Nepal Earthquake: నేపాల్‌లో మరోసారి భారీ భూకంపం .. కంపించిన భూమి

Nepal Earthquake: నేపాల్‌లో ఆదివారం ఉదయం 4.2 తీవ్రతతో భూకంపం సంభవించింది. భూకంపం గురించి నేషనల్ సెంటర్ ఫర్ సిస్మాలజీ (NCS) అధికారిక ప్రకటన విడుదల చేసింది. భారత కాలమానం ప్రకారం నవంబర్ 30, 2025 ఉదయం 11:54 గంటలకు ఈ భూకంపం నమోదు అయింది. భూమి ఉపరితలం నుండి కేవలం 10 కిలోమీటర్ల లోతులోనే కేంద్రబిందువు ఉండటం వల్ల కంపనాలు గణనీయంగా అనిపించినట్టు ఎన్సీఎస్ పేర్కొంది.

ఎన్‌సీఎస్ తమ ఎక్స్ పోస్టులో “M:4.2, Lat:29.34 N, Long:81.41 E, Depth:10 km, Location: Nepal” వివరాలను వెల్లడించింది. భూగర్భంలో తక్కువ లోతులో సంభవించే భూకంపాలు సాధారణంగా భారీ నష్టానికి కారణమవుతాయని నిపుణులు చెబుతున్నారు.

ఇటీవల నవంబర్ 6న కూడా 3.6 తీవ్రతతో మరో భూకంపం ఇదే ప్రాంతంలో నమోదైన విషయం తెలిసిందే. ఆ భూకంపం కూడా 10 కిలోమీటర్ల లోతులోనే సంభవించినట్టు ఎన్సీఎస్ అప్పట్లో తెలిపింది.

భౌగోళికంగా నేపాల్ అత్యంత భూకంప ప్రమాద ప్రాంతాల్లో ఒకటి. భారత, యూరేషియన్ టెక్టానిక్ ప్లేట్లు ఒకదానికొకటి ఢీకొనే కన్వర్జెంట్ బౌండరీపై నేపాల్ ఉన్నందున ఈ ప్రాంతం ప్రమాదానికి గురవుతుంది. భారత ప్లేట్ యూరేషియన్ ప్లేట్ కిందికి జారిపోతుండగా ఉత్పన్నమయ్యే ప్రెషర్, స్ట్రెస్ కారణంగా తరచుగా భూకంపాలు సంభవిస్తుంటాయి.

హిమాలయ పర్వతాలు ఏర్పడటానికి కారణమైన భారత–యూరేశియన్ ప్లేట్‌ల ఢీకొనడం ఇప్పటికీ కొనసాగుతూనే ఉంది. ఈ నిరంతర భౌగోళిక ఒత్తిడి కారణంగా నేపాల్‌లో భూకంపాల తీవ్రత, సంభవించే సగటు సంఖ్య రెండూ ఎక్కువగానే ఉంటాయని శాస్త్రవేత్తలు చెబుతున్నారు. 2015లో చోటుచేసుకున్న భారీ విధ్వంసం తర్వాత కూడా ఈ ప్రాంతం తరచూ కంపించడం భూకంప నిపుణులకు ఆందోళన కలిగిస్తున్న అంశంగా మారింది.