Bhatti Vikramarka: రూ.50 వేల కోట్ల స్కామ్ ఎక్కడ జరిగింది? మేము కమిట్‌మెంట్‌తో పని చేస్తున్నాం : భట్టి విక్రమార్క

Bhatti Vikramarka: రాష్ట్రం అభివృద్ధి చెందడాన్ని చూసి ప్రతిపక్ష నేతలకు కడుపుమంటగా ఉన్నదని, అభివృద్ధి పనులు చేపడుతుంటే విద్యుత్ రంగంలో ప్రభుత్వం రూ.50 వేల కోట్ల స్కామ్ చేస్తున్నదని ఆరోపిస్తున్నారంటూ ఉప ముఖ్యమంత్రి భట్టి (Bhatti Vikramarka) ఫైరయ్యారు. హైదరాబాద్ ప్రజా భవన్‌లో విద్యుత్ డిమాండ్, ప్లానింగ్‌పై మంత్రి దుద్దిళ్ల శ్రీధర్ బాబు, విద్యుత్ శాఖ ప్రిన్సిపల్ సెక్రెటరీ నవీన్ మిట్టల్, ఎస్పీడీసీఎల్ సీఎండీ ముషారఫ్ ఫరూఖీ, ట్రాన్స్‌కో, జెన్‌కో సీఎండీలు, సింగరేణి సీఎండీ బలరాం నాయక్‌తో కలిసి పవర్ పాయింట్ ప్రజెంటేషన్ ఇచ్చారు. ఈ సందర్భంగా భట్టి మాట్లాడుతూ, తెలంగాణ ప్రభుత్వం రాష్ట్ర జీఎస్‌డీపీ పెరిగేలా పని చేస్తున్నదని వివరించారు. అందుకు ప్రత్యేక ప్రణాళికతో ముందుకు వెళ్తున్నట్లు చెప్పారు.

2024 నాటికి ప్రపంచంలో అత్యధిక విద్యుత్ వినియోగం

2047 నాటికి 4 లక్షల ట్రిలియన్ డాలర్ల ఎకానమీని లక్ష్యంగా చేసుకుని ముందుకుపోతున్నట్లు భట్టి వివరించారు. అందుకు విద్యుత్ రంగంలో 30 శాతం గ్రోత్ అవసరం ఉన్నదన్నారు. 2014 నుంచి 2018 వరకు 14.2 శాతం గ్రోత్ ఉన్నదని, 2020 – 21లో 5.44 శాతంగా ఉన్నదని తెలిపారు. 2024 – 25 లో కాంగ్రెస్ అధికారంలోకి వచ్చాక 10 శాతం వృద్ధి నమోదైందని వివరించారు. 2047 నాటికి 1,39,310 మెగావాట్ల విద్యుత్ అవసరం అవుతుందని అంచనా వేసినట్లు పేర్కొన్నారు. 2024 నాటికి ప్రపంచంలో అత్యధిక విద్యుత్ వినియోగించే దేశాల్లో ఆరో స్థానంలో ఉన్నామని, గ్రీన్ ఎనర్జీ చాలా అవసరమని, 2070 నాటికి పొల్యూషన్‌ను నెట్ జీరోకు తగ్గించాల్సిన అవసరమున్నదని అభిప్రాయపడ్డారు.

Also Read: Bhatti Vikramarka: ఇందిరమ్మ చీరల పంపిణీపై మహిళల హర్షం : డిప్యూటీ సీఎం భట్టి విక్రమార్క

థర్మల్ పవర్‌తో పోల్చుకుంటే సోలార్ పవర్ తక్కువ

అభివృద్ధి చెందుతున్న దేశాల్లో 50 శాతం తప్పకుండా గ్రీన్ ఎనర్జీ ఉండాలని పారిస్‌లో అగ్రిమెంట్ చేశారని భట్టి గుర్తుచేశారు. విద్యుత్ లోటును అధిగమించాలంటే లాంగ్ టర్మ్ లోన్ తెచ్చుకుని పెట్టుకోవాల్సిన అవసరమున్నదని తెలిపారు. ఎనర్జీ స్టోరేజ్ చాలా అవసరమని, ఉదయం సోలార్ ఉంటుందని, సాయంత్రం పీక్ అవర్స్ దానిని వినియోగించుకోవాలంటే స్టోరేజ్ చేసుకోవాలన్నారు. ఇందుకు రెండు విధానాలు ఉన్నాయని, పంప్డ్ స్టోరేజీతో పాటు బ్యాటరీ స్టోరేజ్ చేసుకునేందుకు అవకాశమున్నదన్నారు. 1,300 మెగావాట్ల బ్యాటరీ స్టోరేజ్‌కు కేంద్రం అనుమతి ఇచ్చినట్లు తెలిపారు.

నీళ్ల కెపాసిటీని బట్టి పంప్డ్ స్టోరేజ్ చేసుకోవచ్చన్నారు. తెలంగాణ పుంప్డ్ స్టోరేజ్‌కు అనువైన ప్రాంతంగా వివరించారు. థర్మల్ పవర్‌తో పోల్చుకుంటే సోలార్ పవర్ తక్కువకు దొరుకుతుందన్నారు. అలాంటప్పుడు థర్మల్ పవర్ ఎందుకనే ప్రశ్నలు వస్తున్నాయని, అయితే సోలార్‌కు సీజన్, వెదర్ సహకరించాలని చెప్పారు. అన్నీ సహకరించినా థర్మల్‌ను పట్టించుకోకుంటే గ్రిడ్ కుప్పకూలే అవకాశమున్నదన్నారు. అలా జరిగినట్లయితే తీవ్రమైన నష్టాన్ని ఎదుర్కోవాల్సి వస్తుందని, ఇప్పటికే పలు దేశాల్లో గ్రిడ్ కుప్పకూలిన సందర్భాలున్నాయని గుర్తుచేశారు.

పనీ పాట లేదా?

తెలంగాణలో కేవలం విండ్ కెపాసిటీ 128 మెగావాట్లు మాత్రమే ఉన్నదని డిప్యూటీ సీఎం తెలిపారు. రాష్ట్రం విండ్ పవర్‌కు అనుకూలమైన ప్రాంతం కాదన్నారు. గతంలో పాలకులు రాష్ట్రాన్ని గాలికి వదిలేశారని, సీఎం రేవంత్ రెడ్డి ఆధ్వర్యంలో ఇప్పుడు రాష్ట్రం ప్రపంచంతో పోటీ పడేలా ముందుకు వెళ్తున్నట్టు స్పష్టం చేశారు. గతంలో బీఆర్ఎస్ మాదిరిగా తాము తప్పిదాలు చేయదలుచుకోలేదని, వాస్తవ పరిస్థితులను ప్రజలకు వివరిస్తున్నట్లు చెప్పారు. రాష్ట్రానికి పెట్టుబడులు రావాలంటే నీళ్లు, విద్యుత్, మౌలిక సదుపాయాలు ఎంతో అవసరమన్నారు. సోలార్ పంప్డ్ స్టోరేజ్‌కు తెలంగాణ అనువైన ప్రాంతమని, కానీ 10 ఏండ్ల బీఆర్ఎస్ పాలనలో ఎలాంటి ప్లాన్ చేపట్టలేదని మండిపడ్డారు.

తెలంగాణ అభివృద్ధి జరగడాన్ని వారు చూసి తట్టుకోలేక పోతున్నారు 

రూ.50 వేల కోట్ల అవినీతి జరుగుతున్నదని ప్రతిపక్షాలు విమర్శలు చేస్తున్నాయని, తెలంగాణ అభివృద్ధి జరగడాన్ని వారు చూసి తట్టుకోలేక పోతున్నారని మండిపడ్డారు. రాష్ట్ర అవసరాల కంటే వ్యక్తిగత అవసరాలే వారికి ముఖ్యం అన్నట్లు కొందరు వ్యవహరిస్తున్నారని ధ్వజమెత్తారు. తమ క్యాబినెట్ కమిట్‌మెంట్‌తో పని చేస్తున్నదని స్పష్టంచేశారు. గత ప్రభుత్వ తప్పులపై విచారణకు కమీషన్లు వేశామని, నివేదికలు వచ్చాక చర్యలు తీసుకుంటామని స్పష్టం చేశారు. తలకు మాసినవాళ్లే రూ.50 వేల కోట్ల అవినీతి చేస్తున్నారంటూ విమర్శలు చేస్తుంటారని, వారికి రాష్ట్ర ప్రయోజనాలు పట్టవా అని భట్టి విక్రమార్క తీవ్ర వ్యాఖ్యలు చేశారు.

Also Read: Bhatti Vikramarka: గురుకులాల డైట్, అద్దె బకాయిలు విడుదల చేయండి : డిప్యూటీ సీఎం ఆదేశం