Cyber Criminals: ఆస్ట్రేలియా పౌరులే టార్గెట్‌గా మోసాలు.. సైబర్‌ ముఠాకు పోలీసుల చెక్!

Cyber Criminals: ఏకంగా కాల్ సెంటర్​ తెరిచిన సైబర్ క్రిమినల్స్ ఆస్ట్రేలియా దేశ పౌరుల నుంచి కోట్ల రూపాయలు కొల్లగొట్టారు. గుట్టుచప్పుడు కాకుండా నడుస్తున్న ఈ కాల్​ సెంటర్ గురించి పక్కగా సమాచారాన్ని సేకరించిన బాలానగర్ జోన్ ఎస్వోటీ అధికారులు, సైబరాబాద్ సైబర్ క్రైం పోలీసులతో కలిసి దానిపై దాడి చేశారు. 12 కంప్యూటర్లు, 2 టీపీ లింక్ రౌటర్లు, థార్ కారు 21 మొబైల్ ఫోన్లు, 3 స్టాంపులు, ఓ నిందితునికి చెందిన పాస్​ పోర్టును స్వాధీనం చేసుకున్నారు. దాంతోపాటు కాల్ సెంటర్​ లో టెలీకాలర్లుగా పని చేస్తున్న ఖమ్మం జిల్లాకు చెందిన ఇద్దరితోపాటు కోల్ కతా రాష్ట్రానికి చెందిన మరో ఏడుగురిని అరెస్ట్ చేశారు.

సైబర్ క్రైమ్స్ ఇన్ ఛార్జ్ డీసీపీ సుధీంద్ర, ఎస్వోటీ డీసీపీ శోభన్ కుమార్​, అదనపు డీసీపీ విశ్వప్రసాద్ తో కలిసి మీడియా సమావేశంలో వివరాలు వెల్లడించారు. ఖమ్మం జిల్లాకు చెందిన ఏపూరి గణేశ్​ (3‌‌0), మారంపూడు చెన్నకేశవ (26) 2024లో మాదాపూర్​ అయ్యప్ప సొసైటీలో రిడ్జెట్​ ఐటీ సొల్యూషన్స్ పేర కాల్ సెంటర్​ ను ప్రారంభించారు. ఆ తరువాత కోల్ కతాకు చెందిన మౌమితా మండల్​ (27), ఎజాజ్​ అహమద్​ (42), సంబిత్​ రాయ్​ (27), శన్నిక్​ బెనర్జీ (24), మౌమిత మల్లిక్​ (33), సిల్పి సమదీర్​ (33), కునాల్ సింగ్​(37)లను టెలీ కాలర్లుగా నియమించుకున్నారు. ఫోన్​ కాల్స్​ ఎలా మాట్లాడాలన్న దానిపై వీరికి శిక్షణ కూడా ఇచ్చారు. దాంతోపాటు కాల్ సెంటర్ సమీపంలోనే వీరికి బస కూడా కల్పించారు. ఇక, ఖమ్మం జిల్లాకే చెందిన గణేశ్​, కేశవ్ లు రోజువారీ కార్యకలాపాలను పర్యవేక్షించేవారు.

Also Read: Cyber Criminals: ప్రభుత్వ జూనియర్ కళాశాల వద్ద పట్టుబడ్డ 13 మంది సైబర్ నేరగాళ్లు

మరో గ్యాంగ్ తో జతకట్టి

ఆ తరువాత మోసాలకు తెర లేపిన గణేశ్, చెన్నకేశవ సైబర్​ మోసాలు చేస్తున్న మరో గ్రూప్​ తో జతకట్టారు. ఈ గ్రూప్​ నడుపుతున్న మోసగాళ్లు ఆస్ట్రేలియా పౌరులను టార్గెట్ గా చేసుకుని వారికి మీ కంప్యూటర్లు కాంప్రమైజ్​ అయ్యాయంటూ పాప్​ అప్​ లు, ఈ మెయిళ్లు పంపించేవారు. మీ సమస్య పరిష్కారం కావాలంటే కస్టమర్​ కేర్ కు ఫోన్ చేయండి అంటూ ఓ నెంబర్ ఇచ్చేవారు. ఇది నమ్మి ఎవరైనా కాల్​ చేస్తే అది ఎక్స్​ లైట్​ అప్లికేషన్ ద్వారా రౌట్​ అయి మాదాపూర్ అయ్యప్ప సొసైటీలో నడుస్తున్న కాల్​ సెంటర్ కు వచ్చేది. ఇక్కడ టెలీకాలర్లుగా పని చేస్తున్న వారు వారితో మాట్లాడి ఎనీడెస్క్​ అప్లికేషన్​ ద్వారా ఫోన్​ చేసిన వారికి చెందిన కంప్యూటర్లకు సంబంధించి రిమోట్​ యాక్సెస్​ తీసుకునేవారు.

అకౌంట్లలోకి ట్రాన్స్​ ఫర్

ఆ తరువాత వారి బ్యాంక్​ ఖాతాల వివరాలను సేకరించి వాటిల్లో ఉన్న నగదును మన దేశానికి చెంది ఆస్ట్రేలియాలో ఉంటున్న వారి అకౌంట్లలోకి ట్రాన్స్​ ఫర్ చేసేవారు. అకౌంట్లు సమకూర్చినందుకు వారికి కొంత మొత్తాన్ని కమీషన్​ గా ఇచ్చేవారు. అనంతరం హవాలా, క్రిప్టో కరెన్సీ తదితర రూట్లలో కొల్లగొట్టిన డబ్బును ఇక్కడికి చేర్చేవారు. ఇలా ఒక్క సంవత్సరంలోనే 8 నుంచి 10 కోట్ల రూపాయలు కొల్లగొట్టారు. కాగా, నడుస్తున్న ఈ ఫేక్​ కాల్​ సెంటర్​ గురించి పక్కాగా సమాచారాన్ని సేకరించిన బాలానగర్ ఎస్వోటీ సీఐ శివకుమార్​, సైబర్ క్రైమ్స్​ శివప్రసాద్​ సిబ్బందితో కలిసి దాడి చేసి నిందితులను పట్టుకున్నారు. ఈ కేసులో మరికొందరు నిందితులు పరారీలో ఉన్నారని, వారి కోసం గాలిస్తున్నామని డీసీపీ సుధీంద్ర తెలిపారు.

Also Read: Cyber Criminals: కేటుగాళ్ల భరతం పడుతున్న పోలీసులు.. 59 మంది అరెస్ట్.. ఎన్ని లక్షలు రికవరీ చేసారంటే?