Rajinikanth Legacy: రజనీ కాంత్ సౌత్ ఇండియన్ సినిమా పవర్ హౌస్‌గా ఏలా మారారంటే?.. ఆ స్పెషాలిటీతోనే..

Rajinikanth Legacy: ఇండియన్ సినిమా చరిత్రలో సువర్ణ అక్షరాలతో రాయదగ్గ పేర్లు ఏమైనా ఉన్నాయి అంటే అందులో ముందు ఉండేది సూపర్ స్టార్ రజనీ కాంత్. హంగులు ఆర్భాటాలు ఆయన నిఘంటువులోనే లేవు. సింపుల్ గా సమాన్యుడిలా, అందరివాడిలా.. ఉండే సౌత్ ఇండియన్ పవర్ హౌస్ రజనీ కాంత్. డిసెంబర్ 12, 2025 ఈ రోజు కేవలం ఒక క్యాలెండర్ తేదీ కాదు. దక్షిణ భారత సినీ చరిత్రలో ఈ రోజు చాలా ప్రత్యేకమైనది. కోట్లాది మంది అభిమానులు ఆరాధించే, మూడు తరాల ప్రేక్షకులను తన అసాధారణమైన ‘స్టైల్’తో కట్టిపడేసిన, సామాన్యుడి నుండి అసామాన్యుడిగా ఎదిగిన సూపర్‌స్టార్ రజనీకాంత్ 75వ వసంతంలోకి అడుగుపెట్టారు. 75 ఏళ్ల పండుగ సందర్భంగా ఆయనకు సినీ ప్రముఖులు, రాజకీయ దిగ్గజాలు శుభాకాంక్షలు చెబుతున్నారు.

Read also-Akhanda2 Review: బాలయ్య బాబు ‘అఖండ 2 తాండవం’తో పూనకాలు తెప్పించారా?.. ఫుల్ రివ్యూ..

బస్సు కండక్టర్ నుండి బాక్సాఫీస్ కింగ్ వరకు

రజనీకాంత్ అసలు పేరు శివాజీ రావు గైక్వాడ్. ఒకప్పుడు బెంగుళూరులో బస్సు కండక్టర్‌గా పనిచేసిన యువకుడు, సినీ గ్లామర్‌కు దూరంగా ఉన్నవాడు, ఈ రోజు ప్రపంచవ్యాప్తంగా ప్రేక్షకులను తన వేలికొనపై ఆడించే సూపర్‌స్టార్‌గా మారడం ఒక అద్భుతం. ఈ ప్రయాణం కేవలం కృషికి, పట్టుదలకు మాత్రమే కాక, స్వయంకృషితో ఎదిగిన వ్యక్తి సాధించిన అసాధారణ విజయానికి నిదర్శనం. 1975లో దర్శకుడు కె. బాలచందర్ తీసిన ‘అపూర్వ రాగంగళ్’ చిత్రంతో రజనీ తన సినీ ప్రస్థానాన్ని ప్రారంభించారు. తొలి నాళ్లలో ప్రతినాయక పాత్రలకు, నెగెటివ్ ఛాయలున్న క్యారెక్టర్లకు పరిమితమైనా, తన అద్భుతమైన స్క్రీన్ ప్రజెన్స్, విలక్షణమైన బాడీ లాంగ్వేజ్ కారణంగా త్వరలోనే సోలో హీరోగా గుర్తింపు పొందారు. కేవలం నటుడిగా కాకుండా, ‘స్టైల్’ అనే పదానికి కొత్త నిర్వచనం చెప్పిన వ్యక్తి రజనీకాంత్. ఆయన కళ్ళజోడు పెట్టుకునే విధానం, సిగరెట్ తిప్పే స్టైల్, నడిచే తీరు ఇవన్నీ ఆయన ట్రేడ్‌మార్క్‌లు, అభిమానులు అనుకరించే మ్యానరిజమ్స్ అయ్యాయి.

స్టైల్‌కి మారుపేరు, సక్సెస్‌కి చిరునామా

80వ దశకం నుండీ, రజనీకాంత్ హిట్ల పరంపరను కొనసాగించారు. ‘బాషా’, ‘అన్నామలై’, ‘ముత్తు’, ‘నరసింహ’, ‘పడయప్ప’ వంటి చిత్రాలు ఆయనను అంతర్జాతీయ స్థాయికి తీసుకువెళ్లాయి. ఆయన సినిమా విడుదల కావడం ఒక పండుగ, రజనీకాంత్ కటౌట్‌కు పాలభిషేకం చేయడం ఒక సంప్రదాయం. ఈ అసాధారణమైన ఫాలోయింగ్ భారతదేశంలో మరే నటుడికి సాధ్యం కాలేదనే చెప్పవచ్చు. ఆయన సినిమాలు అద్భుతమైన యాక్షన్, సెంటిమెంట్, కామెడీల మిశ్రమంగా ఉండి, అన్ని వర్గాల ప్రేక్షకులను అలరించాయి. “రజనీకాంత్ తెరపై కనిపిస్తే చాలు, అభిమానుల గుండెల్లో ఉత్సాహం ఉప్పొంగుతుంది. ఇది కేవలం నటన కాదు, అదొక విద్యుత్తు తరంగం.”

Read also-Bigg Boss Telugu 9: పవన్, భరణి, సుమన్ ఔట్.. ఇక మిగిలింది ఆ ముగ్గురే!

తెర వెనుక..

తెరపై రజనీకాంత్ ఎలాగైతే సూపర్‌స్టార్‌గా వెలిగిపోతారో, తెర వెనుక ఆయన చాలా సాధారణంగా, ఆధ్యాత్మికంగా ఉంటారు. మేకప్ లేకుండా, ఎలాంటి ఆర్భాటం లేకుండా కనిపించే ఆయన తీరు ఎంతో మందికి ఆదర్శం. ఆయనకున్న అపారమైన అభిమానం వెనుక ఉన్న రహస్యం – ఆయన వ్యక్తిత్వం. సినీ జీవితంలో శిఖరాగ్రానికి చేరినా, మౌలిక విలువలను, మర్యాదను ఆయన ఏనాడూ విస్మరించలేదు. 75వ పుట్టినరోజు సందర్భంగా, రజనీకాంత్ కేవలం గత వైభవాన్ని మాత్రమే కాదు, వర్తమానంలోనూ, భవిష్యత్తులోనూ ఆయన సినీ ప్రస్థానం కొనసాగిస్తున్న తీరును మనం అభినందించాలి. ‘కబాలి’, ‘పేట’, ‘దర్బార్’, ‘జైలర్’ వంటి చిత్రాలతో యువ హీరోలకు ధీటుగా దూసుకుపోతున్న రజనీ ఎనర్జీ, డెడికేషన్ ఎందరికో స్ఫూర్తిదాయకం. భారతీయ సినీ చరిత్రలో రజనీకాంత్ ఒక యుగపురుషుడు. ఆయన సినిమా ప్రయాణం ముగింపు లేని పరుగులాంటిది. ఈ 75వ జన్మదిన వేడుకలు, ఆయన ఆరోగ్యానికి, మరిన్ని విజయాలకు నాంది పలకాలని ఆశిస్తూ… హ్యాపీ బర్త్‌డే, సూపర్‌స్టార్.