Gadwal District: ఆ జిల్లాలో ఆగని అక్రమ వ్యాపారం.. అక్రమార్కులకు వరమైన తవ్వకాలు

Gadwal District: జిల్లాలో మొరం అక్రమార్కులకు కాసుల వర్షాన్ని కురిపిస్తుంది. ప్రభుత్వ, పట్టా భూములు అనే తేడా లేకుండా నిబంధనలకు విరుద్ధంగా మొరం తవ్వకాలు యథేచ్ఛగా కొనసాగుతున్నా, సంబంధిత మైనింగ్, రెవెన్యూ, పోలీస్ శాఖల అధికారులు పట్టింపు లేకుండా వ్యవహరించడంపై తీవ్ర విమర్శలు వ్యక్తమవుతున్నాయి. ఈ దందా అధికారులతో కుమ్మక్కై అదుపు లేకుండా సాగుతుందనే ఆరోపణలు ఉన్నాయి.

గుట్టలు మాయం..

గద్వాల, ఐజ, వడ్డేపల్లి, కేటీ దొడ్డి, అలంపూర్, ఎర్రవల్లి మండలాల పరిధిలోని ప్రభుత్వ, పట్టా, అటవీ భూముల్లోని ప్రకృతి సంపదను అక్రమార్కులు కొల్లగొడుతున్నారు. గద్వాల (Gadwal) మండలంలోని పూడూరు శివార్లలో అక్రమంగా తవ్వకాలు జరపడంతో గుట్టలే మాయమై, భారీ గుంతలు దర్శనమిస్తున్నాయి. రాత్రి వేళల్లో ఈ తవ్వకాలు జోరుగా సాగుతున్నాయి. జేసీబీలతో గుట్టలను తవ్వి, టిప్పర్లు, ట్రాక్టర్ల ద్వారా ప్రైవేట్ వెంచర్లకు, ఇంటి నిర్మాణాలకు తరలించి రూ. 2 వేల నుంచి రూ. 6 వేల వరకు వసూలు చేస్తున్నారు. వజ్రాల గుట్ట సమీప ప్రాంతాల నుంచి పదుల సంఖ్యలో టిప్పర్ల ద్వారా రాత్రివేళల్లో నది అగ్రహారం రోడ్డు గుండా మొరాన్ని తరలిస్తున్నారు.

Also Read: Gadwal District: ధాన్యంపై అక్రమార్కుల కన్ను.. నిర్వాహకులతో చేతులు కలుపుతున్న మిల్లర్లు

ప్రభుత్వ ఆదాయానికి గండి..

మొరం తవ్వకాలకు రెవెన్యూ శాఖల నుంచి తప్పనిసరిగా అనుమతి తీసుకోవాలి. కానీ అక్రమార్కులు ఎలాంటి అనుమతులు తీసుకోకుండా, ప్రభుత్వానికి రావాల్సిన రాయల్టీని సైతం ఎగ్గొడుతూ ప్రభుత్వ ఆదాయానికి గండి కొడుతున్నారు. లక్షల్లో సొమ్ము చేసుకుంటున్న ఈ మట్టి మాఫియాకు స్థానిక నేతలు, అధికారుల అండదండలు ఉన్నాయని ప్రజలు విమర్శిస్తున్నారు. అనంతపురం గుట్టల సమీపంలోని పట్టా భూముల్లో కొందరు మొరం తవ్వకాలు చేపట్టగా, పట్టాదారులు ప్రశ్నించడంతో ఈ మాఫియా వారిపై దౌర్జన్యానికి పాల్పడ్డారనే ఆరోపణలు ఉన్నాయి. ప్రకృతి ప్రేమికులు ఈ అక్రమ దందాపై ఆందోళన వ్యక్తం చేస్తున్నారు.

Also Read: Gadwal District: గద్వాల జిల్లాలో పత్తి కొనుగోలుకు కొర్రీలు.. ఆందోళనలో రైతన్నలు