PK Martial Arts Journey: పవర్ స్టార్ పవన్ కళ్యాణ్, ఏపీ డిప్యూటీ సీఎం పవన్ కళ్యాణ్ (Pawan Kalyan) అత్యంత అరుదైన ఘనతను సాధించారు. కొన్ని రోజులుగా ఎక్కడ చూసినా ఆయన పేరే వినిపిస్తుంది. ఆయన మంత్రిగా ఉన్న పంచాయతీరాజ్ శాఖ అభివృద్ధిలో నెంబర్ వన్ స్థానాన్ని కైవసం చేసుకుంది. ఏపీలోని పంచాయతీరాజ్, గ్రామీణాభివృద్ధి శాఖ సైతం దేశంలోనే నెంబర్ వన్ స్థానంలో నిలిచింది. గతంలో జాతీయ స్థాయిలో 23వ స్థానంలో ఉన్న ఏపీని పవన్ కళ్యాణ్ నెంబర్ వన్ స్థానానికి తీసుకొచ్చారు. అలాంటి పవన్ కళ్యాణ్‌కు ఇప్పుడు పురాతన జపనీస్ కత్తిసాము కళ ‘కెంజుట్సు’లో అధికారికంగా ప్రవేశం పొందారు. జపనీస్ మార్షల్ ఆర్ట్స్‌లో చారిత్రాత్మక ప్రపంచ గుర్తింపు పొందారు. కొన్ని రోజులుగా పవన్ కళ్యాణ్ క్రియేటివ్ వర్క్స్ (Pawan Kalyan Creative Works) అంటూ ట్విట్టర్ వేదికగా అప్డేట్స్ వస్తున్న విషయం తెలిసిందే. పవన్ కళ్యాణ్ సాధించిన అరుదైన ఘనతలను చెబుతూ తాజాగా ఈ ట్విట్టర్ ఎక్స్ వేదికలో ఓ వీడియోను వదిలారు. ఈ వీడియోలో ఆయన సాధించిన ఘనతలేంటో తెలియజేశారు.

అంతర్జాతీయ గౌరవం

పవర్ స్టార్ పవన్ కళ్యాణ్ బహుముఖ ప్రజ్ఞాశాలి. ఇప్పటికే సినీ రంగంలో నటుడిగా చెరగని ముద్ర వేశారు. నటుడిగా మాత్రమే కాకుండా రచయితగా, దర్శకుడిగా, స్టంట్ కోఆర్డినేటర్ గా, కొరియోగ్రాఫర్ గా, గాయకుడిగా ఇలా పలు విభాగాల్లో తన ప్రతిభను చాటి, ఇప్పుడు రాజకీయాల్లోనూ తనదైన ముద్ర వేస్తున్నారు. ఆంధ్రప్రదేశ్ ఉప ముఖ్యమంత్రిగా బాధ్యతలు నిర్వహిస్తూ, ప్రజా నాయకుడిగా మన్ననలు అందుకుంటున్నారు. ఆయన చేసే పనులకు అంతా ఫిదా అవుతున్న విషయం తెలిసిందే. మొదటి నుంచి మార్షల్ ఆర్ట్స్‌లో ప్రతిభ ఉన్న పవన్ కళ్యాణ్, ఇప్పుడు ఓ అరుదైన ఘనతను ఖాతాలో వేసుకున్నారు. ప్రాచీన జపనీస్ కత్తిసాము కళ అయిన ‘కెంజుట్సు’లో అధికారికంగా ప్రవేశం పొందడం ద్వారా.. అంతర్జాతీయ గౌరవాన్ని సాధించారు. మూడు దశాబ్దాలకు పైగా ఆయన క్రమశిక్షణతో సాగించిన సాధన, పరిశోధన, మార్షల్ ఆర్ట్స్ పట్ల ఉన్న అంకితభావానికి నిదర్శనంగా ఈ అరుదైన ప్రపంచ స్థాయి గుర్తింపు ఆయనకు లభించింది.

Also Read- Nagababu: ఈ ఫొటోలోని వ్యక్తి కనిపిస్తే సమాచారం ఇవ్వండి.. జనసేన నేత ప్రధాన కార్యదర్శి నాగబాబు ట్వీట్

సినిమాలలోకి రాకముందే..

సినిమాలు, రాజకీయాల్లోకి ప్రవేశించకముందే పవన్ కళ్యాణ్ మార్షల్ ఆర్ట్స్ ప్రయాణం ప్రారంభమైంది. కరాటే, సంబంధిత యుద్ధకళల పట్ల అమితమైన ఆసక్తి కలిగిన పవన్ కళ్యాణ్, చెన్నైలో ఉన్న సమయంలో కఠినమైన శిక్షణతో పాటు నిరంతర సాధన చేసి.. సాంకేతికంగా, తాత్వికంగా బలమైన పునాది ఏర్పరుచుకున్నారు. కాలక్రమేణా, శారీరక సాధనకే పరిమితం కాకుండా, జపనీస్ సమురాయ్ మార్షల్ సంప్రదాయాలపై లోతైన అధ్యయనం చేసి, పరిశోధించి, అత్యంత నిబద్ధతతో వాటిని అనుసరించారు. మార్షల్ ఆర్ట్స్ పై ఆయనకున్న అవగాహన సినిమాల రూపంలోనూ అందరికీ తెలిసేలా చేశారు. ‘అక్కడ అమ్మాయి ఇక్కడ అబ్బాయి, తమ్ముడు, ఖుషి, అన్నవరం, ఓజీ’ వంటి చిత్రాల ద్వారా ఈ మార్షల్ ఆర్ట్స్‌ను తెరపై ప్రదర్శిస్తూ, వాటికి ప్రజాదరణ తీసుకొచ్చారు.

Also Read- Mass Maharaja: ‘మాస్ మహారాజ్’ బిరుదు పేటెంట్ తనదే అంటున్న హరీష్ శంకర్.. రవితేజ ఏం చేశారంటే?

ఫిఫ్త్ డాన్.. టైగర్ ఆఫ్ మార్షల్ ఆర్ట్స్

మార్షల్ ఆర్ట్స్ పట్ల ఆయన చూపిన నిరంతర, దీర్ఘకాలిక అంకితభావాన్ని గుర్తించిన అంతర్జాతీయ సంస్థలు, పవన్ కళ్యాణ్‌కు పలు ప్రతిష్టాత్మక గౌరవాలు అందించాయి. జపాన్ సంప్రదాయ యుద్ధకళల్లో అత్యంత గౌరవనీయమైన సంస్థలలో ఒకటైన ‘సోగో బుడో కన్‌రి కై’ నుంచి ఆయనకు ఫిఫ్త్ డాన్ (ఐదవ డాన్) పురస్కారం లభించింది. అలాగే, జపాన్ వెలుపల ‘సోకే మురమత్సు సెన్సై’లోని ‘టకెడా షింగెన్ క్లాన్’లో ప్రవేశం పొందిన తొలి తెలుగు వ్యక్తిగా ఆయన నిలిచారు. ఇది జపాన్ వెలుపల చాలా అరుదుగా లభించే గౌరవం. అంతేకాకుండా, గోల్డెన్ డ్రాగన్స్ సంస్థ ద్వారా ఆయనకు ‘టైగర్ ఆఫ్ మార్షల్ ఆర్ట్స్’ అనే విశిష్ట బిరుదుతో సత్కారం కూడా జరిగింది. అధునాతన శిక్షణలో భాగంగా, భారతదేశంలో జపాన్ యుద్ధకళలలో అగ్రగణ్యులలో ఒకరైన ప్రముఖ బుడో నిపుణుడు హాన్షి ప్రొఫెసర్ డాక్టర్ సిద్ధిక్ మహ్మూదీ వద్ద పవన్ కళ్యాణ్ శిక్షణ పొందారు. ఆయన మార్గదర్శకత్వంలో పవన్ కళ్యాణ్ ‘కెండో’లో సమగ్ర శిక్షణ పొంది, ఉన్నత స్థాయి సాంకేతిక నైపుణ్యం, లోతైన తాత్విక అవగాహనను సంపాదించారు. ఈ ఘనత ద్వారా సినిమా, శాస్త్రీయ యుద్ధకళలు, యుద్ధ తత్వశాస్త్రం.. ఈ మూడింటినీ అంతర్జాతీయ వేదికపై సమన్వయం చేయగలిగిన అతి కొద్దిమంది భారతీయ ప్రముఖుల్లో ఒకరిగా పవన్ కళ్యాణ్ ప్రత్యేక స్థానాన్ని సంపాదించుకున్నారు.

Come, witness the most memorable part of Shri Pawan Kalyan’s Martial Arts Journey.#PKMartialArtsJourney pic.twitter.com/Z3D27hD2Uh

— Pawan Kalyan Creative Works (@PKCWoffl) January 11, 2026

స్వేచ్ఛ ఈ – పేపర్ కోసం https://epaper.swetchadaily.com/ ఈ లింక్ క్లిక్ చేయగలరు