Epaper 
Pune Crime: మహిళలపై లైంగిక దాడికి పాల్పడ్డ ఘటనలు రోజూ చూస్తూనే ఉన్నాం. అయితే విచిత్రంగా ఓ పురుషుడిపై మహిళ అఘాయిత్యానికి పాల్పడిన ఘటన మహారాష్ట్రలో చోటుచేసుకుంది. బాధితుడ్ని బలవంతం చేయడమే కాకుండా అతడి నగ్న ఫొటోలు, వీడియోలను అడ్డుపెట్టుకొని బెదిరింపులకు సైతం దిగింది. బాధితుడి ఫిర్యాదు మేరకు రంగంలోకి దిగిన పోలీసులు.. నిందితురాలిపై కేసు నమోదు చేశారు.
అన్నా అంటూ దగ్గరై..
మహారాష్ట్ర పుణెలో ఈ షాకింగ్ ఘటన చోటుచేసుకుంది. పోలీసులు తెలిపిన వివరాల 47 ఏళ్ల వ్యక్తి.. 42 ఏళ్ల మహిళపై పోలీసులకు ఫిర్యాదు చేశాడు. 2024 నవంబర్ నుంచి 2025 అక్టోబర్ మధ్య కాలంలో గౌరి ప్లహ్లాద్ వాంజలే (Gauri Pralhad Wanjale) తనపై లైంగిక దాడి చేసినట్లు బాధితుడు ఆరోపించాడు. ఫిర్యాదుదారుడి ప్రకారం.. 2024 నవంబర్ 7న కుటుంబంతో కలిసి తులజాపూర్‌కు వెళ్లినప్పుడు అతను మొదటిసారి గౌరీని కలిశాడు. తొలుత అన్నా అనే అనుబంధంతో ఆమె అతడికి దగ్గరైంది. అలా సాన్నిహిత్యం పెంచుకుని తరచూ ఇంటికి రావడం ప్రారంభించిందని బాధితుడు పేర్కొన్నాడు.
మత్తు మందు ఇచ్చి..
తన భార్యతో ఏర్పడ్డ పరిచయాన్ని ఉపయోగించుకొని కాశీ ట్రిప్ కు వెళ్దామని నిందితురాలు ఆహ్వానించినట్లు బాధితుడు తెలిపాడు. సోదరుడ్ని కూడా వెంట తీసుకొని రావాలని ఆమె తన భార్యకు చెప్పినట్లు పేర్కొన్నాడు. ఆమె ఆహ్వానాన్ని నమ్మి కాశీ ప్రయాణానికి తన భార్య ఒప్పించిందని బాధితుడు తెలిపాడు. ఆ ప్రయాణంలో బాధితుడికి గౌరీ మత్తు పదార్థం కలిపిన ఆహారాన్ని పెట్టింది. స్పృహ కోల్పోయిన అతడిపై లైంగిక దాడి చేసింది. అంతటితో ఆగకుండా తన నగ్న ఫొటోలు, వీడియోలను సెల్ ఫోన్ లో బంధించిందని పోలీసులకు ఇచ్చిన ఫిర్యాదులో బాధితుడు పేర్కొన్నాడు.
రూ.2 లక్షలు ఇవ్వాలని బ్లాక్ మెయిల్
కాశీ ప్రయాణం ముంగించుకొని పుణెకు తిరిగి వచ్చిన తరువాత ఆమె అసలు నిజ స్వరూపం బయటపడిందని బాధితుడు వాపోయాడు. తన అభ్యంతరకర ఫొటోలను అడ్డుపెట్టుకొని రూ. 2 లక్షలు ఇవ్వాలని గౌరి డిమాండ్ చేసినట్లు బాధితుడు పేర్కొన్నాడు. లేదంటే తనని వివాహం చేసుకోవాలని పట్టుబట్టినట్లు తెలిపాడు. ఈ రెండింట్లో దేనికి అంగీకరించకపోయినా నగ్న ఫొటోలు, వీడియోలను బయటపెడతానని, సోషల్ మీడియాలో వైరల్ చేస్తానని బాధితుడ్ని బెదిరించింది.
Also Read: Imran Khan: ఇమ్రాన్ ఖాన్ మృతిపై జోరుగా ప్రచారం.. క్లారిటీ ఇచ్చిన జైలు అధికారులు
మహిళపై కేసు నమోదు
ఇలా నిరంతరం బెదిరింపులు రావడంతో విసుగెత్తిన బాధితుడు.. పుణెలోని కోత్రుడ్ పోలీస్ స్టేషన్‌ (Kothrud Police Station)ను ఆశ్రయించాడు. సదరు మహిళ తనను ఏవిధంగా ట్రాప్ చేసిందన్న విషయాన్ని వారికి వివరించాడు. కోత్రుడ్ ఇన్స్పెక్టర్ సందీప్ దేశ్మానే (Sandeep Deshmane) ఈ కేసుపై స్పందించారు. నిందితురాలిపై కేసు నమోదు చేసినట్టు తెలిపారు. కేసు దర్యాప్తు దశలో ఉన్నందున ప్రస్తుతం ఏ వ్యాఖ్య చేయలేమని చెప్పారు. దర్యాప్తు పూర్తైన అనంతరం పూర్తి వివరాలను తెలియజేస్తామని స్పష్టం చేశారు. నిందితురాలిపై వచ్చిన ఆరోపణలు నిజమనే తేలితే చట్టపరమైన చర్యలు తీసుకుంటామని స్పష్టం చేశారు.
