RT77: తెలుగు చిత్ర పరిశ్రమలో తనదైన ఎనర్జీతో మాస్ మహారాజాగా ముద్ర వేసుకున్న రవితేజ (Mass Maharaja Ravi Teja), ఇప్పుడు ఒక ప్రయోగాత్మక చిత్రంతో ప్రేక్షకుల ముందుకు రాబోతున్నారు. వైవిధ్యమైన కథలను తెరకెక్కించడంలో దిట్ట అయిన దర్శకుడు శివ నిర్వాణతో రవితేజ మొదటిసారి చేతులు కలిపారు. వీరిద్దరి క్రేజీ కాంబినేషన్‌లో రూపొందనున్న #RT77 చిత్రాన్ని ప్రముఖ నిర్మాణ సంస్థ మైత్రి మూవీ మేకర్స్ (Mythri Movie Makers) అత్యంత ప్రతిష్టాత్మకంగా నిర్మిస్తోంది. సాధారణంగా రవితేజ సినిమాల్లో కామెడీ, యాక్షన్ పీక్స్‌లో ఉంటాయి. కానీ శివ నిర్వాణ ఈసారి రవితేజ కోసం ఒక పవర్ ఫుల్, యూనిక్ స్క్రిప్ట్‌ను సిద్ధం చేసినట్లుగా తెలుస్తోంది. రవితేజ తన కెరీర్‌లో ఇప్పటివరకు టచ్ చేయని ఒక కొత్త జానర్‌లో ఈ సినిమా ఉండబోతోంది. కథలోని గాఢమైన భావోద్వేగాలు, తన పాత్రలో ఉండే వివిధ షేడ్స్ నచ్చడంతో రవితేజ వెంటనే ఈ ప్రాజెక్ట్‌కు గ్రీన్ సిగ్నల్ ఇచ్చారట. ఈ సినిమా కోసం ఆయన ఒక స్ట్రైకింగ్ మేకోవర్‌లో సరికొత్తగా కనిపించబోతున్నారు.

Also Read- Chiranjeevi: వింటేజ్ చిరంజీవే కాదు వింటేజ్ ఫంక్షన్ సెలబ్రేషన్.. ఈ సంక్రాంతి అదిరిపోయింది

ఆసక్తిని రేపుతున్న అనౌన్స్‌మెంట్ పోస్టర్

తాజాగా విడుదల చేసిన అనౌన్స్‌మెంట్ పోస్టర్ సినిమా మూడ్‌ను స్పష్టం చేస్తోంది. రాత్రి పూట ఆకాశం కింద ఒక భారీ వృక్షం, దానికి వేలాడుతున్న నల్లని దుస్తులు.. ఈ దృశ్యం ఏదో లోతైన కథను సూచిస్తోంది. దీనికి తోడు “His journey of redemption begins tomorrow” అనే ట్యాగ్‌లైన్ ఈ సినిమా ఒక మనిషి పరివర్తన గురించి చెప్పబోతోందని హింట్ ఇస్తోంది. ఒక మనిషి తన గత తప్పుల నుండి విముక్తి పొందే ప్రయాణమే ఈ సినిమా అని అర్థమవుతోంది. ఇందులో రవితేజ అయ్యప్ప మాలలో కనిపిస్తాడనేలా ఈ అనౌన్స్‌మెంట్ పోస్టర్ క్లారిటీ ఇస్తోంది. ఆల్రెడీ ఈ విషయంపై ఇప్పటికే వార్తలు వైరల్ అయిన విషయం తెలిసిందే. జనవరి 26న రిపబ్లిక్‌ డే కావడంతో పాటు మాస్ మహారాజా రవితేజ పుట్టినరోజు (HBD Ravi Teja). ఈ డబుల్ ధమాకాను సెలబ్రేట్ చేస్తూ చిత్ర నిర్మాతలు సోమవారం సినిమా ఫస్ట్ లుక్‌ను విడుదల చేయనున్నారు. ఈ లుక్ ఎలా ఉండబోతుందో అని అభిమానులు ఎంతో ఆత్రుతగా ఎదురుచూస్తున్నారు.

Also Read- Allu Arjun: ఐకాన్ స్టార్ ఆర్డర్‌లో సందీప్ వంగా కూడా.. క్లారిటీ ఇదే!

మైత్రి మూవీ మేకర్స్ బ్యానర్‌లో..

మైత్రి మూవీ మేకర్స్ బ్యానర్‌‌పై టాలీవుడ్ సక్సెస్‌ఫుల్ ప్రొడ్యూసర్స్ నవీన్ యెర్నేని, వై. రవిశంకర్ ఈ చిత్రాన్ని హ్యుజ్ కాన్వాస్‌పై నిర్మించనున్నారు. జాతీయ అవార్డు గ్రహీత జి.వి. ప్రకాష్ కుమార్ ఈ చిత్రానికి బాణీలు సమకూర్చనున్నారు. శివ నిర్వాణ గత చిత్రాలైన ‘మజిలీ’, ‘నిన్ను కోరి’ తరహాలోనే ఈ చిత్రంలోనూ సంగీతం, ఎమోషన్స్ ప్రధాన బలంగా నిలవనున్నాయని తెలుస్తోంది. ఈ చిత్రంలోని ఇతర నటీనటులు, టెక్నీషియన్స్ వివరాలను మేకర్స్ త్వరలోనే వెల్లడించనున్నారు. శివ నిర్వాణ మార్క్ స్టోరీ టెల్లింగ్, రవితేజ మార్క్ పవర్ ఫుల్ పర్ఫార్మెన్స్ తోడైతే బాక్సాఫీస్ వద్ద హిట్ మ్యాజిక్ పక్కా అనేలా అప్పుడే రవితేజ ఫ్యాన్స్ హడావుడి మొదలెట్టారు. మైత్రి మూవీ మేకర్స్ నిర్మాణ విలువలు ఈ చిత్రాన్ని రవితేజ కెరీర్‌లోనే ఒక మైలురాయిగా నిలబెడతాయని భావిస్తున్నారు.

స్వేచ్ఛ ఈ – పేపర్ కోసం https://epaper.swetchadaily.com/ ఈ లింక్ క్లిక్ చేయగలరు