Epaper 
Pawan Security Breach: ఈ నెల 26న రాజోలులో పవన్ కళ్యాణ్ పర్యటన
అపరిచిత వ్యక్తి కదలికలు గుర్తింపు
విషయాన్ని డా.బీఆర్ అంబేద్కర్ కోనసీమ జిల్లా ఎస్పీ దృష్టికి తీసుకువెళ్లిన డిప్యూటీ సీఎం కార్యాలయం
ఆంధ్రప్రదేశ్ డిప్యూటీ సీఎం పవన్ కళ్యాణ్ ఈ నెల 26న రాజోలు నియోజకవర్గంలో పర్యటించిన విషయం తెలిసిందే. అయితే, ఈ పర్యటనలో ఓ అపరిచిత వ్యక్తి… పవన్ కళ్యాణ్‌కు చేరువగా సంచరించడాన్ని ఆయన భద్రతా సిబ్బంది గుర్తించింది. ఆ రోజు శంకరగుప్తం డ్రెయిన్ మూలంగా దెబ్బ తిన్న కొబ్బరి తోటలు పరిశీలిస్తున్న సమయంలో, అధికారులతో సంభాషిస్తున్న సందర్భంలోనూ, ఆ తర్వాత కార్యక్రమాల్లో కూడా సదరు వ్యక్తి ఉప ముఖ్యమంత్రికి సమీపంలోనే కదలాడాడు.
వైసీపీ కార్యకర్త?
సదరు వ్యక్తి రాజోలు నియోజక వర్గంలోని వైసీపీకి చెందిన కార్యకర్తగా ఉప ముఖ్యమంత్రి కార్యాలయానికి సమాచారం చేరిందంటూ డిప్యూటీ సీఎం కార్యాలయం ఎక్స్ వేదికగా వెల్లడించింది. అతడి వ్యవహార శైలి, కదలికలపై అనుమానం వ్యక్తమయిందని, ఈ విషయాన్ని డా.బీఆర్ అంబేద్కర్ కోనసీమ జిల్లా ఎస్పీ దృష్టికి ఉప ముఖ్యమంత్రి కార్యాలయ అధికారులు తీసుకువెళ్లారని పేర్కొంది. అనుమానిత వ్యక్తి కదలికలు, కార్యక్రమానికి జారీ చేసిన పాస్ అతడికి చేరడంపై ఉన్న సందేహాలను జిల్లా ఎస్పీకి తెలియజేశారు. సదరు వ్యక్తి కదలికలపై తగిన విచారణ చేపట్టాలని డిప్యూటీ సీఎం కార్యాలయ అధికారులు కోరారు.
జనసైనికుల ఆందోళన
రాజోలులో పవన్ పర్యటనలో ఓ వ్యక్తి అనుమానాస్పదంగా సంచరించడంపై జనసైనికులు, పవన్ అభిమానులు ఆందోళన వ్యక్తం చేస్తున్నారు. ‘‘వారాహి మాత.. అన్ని వేళలా మా నాయకుడికి అండగా ఉండి, నీ బిడ్డను చల్లగా చూడు తల్లి’’ అంటూ ఓ వ్యక్తి కామెంట్ పెట్టాడు. మరొకరు స్పందిస్తూ, ఇది చాలా పెద్ద భద్రతా లోపమని, సదరు వ్యక్తి డిప్యూటీ సీఎంకి చాలా దగ్గరగా వచ్చాడని, దీనిపై పూర్తి స్థాయిలో దర్యాప్తు చేయాలని డిమాండ్ చేశాడు. మరికొందరు స్పందిస్తూ, ‘‘జాగ్రత్తగా ఉండండి అన్నయ్య’’, ‘‘నువ్వే మాకు దిక్కు. నీకు ఏదైనా అయితే రాష్ట్రాన్ని తగలబెట్టేస్తాం కూడా. మోదీ గారూ పవన్‌కు జెడ్ ప్లస్ సెక్యూరిటీ ఎందుకు ఇవ్వకూడదు’’ అని కామెంట్లు పెట్టారు. మరో వ్యక్తి స్పందిస్తూ, ‘వైసీపీ వాడైతే నీ దగ్గరికి రాకూడదా?. వెపన్ ఉంటే సరే ఎటాక్ అనుకోవచ్చు’ అని సందేహాన్ని వెలిబుచ్చాడు.
