Epaper 
Ramchander Rao: పార్టీ స్టేట్ ప్రెసిడెంట్‌ను తిడితే అది అందరినీ తిట్టినట్లే అవుతుందని బీజేపీ రాష్ట్ర అధ్యక్షుడు రాంచందర్ రావు వ్యాఖ్యానించారు. నాంపల్లి బీజేపీ రాష్ట్ర కార్యాలయంలో బుధవారం లీగల్ సెల్, ఐటీ సెల్, సోషల్ మీడియా వారియర్స్‌తో ఆయన సమావేశమయ్యారు. ఈ సందర్భంగా వారికి పలు అంశాలపై దిశానిర్దేశం చేశారు. ప్రెసిడెంట్‌ను తిడితే అందరినీ తిట్టినట్టేనని, తనను తిట్టారని చంకలు గుద్దుకోవడం కాదని, అది పార్టీని అవమానించడమే అవుతుందనే విషయాన్ని గుర్తుంచుకోవాలని సూచించారు. బీజేపీని బ్లేమ్ చేసే వారికి పార్టీ నేతలు ఎవరైనా మద్దతు ఇచ్చినా, రీ ట్వీట్ చేసినా సీరియస్ యాక్షన్ తప్పదని హెచ్చరించారు. అలాంటి వారికి నోటీసులు కూడా జారీ చేయకుండా వేటు వేస్తామని హెచ్చరించారు.
సోషల్ మీడియాలో విష ప్రచారం
పార్టీకి, నాయకులకు వ్యతిరేకంగా వచ్చిన వార్తలను కొట్టి పారేయాలన్నారు. బీజేపీ బలంగా ఎదుగుతుందనే భయంతో బీఆర్ఎస్, కాంగ్రెస్ సోషల్ మీడియాలు కలిసి నైతికంగా పార్టీని దెబ్బతీసే కుట్రలు చేస్తున్నాయన్నారు. ఈ పార్టీలకు దమ్ముంటే ఎదురొచ్చి నేరుగా ఎదురుకోవాలన్నారు. ఏదైనా అభివృద్ధి చేపట్టాలని మంత్రిని కలిసినా.. దానిపై కూడా వ్యతిరేకంగా పోస్టులు చేస్తున్నారన్నారు. ఇలాంటివి యూట్యూబ్‌లో వచ్చినా ఊరుకోవద్దని, వాటికి కూడా బలంగా కౌంటర్ ఇవ్వాల్సిందేనని దిశానిర్దేశం చేశారు. చిల్లర రాజకీయాలకు బీజేపీ భయపడబోదన్నారు. ఒకడు దుబాయ్‌లో, ఇంకొకడు అమెరికాలో ఉండి మాట్లాడుతున్నారని, సోషల్ మీడియాలో విష ప్రచారం చేస్తున్నారని, వారికి దమ్ముంటే ఇండియా రావాలని, వారి అంతు చూస్తామని రాంచందర్ రావు హెచ్చరించారు.
సోషల్ మీడియా వేదికగా బీజేపీనీ బద్నాం
ఫేక్ ఐడెంటిటీతో కాదని, దమ్ముంటే ముందుకు వచ్చి కోట్లాడాలని ఆయన సవాల్ విసిరారు. డబ్బులు ఇచ్చి కాంగ్రెస్, బీఆర్ఎస్ కలిసి సోషల్ మీడియా వేదికగా బీజేపీనీ బద్నాం చేసే పని పెట్టుకున్నాయని ఆగ్రహం వ్యక్తం చేశారు. డెడికేషన్‌కు, డిసిప్లేన్‌కు బీజేపీ పెట్టింది పేరని, అలాంటిది తమ పార్టీ నాయకుల మధ్య చిచ్చుపెట్టొద్దని స్పష్టంచేశారు. యూట్యూబ్ ఛానల్స్, డిజిటల్ పత్రికలు విలువలు కాపాడుకోవాలని సూచించారు. తమపై తప్పుడు వార్తలు రాస్తే డి ఫర్మేషన్ కేసు వేస్తామని, ఇప్పటికే ఒక పత్రికకు లీగల్ నోటీసులు ఇచ్చినట్లు రాంచందర్ రావు వివరించారు. సోషల్ మీడియాలో జరిగే ప్రచారంపై జిల్లాలో మీటింగ్‌లు నిర్వహించి వారియర్స్‌కు అవగాహన కల్పించాలని వివరించారు.
కాంగ్రెస్, బీఆర్ఎస్ రైతులను తప్పు దోవ పట్టిస్తున్నాయి
పత్తి కొనుగోలు విషయంలో కాంగ్రెస్, బీఆర్ఎస్ పార్టీలు రైతులను తప్పుదోవ పట్టిస్తున్నాయని రాంచందర్ రావు విమర్శించారు. కిషన్ రెడ్డి చొరవతో ఎంత ప్రొడక్షన్ ఉంటే అంత పత్తి పంటను కొంటామని కేంద్రప్రభుత్వం హామీ ఇచ్చిందని గుర్తుచేశారు. రైతులు అధైర్య పడొద్దని, ఎంఎస్పీ ప్రకారమే కేంద్ర ప్రభుత్వం కొనుగోలు చేస్తుందన్నారు. వచ్చే ఏడాది మార్చి వరకు ఈ ప్రక్రియ కొనసాగుతుందన్నారు. అధికార, ప్రతిపక్ష పార్టీలు రాద్దాంతం చేయడం మానుకోవాలని సూచించారు. రైతులు తమ పత్తిని అమ్ముకునేందుకు కిసాన్ మొబైల్ యాప్‌ను ఉపయోగించుకోవాలని సూచించారు. దళారుల ఆగడాలను ప్రభుత్వం అరికట్టాలని రాంచందర్ రావు కోరారు. జిన్నింగ్ మిల్లుల వసతులపై ఆరా తీస్తున్నట్లు చెప్పారు. ఎకరాకు 7 క్వింటాళ్ల పత్తిని కొనుగోలు చేయాలనే నిబంధనలు, ఎకరాకు పంట ఎంత వస్తుందనే క్లారిటీ కోసమేనని స్పష్టంచేశారు. రైతులు తప్పుడు ప్రచారాలు నమ్మవద్దని సూచించారు.
