VN Aditya: దాసరైనా, చిరంజీవైనా.. చర్చలతో సమస్య‌కి పరిష్కారం తేలేని నాయకుడు ఏ సంఘానికైనా అప్రయోజకుడే!

VN Aditya: ప్రస్తుతం తెలుగు సినిమా ఇండస్ట్రీలో జరుగుతున్న సమ్మెపై దర్శకుడు వి.ఎన్. ఆదిత్య తన ఫేస్‌బుక్ అకౌంట్ వేదికగా స్పందించారు. కార్మికుల కష్టాలు తీర్చేలా యూనియన్ లీడర్ల నిర్ణయాలు ఉండాలి గానీ, వారిని ఇబ్బందులు పెట్టేలా ఉండకూడదని ఆయన హితబోధ చేశారు. అలాగే పీపుల్ మీడియా ఫ్యాక్టరీ (People Media Factory) నిర్మాత‌ టీజీ విశ్వప్రసాద్‌‌ని టార్గెట్ చేయడంపై కూడా ఆయన స్పందించారు. రెండు శాతం సక్సెస్ రేట్ ఉన్న రంగానికి ఇన్వెస్ట్‌మెంట్స్ తెప్పించడం చాలా కష్టమనే విషయం గ్రహించాలని కోరారు. సమ్మె చేస్తే గాని సమస్య పరిష్కారం కాలేదంటే ముందు ఆ సంఘాల నాయకులను మార్చేయాలని హితబోధ చేశారు. ఏదైనా సమస్య ఉంటే, పని చేస్తూ సాల్వ్ చేసుకోవాలి కానీ, పని లేని రోజున పస్తులు పడుకునే ఇండస్ట్రీలో ఇలాంటి సమ్మెలు చేసి.. ఎంతో మంది కార్మికుల పొట్టకొడుతున్నారని డైరెక్ట్‌గా యూనియన్ లీడర్స్‌‌ని టార్గెట్ చేస్తూ.. ఆయన పెట్టిన పోస్ట్ వైరల్ అవుతోంది. ఆయన ఫేస్‌బుక్‌లో చేసిన పోస్ట్ ఇదే..

‘‘ఒక్క వ్యక్తి సినిమాల్లోకి వచ్చి, డబ్బులొస్తేనే తీస్తాను, రాకపోతే వేరే వ్యాపారంలో పెడతాను అనుకోకుండా.. లాభమొచ్చినా సినిమాలే తీస్తూ, నష్టమొచ్చినా సినిమాలే తీస్తూ.. తన బయటి వ్యాపారాలలో వచ్చిన లాభాలు కూడా సినిమా రంగం మీదకే మళ్లిస్తూ.. ఈ రంగంలో పదేళ్లలో దాదాపు వెయ్యికోట్లకు పైగా పెట్టుబడి పెట్టుకుని, ఫ్లాపుల్ని, ట్రోలింగులని ఎదురీదుతూ మొండిగా తట్టుకుని నిలబడితే.. ఆయన్ని ఎంకరేజ్ చేసి మరిన్ని మంచి సినిమాలు చేసేలా ప్రోత్సహించాల్సింది పోయి.. అబద్ధపు ప్రచారాలతో, స్వార్ధపూరిత రాజకీయాలతో, కుల వివక్షలతో ఈ రంగం మీద పెట్టుబడిని బయటి రంగాలకి మళ్లించేలా మన ప్రవర్తన ఉంటే ఎవడికిరా నష్టం.

Also Read- Manchu Family Emotional: గొడవలు ముగిసినట్టేనా.. మంచు విష్ణును అన్నా అని పిలిచిన మనోజ్..

యాభై సినిమాలకు 200 మందికి పైగా పదేళ్లలో ఆయన పెట్టిన మూడు పూటల భోజనం ఖర్చు మాత్రమే ఒక పది పెద్ద సినిమాల బడ్జెట్టు. కారు డ్రైవర్లకి, ప్రొడక్షన్ బాయ్స్‌కి డబ్బులెగ్గొట్టి.. హీరో, హీరోయన్స్‌కి మాత్రమే డబ్బులిచ్చి, బడా ప్రొడ్యూసర్స్‌లా మార్కెట్‌లో పోజు కొట్టే చాలామందిని ఒక్క మాట అనలేని యూనియన్ లీడర్లు ఈయన మీద మాత్రం విరుచుకు పడిపోతారు. ఏ కార్మిక సంఘం అయినా వర్కర్‌కి అన్యాయం చేసిన ప్రొడ్యూసర్‌పై పడాలి. వేల మంది వర్కర్స్‌కి పని కల్పించే ప్రొడ్యూసర్స్ మీద కాదు.. ఈ సమ్మె వల్ల కడుపులు కాలుతున్న కార్మికులు లక్షల్లో ఉన్నారు తెలుగు ఇండస్ట్రీలో.. వాళ్ల ఆకలి బాధలకు ఏ యూనియన్ నాయకుడు సమాధానం చెప్తాడు.

కళారంగంలో పని దొరకడమే మొదటి ప్రాధాన్యత. దానిని ఆపే సంఘాలు ఉన్నా ఒకటే.. ఊడినా ఒకటే. చేతనైతే యూనియన్లు అన్నీ కలిసి ఒక్క రోజు షూటింగ్ జరిగేందుకు దోహదపడాలి.. ఆపడానిక్కాదు. ఎన్నుకున్న నాయకులు షూటింగులకు అంతరాయం కలగకుండా సమస్యలకు పరిష్కారం తేవాలి అది సామర్ధ్యం అంటే. పనుంటే గాని డబ్బు, అన్నం దొరకని పరిశ్రమలో పని ఆపి, ఎవ్వరూ ఎవ్వరినీ ఉద్ధరించలేరు. నేను ఏ యూనియన్‌లో అయినా సాధారణ సభ్యుడినే గానీ, ఏ పదవిలోనూ ప్రస్తుతం లేను. అయినా నాకేం తెలుసని ఈ పోస్ట్ పెట్టానని ఎవరైనా అనుకుంటే.. ముప్ఫై అయిదేళ్లుగా సినిమా రంగంలో వస్తున్న ప్రతి మార్పుకి ప్రత్యక్ష సాక్షిని నేను.. నా అనుభవాన్ని మించిన అర్హత లేదు అని కచ్చితంగా చెప్పగలను.

Also Read- Swetcha Special story: కోట్ల విలువ చేసే భూములు హాం ఫట్.. విచ్చల విడిగా అనుమతులిచ్చిన అధికారులు!

రెండు శాతం సక్సెస్ రేట్ ఉన్న రంగానికి ఇన్వెస్ట్ మెంట్లు తెప్పించడం చాలా కష్టం. రెండు వేల ఎనిమిది నుండి నా ద్వారా వచ్చిన పెట్టుబడులు రెండు వేల కోట్లు. రాబోయే పెట్టుబడులు మరో వేయి కోట్ల పైనే. నా వల్ల వచ్చిన గౌరవం ముప్ఫై రెండు జాతీయ, అంతర్జాతీయ స్థాయి పురస్కారాలు. ఇంతకన్నా అర్హత కావాలా మాట్లాడడానికి..? నిర్మాతల్ని సినిమాలు తీయనివ్వండి.. కార్మికులు బావుంటారు.. షూటింగులు ఆపకండి. అడుక్కు తినాల్సి వస్తుంది. సినిమా అనేది పని చేసేవాడికి మాత్రమే పరమాన్నం పెడుతుంది.. పని లేని రోజున పస్తులు పడుకో పెడుతుంది. ఇది తెలుసుకుని మసలుకోండి.’’ అని వి ఎన్ ఆదిత్య యూనియన్ లీడర్స్‌పై ఫైర్ అయ్యారు. మరో పోస్ట్‌లో..

‘‘సమ్మె చేస్తే గాని సమస్య పరిష్కారం కాలేదంటే ముందు ఆ సంఘం నాయకుణ్ని మార్చేయాలి. చర్చలతో సమస్య‌లకి పరిష్కారం తేలేని నాయకుడు ఏ సంఘానికైనా అప్రయోజకుడే. దాసరి అయినా, చిరంజీవి అయినా, తమ్మారెడ్డి భరద్వాజ అయినా, మోహన్ బాబు అయినా, బాలకృష్ణ అయినా.. ఇటువంటి సమస్య వస్తే, సమ్మె పరిష్కారం కాదని, చర్చలతోనే పరిష్కరించుకుందాం అని ముందే చెప్తారు.. పరిష్కారం తెస్తారు. ఈ లోగా వచ్చే భత్యాన్ని ఆపవద్దని చెప్తారు. ఎవరైనా ఇదే చెప్తారు.. చెప్పాలి కూడా. అదీ కార్మికుల సంక్షేమం గురించి ఆలోచించడం అంటే. సమ్మె పేరుతో వాళ్లని షూటింగులకు దూరం చేసి, రోడ్డు మీద పడేయడం కాదు లీడర్ షిప్ అంటే..’’ అని విన్ ఆదిత్య మరో పోస్ట్‌లో పేర్కొన్నారు.

స్వేచ్ఛ ఈ – పేపర్ కోసం https://epaper.swetchadaily.com/ ఈ లింక్ క్లిక్ చేయగలరు