Bigg Boss 9: రసవత్తరంగా సాగుతున్న చివరి కెప్టెన్సీ పోరు..

Bigg Boss 9: బిగ్ బాస్ తెలుగు సీజన్ 9 రణరంగం చివరి అంకానికి చేరుకుంది. ఈ ప్రయాణంలో 80వ రోజు ప్రోమో వీక్షకుల్లో మరింత ఉత్సాహాన్ని నింపుతోంది. ఈ సీజన్ చివరి కెప్టెన్సీ కోసం బిగ్ బాస్ ఇచ్చిన టాస్కులు రోజురోజుకు మరింత ఖటినంగా మారుతున్నాయి. తాజా ఎపిసోడ్‌లో ఇంటి సభ్యులకు షాక్ ఇస్తూ, బయట నుంచి ఒక కొత్త వ్యక్తిని బిగ్ బాస్ హౌస్‌లోకి పంపి, వారితో సభ్యులు పోటీ పడాల్సి ఉంటుందని బిగ్ బాస్ ప్రకటించారు. ఈ రోజు బిగ్ బాస్ ఇంట్లోకి అడుగుపెట్టిన కొత్త వ్యక్తి ప్రేరణ. ఆమె హౌస్‌లోకి అడుగుపెట్టిన తర్వాత సభ్యులతో కొంతసేపు ముచ్చటిస్తూ, “నేను వచ్చేముందు ఇక్కడ ఇంకో హౌస్ కట్టారు అనుకున్నా..!” అంటూ సరదాగా వ్యాఖ్యానించారు. అనంతరం, బిగ్ బాస్ మాట్లాడుతూ.. “బిగ్ బాస్ రణరంగం చివరి అంకానికి చేరుకుంది. ఈ రోజు బిగ్ బాస్ ఇంటిలోని సభ్యులతో ఆడాల్సి ఉంటుంది” అని ప్రేరణకు సూచించారు.

ఈ ఛాలెంజింగ్ టాస్క్‌ను స్వీకరించడానికి తనూజ ముందుకొచ్చారు. “ప్రేరణతో గేమ్ ఆడటం చాలా కష్టం అని నాకు తెలుసు కానీ నేను ఈ రోజు ప్రేరణతో టాస్క్ కంప్లీట్ చేయడానికి సిద్ధంగా ఉన్నాను” అంటూ తన దృఢ నిశ్చయాన్ని వ్యక్తపరిచారు. ఈ రోజు టాస్క్ ‘క్రాస్ ఇట్, క్లైంబ్ ఇట్, రోల్ ఇట్’ పేరుతో అపరిమితమైన వినోదం ఆస్వాదించడానికి సిద్ధంగా ఉండాలని ప్రోమోలో ప్రకటించారు. ప్రోమోను చూసిన నెటిజన్లు సోషల్ మీడియాలో తమ ఫేవరెట్ సభ్యులకు మద్దతు తెలుపుతూ కామెంట్ల వర్షం కురిపించారు. ముఖ్యంగా, తనూజ ప్రదర్శించిన తెగువ, పోరాట పటిమను చూసి ఆమెను ప్రశంసిస్తున్నారు.

ఒక నెటిజన్ కామెంట్ చేస్తూ, ” ప్రేరణ లేడీ టైగర్ ఆమెకు ఇలాంటివి కొత్త ఏం కాదు. తనూజ మాత్రం బాగా ఆడుతుంది. ప్రేరణ జస్ట్ సెకండ్ లో హోల్ వరకూ వెళ్లి తిరిగి వచ్చింది. కానీ వారిద్దరూ బాగా ఆడారు” అని పేర్కొన్నారు. మరొకరు, “తనూజ నువ్వు చాలా టఫ్ కాంపిటేషన్ ఇచ్చావు లక్ మాత్రం ఫేవర్ చేయలేదు. కానీ బాగా ఆడారు.” అంటూ ఆమెకు మద్దతు పలికారు. సీజన్ 8లో స్ట్రాంగ్ కంటెస్టెంట్‌గా ఉన్న ప్రేరణను మెచ్చుకుంటూనే, ఈ సీజన్‌లో తనూజ మైండ్ గేమ్‌లో పర్‌ఫెక్ట్‌గా ఉందని ఇంకో అభిమాని అభిప్రాయపడ్డారు. కెప్టెన్సీ అవసరం లేదు, మీరు నామినేషన్లలో ఉండండి, మేము ఓట్లు వేసి గెలిపిస్తాం అని చెబుతూ.. ఆమెను ట్రోఫీ విన్నర్‌గా అభివర్ణించారు. మరోవైపు, డెమోన్ తనూజను ఉత్సాహపరిచిన తీరును కూడా నెటిజన్లు హైలైట్ చేశారు. మొత్తంగా, ఈ ఎపిసోడ్ ఈ సీజన్‌లోనే అత్యంత ఉత్కంఠభరితమైన పోరాటాలలో ఒకటిగా నిలవనుందని తెలుస్తోంది. హౌస్‌మేట్స్ మధ్య పోటీతో పాటు గెస్ట్ ప్రేరణతో తలపడటం ఈ చివరి కెప్టెన్సీ టాస్క్‌ను మరింత ఆసక్తికరంగా మార్చింది.