Sivaji Comments: తెలుగు చలనచిత్ర పరిశ్రమలో మహిళా భద్రత, గౌరవం, నైతిక విలువలపై మరోసారి పెద్ద ఎత్తున చర్చ మొదలైంది. తాజాగా ‘దండోరా’ (Dhandoraa) చిత్ర ప్రమోషన్స్‌లో నటుడు శివాజీ (Sivaji) చేసిన వ్యాఖ్యలు తీవ్ర దుమారాన్ని రేపుతున్న విషయం తెలిసిందే. ఈ నేపథ్యంలో, పరిశ్రమలోని 100 మందికి పైగా మహిళా నిపుణుల తరపున నందినీ రెడ్డి, సుప్రియ యార్లగడ్డ, స్వప్న దత్, మంచు లక్ష్మి, ఝాన్సీ వంటి ప్రముఖులు మూవీ ఆర్టిస్ట్ అసోసియేషన్ (MAA) అధ్యక్షుడికి ఒక ఘాటైన లేఖ రాశారు. ఈ లేఖలో వెంటనే శివాజీ బేషరతుగా క్షమాపణ చెప్పాలని, లేదంటే న్యాయపరమైన చర్యలు తీసుకుంటామని హెచ్చరించారు. ఈ లేఖలో..

Also Read- Champion: ఛాంపియన్‌తో ఛాంపియన్.. నితీష్ కుమార్ రెడ్డి ఫేవరేట్ హీరో, హీరోయిన్లు ఎవరంటే?

వివాదం ఏమిటి?

నటుడు శివాజీ మహిళల వస్త్రధారణపై చేసిన వ్యాఖ్యలు, అందులో ఉపయోగించిన పదజాలం (‘సామన్లు’, ‘దరిద్రపు ముం*’ వంటి పదాలు) అత్యంత అవమానకరంగా ఉన్నాయని మహిళా ప్రతినిధులు మండిపడుతున్నారు. ఇది కేవలం నైతిక విలువలకే కాకుండా, భారతీయ న్యాయ వ్యవస్థలోని BNS సెక్షన్ 509 (మహిళల గౌరవానికి భంగం కలిగించడం) ప్రకారం శిక్షార్హమైన నేరం అని వారు లేఖలో పేర్కొన్నారు. శివాజీ తన వ్యాఖ్యలకు గానూ బహిరంగంగా, ఎటువంటి షరతులు లేకుండా క్షమాపణ చెప్పాలని వారు డిమాండ్ చేశారు. అలా చెప్పని పక్షంలో న్యాయపరమైన చర్యలు తీసుకుంటామని హెచ్చరించారు. సమంత, నిధి అగర్వాల్ వంటి నటీమణులు బహిరంగ ప్రదేశాల్లో వేధింపులకు గురైనప్పుడు మౌనంగా ఉన్న పరిశ్రమ, ఇప్పుడు మహిళల వస్త్రధారణపై ‘మోరల్ పోలీసింగ్’ చేయడం ఎంతవరకు సమంజసమని వారు ప్రశ్నించారు. నటీమణులు ప్రమోషన్ల సమయంలో గుంపుల మధ్య ఇబ్బందులు పడుతున్నా, పరిశ్రమ నుండి సరైన స్పందన రాకపోవడంపై వారు ఆవేదన వ్యక్తం చేశారు.

Also Read- Manoj Manchu: మహిళల వస్త్రధారణపై శివాజీ వ్యాఖ్యలు.. మంచు మనోజ్ షాకింగ్ పోస్ట్!

‘మా’ (MAA) ముందు ఉంచిన 4 ప్రధాన డిమాండ్లు ఇవే..

పరిశ్రమలో మహిళల గౌరవాన్ని కాపాడేందుకు ‘వాయిస్ ఆఫ్ ఉమెన్’ బృందం ఈ క్రింది చర్యలను తక్షణమే అమలు చేయాలని కోరింది:
ప్రవర్తనా నియమావళి (Code of Conduct): మహిళా వ్యతిరేక లేదా లింగ వివక్షతో కూడిన వ్యాఖ్యలు చేసే సభ్యులపై కఠిన చర్యలు తీసుకునేలా ఒక నియమావళిని రూపొందించాలి.
భద్రతా ప్రోటోకాల్: సినిమా ప్రమోషన్లు, ఈవెంట్లలో మహిళా ఆర్టిస్టులకు పటిష్టమైన భద్రత, క్రౌడ్ కంట్రోల్ చర్యలు చేపట్టాలి.
అవగాహన సదస్సులు: నటీనటులు, పరిశ్రమలోని ఇతర విభాగాల వారికి జెండర్ సెన్సిటైజేషన్ (లింగ సమానత్వ అవగాహన) కార్యక్రమాలు నిర్వహించాలి.
అధికారిక ప్రకటన: మహిళల భద్రత, స్వయంప్రతిపత్తి, గౌరవం విషయంలో ఎటువంటి రాజీ లేదని అసోసియేషన్ స్పష్టమైన ప్రకటన చేయాలి.

నీతులు చెప్పే పోలీసింగ్ కాదు

‘మహిళలకు కావలసింది స్వేచ్ఛ, భద్రత, గౌరవం.. అంతేకానీ మౌనం లేదా నీతులు చెప్పే పోలీసింగ్ కాదు’ అంటూ.. వాయిస్ ఆఫ్ ఉమెన్ (Voice of Women) తమ వాయిస్ వినిపించింది. గ్లామర్ ప్రపంచంగా పిలవబడే టాలీవుడ్‌లో తెర వెనుక మహిళల భద్రత ప్రశ్నార్థకంగా మారుతోందని ఈ లేఖ స్పష్టం చేస్తోంది. అగ్ర నటీమణులు, నిర్మాతలు స్వయంగా రంగంలోకి దిగడంతో, ఈ వ్యవహారంపై ‘మా’ అధ్యక్షుడు, కమిటీ ఎలా స్పందిస్తుందో అన్నది ఇప్పుడు ఆసక్తికరంగా మారింది.

స్వేచ్ఛ ఈ – పేపర్ కోసం https://epaper.swetchadaily.com/ ఈ లింక్ క్లిక్ చేయగలరు