Seed Corporation: నాటి బీఆర్ఎస్ నిర్లక్ష్యం.. తగ్గిన విత్తన ధృవీకరణ విస్తీర్ణం

Seed Corporation: బీఆర్ఎస్ నిర్లక్ష్యం సీడ్ కార్పొరేషన్ నష్టాల ఊబీలోకి నెట్టివేసింది. ప్రతి ఏటా రైతులకు నాణ్యమైన విత్తనాలు అందించాల్సి ఉన్నప్పటికీ ప్రైవేటును ప్రోత్సహించింది. కొన్ని సీడ్స్ తీసుకొచ్చిన వాటిపై ప్రచారం చేయలేదు.. పర్యవేక్షణ కొరవడటం, డీలర్లకు కమిషన్ సైతం ఎత్తివేయడంతో మార్కెట్ లో ప్రభుత్వ సీడ్ అందుబాటులో లేకుండా పోయిందనే విమర్శలు ఉన్నాయి. దీంతో ప్రైవేటు కంపెనీలకు పెద్దపీట వేయడంతో రైతులు నష్టాల పాలవుతున్నట్లు రైతు కమిషన్, సీడ్ కార్పొరేషన్‌కు నిత్యం ఫిర్యాదులు వస్తున్నాయని సమాచారం. దీనికి తోడు అథారిటీకి డైరెక్టర్‌గా పనిచేసిన మాజీ డైరెక్టర్ సైతం బోధనను పక్కన బెట్టారనే ఆరోపణలు ఉన్నాయి. అంతేగాకుండా గత బీఆర్ఎస్ ప్రభుత్వ పాలనలో సీడ్ సర్టిఫికేషన్ ఏజెన్సీలో రాజకీయ నాయకుల ప్రమేయం ఎక్కువ కావడం, మాజీ వ్యవసాయశాఖ మంత్రుల అండదండలతో హంగు ఆర్భాటాల కోసం కొన్ని కోట్ల రూపాయల రెవెన్యూ, ప్రభుత్వ నిధులు దుర్వినియోగం చేసినట్లు సమాచారం. సీడ్ హబ్ అని ప్రచారం చేశారు తప్పా సంస్థ గానీ, విత్తన పరిశ్రమ గానీ, విత్తన రైతులు గానీ ఏ మాత్రం అభివృద్ధికి నోచలేదని, సీడ్ సర్టిఫికేషన్ అథారిటీ అధ్వాన్నంగా తయారైందనే విమర్శలు వస్తున్నాయి.

ప్రభుత్వ సీడ్‌పై చిన్నచూపు

తెలంగాణ రాష్ట్రం ఏర్పడిన తర్వాత 2014-–15లో దాదాపు2.80లక్షల ఎకరాల్లో సీడ్ సర్టిఫికేషన్ ఏరియా పరిధి ఉన్నట్లు అధికారిక లెక్కలు చెబుతున్నాయి. అయితే, బీఆర్ఎస్ ప్రభుత్వం అధికారంలోకి వచ్చిన తర్వాత ప్రభుత్వ సీడ్‌పై చిన్నచూపు చూపినట్లు స్పష్టమవుతోంది. ప్రైవేటును ప్రోత్సహించారనేది లెక్కలే చెబుతున్నాయి. 2015-16లో 2లక్షల 63వేల 800 ఎకరాలు, 2016-17లో 2లక్షల 28వేల 500 ఎకరాలు, 2017-18లో లక్షా 79వేల 335 ఎకరాలు, 2018-19లో లక్షా 70వేల ఎకరాలు, 2019-20లో లక్షా65వేల ఎకరాలు, 2020-21లో లక్షా 42వేల 500 ఎకరాలు, 2021-22లో లక్షా 20వేల ఎకరాలు, 2022-23లో లక్షా 8వేల ఎకరాలు, 2023-24లో లక్ష ఎకరాలు, 2024-25లో 90వేల ఎకరాలు అంచనా వేసినట్లు లెక్కలో తెలిపారు. బీఆర్ఎస్ పదేళ్ల పాలనలో ప్రభుత్వ సీడ్ దగ్గింది. గత ప్రభుత్వ నిర్లక్ష్యంకారణంగా రైతులు ఇప్పటికీ ప్రైవేటు కంపెనీలను ఆశ్రయించి నష్టపోతూనే ఉన్నారు. దానిని చక్కదిద్దే పనిలో ప్రజాప్రభుత్వం నిమగ్నమైంది.

Also Read: Bigg Boss Telugu 9: తనూజకు పడిపోయిన యావర్.. డైరెక్ట్‌గా ఏం అడిగాడో తెలుసా?

50 టూర్లు, 24 దేశాలకు..

విదేశాల్లో విత్తనంపై అధ్యయనం చేసేందుకు ఫారిన్ టూర్లు సైతం చేశారు. గత ప్రభుత్వంలో జీవో 364 పేరుతో ఒక జీవో తీసుకొచ్చినట్లు సమాచారం. దానిని ఆసరగా చేసుకొని 50 టూర్లు, 24 దేశాలకు..325 రోజులు వెళ్లారు. తెలుగు రాష్ట్రాల్లోనే ఏ అధికారి వెళ్లనంతగా మాజీ విత్తన డైరెక్టర్ వెళ్లినట్లు సమాచారం. దీనిపై ప్రభుత్వానికి నివేదిక ఇచ్చినట్లు సమాచారం. అసలు జీవో364నే నిబంధనలకు విరుద్ధంగా ఉంటే ఆ జీవోకు సంబంధం లేని ఫారన్ టూర్లకు వెళ్లినట్లు సమాచారం. విదేశాలకే కాకుండా దేశంలోని వివిధ రాష్ట్రాలకు దాదాపు 100కు పైగా ప్లైట్లలో ప్రయాణం చేసి ఆచార్జీలన్నీ సీడ్ సర్టిఫికేషన్ ఏజెన్సీ నుంచే ఖర్చు చేసినట్లు సమాచారం. మరో విషయం ఏమిటంటే కొన్ని ప్లైట్లు బుక్ చేసుకొని క్యాన్సల్ చేసుకున్న చార్జీలే లక్షల్లో ఉన్నట్లు సమాచారం. సీడ్స్ సర్టిఫికేషన్ ఏజెన్సీకి గానీ, సీడ్ ఇండస్ట్రీకి గానీ ఎలాంటి ఉపయోగం లేదని, వెళ్లిన ఫారిన్ టూర్లన్నీ సొంత అవసరాలకే చేశారని ఆరోపణలు ఉన్నాయి.

ఏజీ ఆడిటింగ్‌తో దుబారా ఖర్చులు వెలుగులోకి…

గత ప్రభుత్వంలో చేసిన దుబారా ఖర్చులన్నీ ఏజీ ఆడిటింగ్‌తో వెలుగులోకి వచ్చాయి. 2015 నుంచి 2022 వరకు ప్రతి ఏటా దోమలగూడకు చెందిన ఓ ప్రైవేట్ ఆడిటింగ్ కంపెనీతో ఆడిటింగ్ చేయించినట్లు సమాచారం. ప్రభుత్వ సీడ్స్ సర్టిఫికేషన్ అథారిటీకి కేంద్ర, రాష్ట్రాల నుంచి నిధులు వచ్చాయి. ఏ ప్రభుత్వ సంస్థలోనైనా ఏజీ ఆడిటింగ్ చేస్తుంది. కానీ, సీడ్ సర్టిఫికేషన్ అథారిటీలో ఎందుకు జరగలేదనేది ఇప్పుడు చర్చకు దారితీసింది. సంస్థలో ఆదాయ, వ్యయాలను మాత్రం ఎందుకు ప్రైవేటు కంపెనీతో చేయించారనేది ఇప్పుడు అనుమానాలకు దారితీస్తుంది. ఏజీ ఆడిటింగ్‌లో మాత్రం సంచలన విషయాలు బయటకు వచ్చాయి. బీఆర్ఎస్ రైతు సమన్వయ సమితి సమావేశానికి కోటిరూపాయలు ట్రాన్స్‌ఫర్ చేశారని, భవనాలు నిర్మించకుండానే కాంట్రాక్టర్‌కు రూ. 95 లక్షలు చెల్లించారని, సొంత అవసరాలకు ప్రభుత్వ వాహనాలు వినియోగించి రూ.12లక్షలు, ఎలాంటి టెండర్ లేకుండానే నేరుగా ఎగ్జోటిక్ ఈవెంట్స్ కంపెనీకు రూ.2 కోట్లు చెల్లింపులు ఇలా పలు విషయాలు వెలుగులోకి వచ్చాయి. అయితే గత ప్రభుత్వ వైఫల్యాలపై సీఎం రేవంత్ రెడ్డి ప్రభుత్వం దృష్టిసారించింది. నాడు నిర్లక్ష్యం చేసిన అధికారులపైనా చర్యలకు సిద్ధమవుతున్నట్లు సమాచారం. ఏది ఏమైనా ప్రభుత్వం మళ్లీ విత్తన ధృవీకరణ విస్తీర్ణం పెంచేందుకు ప్రణాళికలు రూపొందిస్తుంది. రైతులంతా ప్రభుత్వ విత్తనం వినియోగించేలా కసరత్తు ప్రారంభించింది. ప్రభుత్వ విత్తనంతో ఎవరికైనా నష్టం జరిగినా వారికి పరిహారం ఇచ్చేలా ప్లాన్ చేపడుతున్నట్లు సమాచారం.

Also Read: Akhanda 2 Thaandavam: శివుడు కాదు.. ఈసారి హనుమంతుడు! ‘అఖండ 2: తాండవం’ మాసివ్ టీజర్