు గిట్టుబాటు ధర లేదు’
గత వైసీపీ పాలనలో రైతులకు సాయంగా రూ.13,500 క్రమం తప్పకుండా ఇచ్చినట్లు జగన్ గుర్తుచేశారు. అయితే అన్నదాత సుఖీభవ పేరుతో పీఎం కిసాన్ తో సంబంధం లేకుండా రూ. 20 వేలు ఇస్తానని చంద్రబాబు ప్రభుత్వం చెప్పిందని పేర్కొన్నారు. కానీ రూ.19 వేలు మాత్రమే ఇచ్చి రైతులను మోసం చేశారని ఆరోపించారు. ప్రస్తుతం రాష్ట్రంలో ఏ పంటకు గిట్టుబాటు ధర రాని పరిస్థితి నెలకొందని అన్నారు.
పొలంలోనే ఉత్పత్తులు కుళ్లిపోతున్నా..
తమ పాలనలో జాయింట్ కలెక్టర్ కనుసన్నల్లో రైతుల నుంచి ధాన్యం కొనుగోళ్లు జరిగినట్లు జగన్ చెప్పారు. రూ.7,740 కోట్లు పంటల కొనుగోలుకే వెచ్చించినట్లు చెప్పారు. ప్రస్తుతం రైతుల పరిస్థితి దారుణంగా ఉన్నట్లు జగన్ ఆవేదన వ్యక్తం చేశారు. ముఖ్యంగా అరటి రైతుల పరిస్థితి వర్ణానాతీతంగా ఉన్నట్లు పేర్కొన్నారు. పొలంలోనే ఉత్పత్తులు కుళ్ళి పోతున్నా పట్టించుకునేవారు లేరని అసహనం వ్యక్తం చేశారు. ‘గతంలో హార్టికల్చర్ ఉత్పత్తుల కోసం అనంతపురం నుంచి రైళ్లు నడిపాం. 3 లక్షల టన్నుల అరటిని ఎగుమతిచేశాం. మార్కెట్ లో డిమాండ్ క్రియేట్ చేసి ధర వచ్చేలా చేశాం’ అని జగన్ అన్నారు.
Also Read: Viral Video: షాకింగ్ ఘటన.. కాళీమాత విగ్రహానికి.. మేరిమాత అలంకరణ
రాష్ట్ర ప్రభుత్వానికి వార్నింగ్
అరటి ఉత్పత్తిలో గత రాష్ట్ర ప్రభుత్వం అవార్డులు కూడా పొందిందని వైఎస్ జగన్ గుర్తు చేశారు. అటు పొగాకు, ఉల్లి, చీని రైతులకు సైతం గిట్టుబాటు ధరలు లభించడం లేదని ఆరోపించారు. రైతులను పట్టించుకోకపోతే మరో గొప్ప ఉద్యమానికి శ్రీకారం చుడతామని రాష్ట్ర ప్రభుత్వాన్ని జగన్ హెచ్చరించారు. గతంలో చేసిన దానికంటే ఇది తీవ్రస్థాయిలో ఉంటుందని స్పష్టం చేశారు. ఇప్పటికైనా చంద్రబాబు మేలుకొని అరటి రైతులను ఆదుకోవాలని జగన్ సూచించారు.
