Registration Scam: అక్రమ రిజిస్ట్రేషన్లకు కేరాఫ్‌గా​ రంగారెడ్డి.. ప్రభుత్వ పార్కులను సైతం వదలిపెట్టని అధికారులు!

Registration Scam: రిజిస్ట్రేషన్ల శాఖలో అవినీతి రోజు రోజుకు పెరిగిపోతున్నది. చేయి తడిపితేనే సబ్​ రిజిస్ట్రార్లు ముందుకెళ్తారనే పేరున్నది. లేకపోతే ఆ రోజు రిజిస్ట్రేషన్​ నిలిచిపోయే పరిస్థితి ఉంటుంది. ఆ భయంతో విక్రయదారుకు చేతులు తడపక తప్పడం లేదని సమాచారం. ప్రతి డాక్యుమెంట్‌కు ఓ రేటు ఫిక్స్ చేసి రిజిస్ట్రేషన్లు చేయడం సబ్​ రిజిస్ట్రార్లకు అలవాటైంది. భూ స్వరూపం, భూ వివాదాలతోపాటు నిబంధనలను పరిగణనలోకి తీసుకోకుండా రిజిస్ట్రేషన్లు చేస్తున్నారు. లంచాలకు అలవాటుపడి వివాదాలను సైతం సృష్టిస్తున్నారు. సబ్​ రిజిస్ట్రార్​ కార్యాలయాల్లో జరిగే అవినీతి, అక్రమాలపై నిఘా లేకపోవడంతోనే ఇష్టానుసారంగానే వ్యవహరిస్తున్నారని తెలుస్తున్నది. ఏసీబీ దాడులు జరిగినా సబ్​ రిజిస్ట్రార్​ కార్యాలయాల్లో పని చేసే అధికారులకు చీమ కుట్టినట్లుగా కూడా కనిపించడం లేదు. రంగారెడ్డి జిల్లాలోని 18 సబ్​ రిజిస్ట్రార్​ కార్యాలయాల్లో ఇదే తంతే నడుస్తున్నది. అక్రమ రిజిస్ట్రేషన్లు చేయడంలో జిల్లా ముందుందనే ఆరోపణలు వినిపిస్తున్నాయి.

జిల్లాతోనే నెంబర్​ వన్​ ఆదాయం

రాష్ట్ర ప్రభుత్వానికి వచ్చే ఆదాయంలో ప్రధానమైనది స్టాంప్స్​ అండ్​ రిజిస్ట్రేషన్​ శాఖ ఒకటి. ఈ శాఖ ద్వారానే అత్యంత ఆదాయం సమకూరుతున్నది. రాష్ట్రంలో అత్యధిక ఆదాయం రంగారెడ్డి జిల్లా స్టాంప్స్​ అండ్​ రిజిస్ట్రేషన్​ శాఖ ద్వారానే వస్తున్నది. అయితే, ఆదాయాన్ని ఆసరాగా చేసుకోని సబ్​ రిజిస్ట్రార్లు సైతం వ్యక్తిగత స్వార్ధం కోసం వివాదాలు సృష్టించే రిజిస్ట్రేషన్లు చేస్తున్నారు. దీంతో ప్రభుత్వ భూములను, ప్రభుత్వ ఆధీనంలో ఉన్న భూములను సైతం గుడ్డిగా రిజిస్ట్రేషన్లు చేయడం దారుణం. హయ‌త్‌నగర్​, వనస్థలిపురం, ఇబ్రహీంపట్నం సబ్​ రిజిస్ట్రార్​ కార్యాలయంలో నిషేదిత భూములకు, నిబంధనలు పాటించకుండా అనేక భూములకు రిజిస్ట్రేషన్లు చేస్తున్నారు.

Also Read: Fake Documents Scam: నకిలీ పత్రాలతో 47 లక్షలకు కుచ్చుటోపీ పెట్టిన మీ సేవ నిర్వాహకుడు

ఉదాహరణకు కొన్ని

హయత్‌నగర్​ మండలం సాహెబ్​ నగర్​ రెవెన్యూ పరిధిలోని సర్వే నెంబర్​ 200లో 1967 సంవత్సరంలో శ్రీపురం కాలనీని ఏర్పాటు చేశారు. ప్రస్తుతం బీఎన్ రెడ్డి నగర్​ డివిజన్​ పరిధిలో ఉన్న శ్రీపురం కాలనీలో సుమారు 5వేల గజాల స్థలంలో శ్రీ చత్రపతి శివాజీ పార్కు ఉన్నది. ఇటీవల కొందరు వ్యక్తులు, మొదట లే అవుట్​ చేసిన వారి వారసుల పేర్లతో బై నెంబర్లను ఉపయోగించి రిజిస్ట్రేషన్ డాక్యుమెంట్​లను సృష్టించారు. ఈ డాక్యుమెంట్లకు అసలు సూత్రధారి వనస్థలిపురం సబ్​ రిజిస్ట్రార్​ కార్యాలయం అని అంటున్నారు.

కార్తీకేయ ప్రాజెక్ట్ పేరుతో చేస్తున్న లే అవుట్‌

హయత్‌నగర్ సబ్​ రిజిస్ట్రార్​ పరిధిలో 1986లో ఓ వ్యక్తి ప్లాట్​ ఓనర్ల నుంచి జీపీఏ చేసుకున్నారు. వాళ్లు చనిపోవడంతో ఫోటోలు లేకుండా జీపీఏ చేసుకున్న వ్యక్తి నిబంధనలకు విరుద్ధంగా సబ్​ రిజిస్ట్రార్‌తో కలిసి డాక్యుమెంట్ చేసుకున్నారు. అయితే, 2002 రిజిస్ట్రేషన్​ చట్టం ప్రకారం ఫోటో ఐడెంటిటీ కార్డు లేకుండా ఎట్టి పరిస్థితిలో రిజిస్ట్రేషన్​ చేయకూడదు. కాసులకు కక్కుర్తి పడి ఇష్టానుసారంగా సబ్​ రిజిస్ట్రార్​లు వ్యవహరిస్తున్నారు. ఇబ్రహీంపట్నం మండలం కొంగర్ కలాన్​ గ్రామంలోని కార్తీకేయ ప్రాజెక్ట్ పేరుతో చేస్తున్న లే అవుట్‌కు నిబంధనలకు విరుద్ధంగా రిజిస్ట్రేషన్లు చేస్తున్నారు. మొత్తం విస్తీర్ణంలో జీపీఏ కొంత భాగం చేసుకొని హెచ్​ఎండీఏ ఆధ్వర్యంలో పూర్తి విస్తీర్ణంతో పట్టాదారుల పేరుతో అనుమతి తీసుకున్నారు. కానీ, పట్టాదారుల ప్రమేయం లేకుండా జీపీఏను అడ్డం పెట్టుకొని మొత్తం విస్తీర్ణంలో చేసిన ప్లాట్లను కేవలం కార్తికేయ ప్రాజెక్ట్ వాళ్లు రిజిస్ట్రేషన్ చేస్తున్నారు.

వ్యక్తిగత స్వలాభం కోసం అడుగులు

స్టాంప్స్​ అండ్​ రిజిస్ట్రేషన్​ చట్టం ప్రకారం అనుమతి వచ్చిన పట్టాదారులు కాకుండా ఇతరులు చేయడంతో భవిష్యత్తులో లింక్​ సమస్య ఏర్పడే అవకాశం ఉన్నది. ఈ విషయాలను సబ్​ రిజిస్ట్రార్​ పరిగణనలోకి తీసుకోకుండా వ్యక్తిగత స్వలాభం కోసం అడుగులు వేస్తున్నట్లు సమాచారం. అంతేకాకుండా బహుళ అంతస్తుల రిజిస్ట్రేషన్​ విషయంలో డీడీలు మాత్రం ఎన్ని అంతస్తులు ఉంటే అంతకు తీసుకొని డాక్యుమెంట్​ పేపర్‌లో ఆడిట్​ వారికు దొరకకుండా జీ ప్లస్ ​2 ఫోటోను జత చేస్తున్నట్లు ప్రచారం సాగుతున్నది. ఇన్‌ఛార్జీగా ఉండి ధైర్యంగా అక్రమ రిజిస్ట్రేషన్లకు ఒడిగడుతున్నట్లు సమాచారం.

Also Read: Sheep Distribution Scam: గొర్రెల స్కాం పై సీతక్క ధ్వజం… స్కాం లపై కఠిన చర్యలే!