DK Aruna: ఎట్టకేలకు దొంగ దొరికాడు.. నేర చరిత్ర పెద్దదే.

తెలంగాణ బ్యూరో స్వేచ్ఛ: DK Aruna: బీజేపీ ఎంపీ డీ.కే.అరుణ ఇంట్లో దొంగతనానికి ప్రయత్నించిన వ్యక్తిని జూబ్లీహిల్స్​ పోలీసులు అరెస్ట్​ చేశారు. నిందితుని నుంచి సుత్తి, స్క్రూడ్రైవర్​, కట్టర్​, తాళంచెవుల గుత్తి, మొబైల్​ ఫోన్​ ను స్వాధీనం చేసుకున్నారు.విచారణలో నిందితుడు పాతనేరస్తుడని వెల్లడైంది. దేశ రాజధాని ఢిల్లీలోని వేర్వేరు పోలీస్​ స్టేషన్ల పరిధుల్లో 17 దొంగతనాలు చేసినట్టుగా నిర్ధారణ అయ్యింది.వెస్ట్​ జోన్​ డీసీపీ విజయ్ కుమార్​ మంగళవారం సాయంత్రం తన కార్యాలయంలో ఏర్పాటు చేసిన మీడియా సమావేశంలో వివరాలు వెల్లడించారు.

పాతబస్తీ తలాబ్​ కట్ట అమ్మాన్​ నగర్​ బీ ప్రాంత నివాసి మహ్మద్​ అక్రమ్​ (48)వృత్తిరీత్యా టైల్స్​ ఫిట్టర్​.కాగా, తేలికగా డబ్బు సంపాదించటానికి గాను దొంగతనాలు చేయటం మొదలు పెట్టాడు. ఒక్క 2017వ సంవత్సరంలోనే ఢిల్లీలోని వేర్వేరు పోలీస్​ స్టేషన్ల పరిధుల్లో 17 దొంగతనాలు చేశాడు. ఆ తరువాత హైదరాబాద్​ కు వచ్చిన అక్రమ్​ అప్పటి నుంచి ఇక్కడే ఉంటున్నాడు. ఈనెల 15 అర్ధరాత్రి 12.30 గంటల సమయంలో జూబ్లీహిల్స్​ రోడ్డు నెంబర్​ 56లోని ఎంపీ డీ.కే.అరుణ ఇంట్లోకి దొంగతనం చేయాలని చొరబడ్డాడు. ఆ సమయంలో అయిన అలికిడితో ఇంటి మొదటి అంతస్తులో పడుకుని ఉన్న ఎంపీ కారు డ్రైవర్​ కు మెలకువ వచ్చింది. లేచి చూడగా ఎవ్వరూ కనిపించలేదు.

Also Read: Greater Warangal: మాయమాటలతో బాలికల ట్రాప్.. ముఠా గుట్టురట్టు

దాంతో అతను నిద్రపోయాడు. కాగా, దాదాపు గంటన్నరపాటు ఎంపీ ఇంట్లోని వేర్వేరు గదుల్లోకి వెళ్లిన అక్రమ్​ విలువైన సొత్తు కోసం వెతికాడు. అయితే, చేతికి ఏమీ దొరకక పోవటంతో వచ్చిన దారిలోనే పరారయ్యాడు. ఈ సంఘటన తీవ్ర కలకలం సృష్టించింది. ఎంపీ డీ.కే.అరుణ జరిగిన విషయాన్ని సీఎం రేవంత్​ రెడ్డి దృష్టికి తీసుకెళ్లి తన నివాసం వద్ద భద్రతను పెంచాలని కోరారు. దీనిపై ముఖ్యమంత్రి రేవంత్ రెడ్డి స్పందించి భద్రతను పెంచాలంటూ పోలీసు అధికారులను ఆదేశించారు కూడా. డీ.కే.అరుణ వద్ద డ్రైవర్​ గా పని చేస్తున్న ఉద్యోగి ఇచ్చిన మేరకు కేసులు నమోదు చేసిన జూబ్లీహిల్స్​ డీఐ మధుసూదన్​ సిబ్బందితో కలిసి విచారణ చేపట్టారు.

ఇందులో భాగంగా ఎంపీ నివాసంలోని సీసీ కెమెరాలను పరిశీలించారు. దాంతోపాటు ఆమె ఇంటికి వెళ్లే అన్ని దారుల్లోని సీసీ కెమెరాల ఫుటేజీని కూడా విశ్లేషించారు. ఈ క్రమంలో చోరీకి యత్నించింది అక్రమ్​ అని గుర్తించారు. మంగళవారం ఉదయం 10గంటల సమయంలో అమ్మాన్​ నగర్​ బీలోని అతని ఇంటి వద్ద అక్రమ్​ ను అరెస్ట్​ చేశారు. చాకచక్యంగా దర్యాప్తు జరిపి నిందితున్ని అరెస్ట్​ చేసిన డీఐ మధుసూదన్​ తోపాటు సిబ్బందిని డీసీపీ విజయ్​ కుమార్​ అభినందించారు.

Also Read: Hyderabad News: ఆ లారీ నిండా అవే.. ఎట్టకేలకు పోలీసులు పట్టేశారు