Epaper 
Illegal Steroid Sale: జిమ్ లకు వెళ్లే యువకులే వారి టార్గెట్. సిక్స్ ప్యాక్ బాడీ కావాలా? అదీ నాలుగైదు నెలల్లోనే అంటూ వారిని స్టెరాయిడ్ ఇంజక్షన్లకు అలవాటు చేస్తున్నారు. తమ సంపాదన కోసం అవతలి వారి ప్రాణాలతో చెలగాటాలాడుతున్నారు. క్రమంగా వారిని మృత్యుముఖంలోకి నెడుతున్నారు. ఇక్కడ గమనించాల్సిన అంశం ఏమిటంటే కొంతమంది జిమ్ నిర్వాహకులు ట్రైనర్లు స్టెరాయిడ్ ఇంజక్షన్ల దందా చేస్తుండటం. హాలీవుడ్ నుంచి టాలీవుడ్ వరకు పలువురు హీరోలు సిక్స్ ప్యాక్ బాడీలతో ప్రేక్షకులను ఆకట్టుకుంటున్న విషయం తెలిసిందే. కొంతమంది హీరోయిన్లు కూడా జిమ్లకు వెళుతూ సిక్స్ ప్యాక్ సాధించి తామూ ఏమీ తక్కువ తినలేదని నిరూపిస్తున్నారు. వీరి ప్రభావం యువతపై పడుతుందనటంలో సందేహం లేదు. దానికితోడు ఫిట్ నెస్ పై యువతీ, యువకుల్లో కొంతకాలంగా అవేర్ నెస్ గణనీయంగా పెరిగింది. ఈ క్రమంలో వేలాది మంది క్రమం తప్పకుండా జిమ్లకు వెళుతున్నారు. దాంతో ఏ జిమ్ చూసినా ఉదయం సాయంత్రం వేళల్లో వ్యాయామం చేసే యువతీ, యువకులతో కిటకిటలాడుతూ కనిపిస్తోంది. సరిగ్గా ఈ పరిస్థితిని కొంతమంది అక్రమ సంపాదనలకు అవకాశంగా చేసుకుంటున్నారు. జిమ్లకు వచ్చే వారిలో ముఖ్యంగా యువకులతో మాట కలిపి ఏడాది.. రెండేళ్లు కష్టపడితేగాని రాని సిక్స్ ప్యాక్ అయిదారు నెలల్లో కావాలనుకుంటున్నారా? అయితే, మేం చెప్పినట్టు చేయండి అంటూ స్టెరాయిడ్ ఇంజక్షన్లు అమ్ముతున్నారు. ప్రొటీన్ పౌడర్లు అలవాటు చేస్తున్నారు.
ఢిల్లీ.. సూరత్ల నుంచి..
స్టెరాయిడ్ ఇంజక్షన్లు దందా చేస్తున్న వారిలో అధికశాతం మంది మెఫెంటర్మయిన్ సల్ఫేట్ ఇంజక్షన్లను విక్రయిస్తున్నారు. ఈ ఇంజక్షన్ ధర 250 రూపాయల వరకు ఉంది. నిబంధనల ప్రకారం మెడికల్ ప్రిస్క్రిప్షన్ లేనిదే ఈ ఇంజక్షన్లను అమ్మటానికి వీల్లేదు. అయితే, ఈ ఇంజక్షన్ల విక్రయాలు చేస్తున్న వారు ఢిల్లీ, సూరత్ల నుంచి వాటిని తీసుకొస్తున్నారు. కొందరు స్వయంగా వెళ్లి తీసుకొస్తుంటే మరికొందరు కొరియర్ల ద్వారా భారీ మొత్తంలో స్టెరాయిడ్ ఇంజక్షన్లు తెప్పించుకుంటున్నారు. ఒక్కో ఇంజక్షన్ ను 400 నుంచి 500 రూపాయలకు అమ్ముతున్నారు. దీనికి నిదర్శనంగా సూరత్ నుంచి మెఫంటర్మయిన్ ఇంజక్షన్లు తెచ్చి అమ్ముతూ వెస్ట్ జోన్ టాస్క్ ఫోర్స్ పోలీసులకు మహ్మద్ ఫైజల్ ఖాన్ ఉదంతాన్ని పేర్కొనవచ్చు. సూరత్ నుంచి ఈ ఇంజక్షన్లను కొని తెచ్చిన ఫైజల్ ఖాన్ అత్తాపూర్ లో వాటిని విక్రయిస్తుండగా సోమవారం టాస్క్ ఫోర్స్ పోలీసులు దాడి చేసి అరెస్ట్ చేశారు.
Also Read: Komalee Prasad: కోలీవుడ్లోకి ఎంట్రీ ఇవ్వనున్న టాలీవుడ్ భామ.. ఏ సినిమాతో అంటే?
హకీంపేటలో నివాసముంటూ..
అతని నుంచి 133 ఇంజక్షన్లను సీజ్ చేశారు. ఇక, డబ్బు సంపాదనే లక్ష్యంగా హైదరాబాద్(Hyderabad)లోని కొందరు మెడికల్ హాళ్ల యజమానులు కూడా ఈ ఇంజక్షన్లను యధేచ్ఛగా విక్రయిస్తున్నారు. గతంలో సౌత్ వెస్ట్ జోన్ టాస్క్ ఫోర్స్ పోలీసులు ఇలా స్టెరాయిడ్ ఇంజక్షన్లు అమ్ముతున్న మెడికల్ స్టోర్ల యజమానులు సంజీవ్, మహ్మద్ నజీర్ లను అరెస్ట్ చేశారు. ఆందోళనాకరమైన అంశం ఏమిటంటే కొందరు జిమ్ యజమానులు, ట్రైనర్లు ఈ దందా చేస్తుండటం. హకీంపేటలో నివాసముంటూ జిమ్ ట్రైనర్గా పని చేస్తున్న ఇమ్రాన్ ఖాన్ అనే వ్యక్తి ఇలాగే స్టెరాయిడ్ ఇంజక్షన్లు అమ్ముతుండగా సౌత్ వెస్ట్ జోన్ టాస్క్ ఫోర్స్ పోలీసులు అరెస్ట్ చేశారు. తాజాగా సౌత్ జోన్ టాస్క్ ఫోర్స్ పోలీసులు అబ్దుల్ గఫార్ ఖాన్ అనే వ్యక్తిని అదుపులోకి తీసుకున్నారు. వెస్ట్ జోన్ టాస్క్ ఫోర్స్ పోలీసులు రషీద్ మత్లూబ్ ఖాన్ అనే జిమ్ ట్రైనర్ను అరెస్ట్ చేసి లక్షా 20వేల రూపాయల విలువ చేసే మెఫంటర్మయిన్ సల్ఫేట్ ఇంజక్షన్లను సీజ్ చేశారు.
ప్రాణాలకే ప్రమాదం..
కండల కోసం స్టెరాయిడ్ ఇంజక్షన్లు తీసుకోవటం వల్ల ప్రాణాలకు ప్రమాదమని కార్డియాలజిస్ట్ డాక్టర్ శశికాంత్ చెప్పారు. ఈ ఇంజక్షన్లు తీసుకోవటం వల్ల నాళాల్లో రక్తప్రసరణ పెరిగి గుండె మామూలుకన్నా ఎక్కువ వేగంతో కొట్టుకుంటుందని తెలిపారు. దీనివల్ల వెంట్రిక్యులర్ ఫిబ్రిలేషన్, వెంట్రిక్యులర్ టెకీ కార్డియాకు గురవుతారన్నారు. ఆకస్మికంగా గుండె ఆగిపోయి చనిపోతారని చెప్పారు. జిమ్లలో కసరత్తులు చేస్తూ యువకులు చనిపోతుండటానికి ఇదో కారణమన్నారు. సీనియర్ జనరల్ ఫిజీషియన్ డాక్టర్ విజయ్ కుమార్తో మాట్లాడగా స్టెరాయిడ్ ఇంజక్షన్ల వల్ల గుండె, కిడ్నీలు దెబ్బ తింటాయన్నారు. దాంతోపాటు లైంగిక సామర్థ్యం తగ్గిపోతుందని చెప్పారు. స్టెరాయిడ్ ఇంజక్షన్లు తీసుకోవటం వల్ల కండరాలు వేగంగా పెరుగుతాయని చెబుతూ ఇది కేవలం వాపు మాత్రమే అన్నారు. ఇంజక్షన్లు తీసుకోవటం ఆపేసినా, వ్యాయామం మానేసినా అంతే వేగంగా కండరాలు కనుమరుగై ఆ ప్రాంతంలో శరీరం వదులుగా మారుతుందని వివరించారు. అందువల్ల స్టెరాయిడ్ ఇంజక్షన్లు, ప్రొటీన్ పౌడర్లకు దూరంగా ఉండటమే మంచిదన్నారు. ఓ ప్లాన్ ప్రకారం ఎక్సర్ సైజులు చేస్తే కాస్త ఆలస్యమైనా సిక్స్ ప్యాక్ సాధించుకోవచ్చన్నారు.
Also Read: MLA Kaushik Reddy: సమ్మక్క జాతరలో ఓవరాక్షన్.. పాడి కౌశిక్ రెడ్డిపై ఐపీఎస్ సంఘం సీరియస్
