Refund Process: తప్పు అకౌంట్‌కి డబ్బు పంపించారా.. అయితే, ఆందోళన అవసరం లేదు.. ఇలా తిరిగి పొందొచ్చు!

Refund Process: డిజిటల్ పేమెంట్లు విస్తరించడంతో పాటు పొరపాట్లు కూడా జరుగుతూనే ఉన్నాయి. గూగుల్ పే, ఫోన్‌పే, పేటీఎం లేదా భీమ్ యాప్ ద్వారా తప్పు అకౌంట్ లేదా తప్పు UPI IDకి డబ్బు పంపడం సాధారణ విషయంగా మారింది. కానీ ఇలాంటి సందర్భాల్లో చాలా మంది భయపడిపోతారు. నిపుణుల చెప్పిన దాని ప్రకారం, ఆందోళన అవసరం లేదు. సరైన విధానంలో చర్యలు తీసుకుంటే డబ్బు తిరిగి పొందవచ్చు.

1. మొదట చేయాల్సినది.. యాప్ కస్టమర్ కేర్‌ని సంప్రదించండి

డబ్బు తప్పు అకౌంట్‌కి వెళ్లిందని తెలిసిన వెంటనే, మీరు ఉపయోగించిన పేమెంట్ యాప్ కస్టమర్ కేర్‌కి ఫోన్ చేయాలి లేదా యాప్‌లోని “Help & Support” విభాగంలో ఫిర్యాదు చేయాలి.

ఫిర్యాదు చేసేటప్పుడు ఈ వివరాలు సిద్ధంగా ఉంచాలి..

1. ట్రాన్సాక్షన్ రసీదు లేదా స్క్రీన్‌షాట్
2. UTR నంబర్ (Unique Transaction Reference)
3. ట్రాన్సాక్షన్ చేసిన తేదీ
4. పంపిన మొత్తం

ఈ వివరాలను ఇచ్చిన తర్వాత, యాప్ సపోర్ట్ టీమ్ NPCI (National Payments Corporation of India) ద్వారా రిఫండ్ రిక్వెస్ట్‌ను రైజ్ చేస్తుంది. వివరాలు సరైనవిగా ఉంటే, చాలా సందర్భాల్లో డబ్బు కొన్ని రోజుల్లోనే తిరిగి మీ అకౌంట్‌లో జమ అవుతుంది.

2. రెండవ మార్గం — NPCI వెబ్‌సైట్ ద్వారా ఫిర్యాదు

యాప్ ద్వారా మీ సమస్య పరిష్కారం కాకపోతే, NPCI అధికారిక వెబ్‌సైట్లోని Dispute Redressal Mechanism విభాగాన్ని సందర్శించి నేరుగా ఫిర్యాదు చేయవచ్చు.

అక్కడ మీరు ఈ వివరాలు అందించాలి..

1. ట్రాన్సాక్షన్ ID
2. UTR నంబర్
3. ట్రాన్సాక్షన్ మొత్తం
4. పంపినవారివి, స్వీకరించినవారి UPI IDs

NPCI మీ ఫిర్యాదును పరిశీలించి, వివరాలు సరైనవని తేలితే, సంబంధిత బ్యాంక్‌కి డబ్బు తిరిగి ఇవ్వమని ఆదేశిస్తుంది.

బ్యాంకింగ్ నిపుణుల సూచన ప్రకారం, ఫిర్యాదు వేగంగా నమోదు చేయడం, సరైన ఆధారాలను సమర్పించడం ద్వారా రికవరీ అవకాశాలు గణనీయంగా పెరుగుతాయి. ట్రాన్సాక్షన్ జరిగిన 24–48 గంటల్లో చర్య తీసుకోవడం అత్యంత ప్రభావవంతంగా ఉంటుంది. డిజిటల్ లావాదేవీలు చేసేటప్పుడు రిసీవర్ పేరు, UPI ID, బ్యాంక్ వివరాలను రెండుసార్లు తనిఖీ చేయడం అలవాటు చేసుకోవాలని నిపుణులు సూచిస్తున్నారు.